អង្គជំនុំជម្រះវិសាមញ្ញក្នុងតុលាការកម្ពុជា ( អ.វ.ត.ក.) បានបញ្ចប់នីតិវិធីកាត់ក្តីលើសំណុំរឿងសំខាន់ៗរបស់ខ្លួននៅចុងឆ្នាំ២០២២ ។ ដំណើរការសាលាក្តីខ្មែរក្រហមបានប្រព្រឹត្តទៅអស់រយៈពេលជាង ១៦ឆ្នាំ ចាប់តាំងពីឆ្នាំ២០០៦ និង ចំណាយថវិកាអស់ប្រមាណ ៣៣៧ លានដុល្លារ ។ ថ្វីត្បិតដំណើរការកាត់សេចក្តីរបស់សាលាក្តីខ្មែរក្រហមបានបញ្ចប់ក៏ពិតមែន ប៉ុន្តែមានកិច្ចការសេសសល់ជាច្រើនដែលសាលាក្តី ខ្មែរក្រហមកំពុងធ្វើបន្ត ។ ការងារសេសសល់របស់សាលាក្តីខ្មែរក្រហមរយៈពេលបីឆ្នាំ គឺជាកិច្ចការផ្សព្វផ្សាយព័ត៌មាន និងរៀបចំមជ្ឈមណ្ឌលធនធានព័ត៌មានសម្រាប់សាធារណជន ។

មជ្ឈមណ្ឌលធនធានអង្គជំនុំជម្រះវិសាមញ្ញក្នុងតុលាការកម្ពុជា មានទីតាំងនៅក្នុងបរិវេណការិយាល័យថ្មីរបស់អង្គជំនុំជម្រះវិសាមញ្ញក្នុងតុលាការកម្ពុជា អគារលេខ៤០ មហាវិធីសហព័ន្ធរុស្សី (ផ្លូវ១១០) សង្កាត់ មិត្តភាព ខណ្ឌ៧មករា រាជធានីភ្នំពេញ ដែលនៅជាប់ទីស្តីការគណៈរដ្ឋមន្ត្រី ។ មជ្ឈមណ្ឌលធនធាន អ.វ.ត.ក. បានសម្ពោធដំណើរការជាផ្លូវការនៅថ្ងៃទី២ ខែតុលា ឆ្នាំ២០២៣ ។

ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. មានប្រសាសន៍បញ្ជាក់ថា ៖ “មជ្ឈមណ្ឌលធនធាននេះ គឺជាចំណុចស្នូលនៃកេរដំណែលឯកសាររបស់សាលាក្តីខ្មែរក្រហម និងជាមជ្ឈមណ្ឌលសម្រាប់សាធារណជន ប្រើប្រាស់ដើម្បីសិក្សាស្រាវជ្រាវ ស្វែងរកព័ត៌មាននានាបន្ទាប់ពីការបញ្ចប់ដំណើរការនីតិវិធីតុលាការ ។ ឯកសារដែលមាននៅទីនេះផ្តោតសំខាន់លើដំណើរការនីតិវិធីរបស់តុលាការខ្មែរក្រហមតែប៉ុណ្ណោះ” ។

ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. បានបញ្ជាក់បន្ថែមថា មជ្ឈមណ្ឌលធនធាននេះ មានសមាសភាគសំខាន់ៗ ចំនួន៦ រួមមាន (ទី១) បណ្ណាល័យនិងកន្លែងស្រាវជ្រាវ (ទី២) គេហទំព័រថ្មីដែលកំពុងកែលម្អនិងធ្វើបច្ចុប្បន្នភាពប្រកបដោយភាពច្នៃប្រឌិត (ទី៣) និហិតដ្ឋានបណ្ណសារ (ទី៤) បន្ទប់ប្រើប្រាស់ពហុបំណងសម្រាប់រៀបចំសិក្ខាសាលា និងតុលាការនិម្មិត (ទី៥) បន្ទប់ពិគ្រោះយោបល់ និងតាំងពិព័រណ៍ និង (ទី៦) ឧទ្យានសម្រាប់ការចងចាំ ។

ប្រធានរដ្ឋបាលស្តីទីនៃ អ.វ.ត.ក. បានឱ្យដឹងទៀតថា មិនគិតថ្លៃឡើយសម្រាប់ការប្រើប្រាស់សេវាកម្មទាំងអស់ក្នុងបណ្ណាល័យមជ្ឈមណ្ឌលធនធាន នៃអង្គជំនុំជម្រះវិសាមញ្ញក្នុងតុលាការកម្ពុជា ។ សាធារណជនអាចអានសៀវភៅ ទស្សនាវីដេអូ ស្តាប់សំឡេង ស្វែងរកឯកសារ និងថតចម្លងឯកសារប្រភេទណាមួយតាមរយៈការស្នើសុំទៅបណ្ណារក្ស ។ ឯកសារទាំងនេះ ជាប្រភពព័ត៌មានដ៏សំខាន់សម្រាប់ការសិក្សាស្រាវជ្រាវ និងយល់ដឹងបន្ថែមអំពីដំណើរការនីតិវិធីសំណុំរឿងនីមួយៗ របស់តុលាការខ្មែរក្រហម ។ ឯកសារទាំងអស់មានបែងចែក និងរៀបចំទៅតាមចំណាត់ថ្នាក់ ស្របតាមលក្ខខណ្ឌកំណត់របស់អ្នកជំនាញ ។

“គោលដៅធំបំផុតរបស់មជ្ឈមណ្ឌលធនធាន នៃអង្គជំនុំជម្រះវិសាមញ្ញក្នុងតុលាការកម្ពុជា គឺចង់ឱ្យប្រជាជនកម្ពុជា ពិសេសយុវជន ត្រូវស្វែងយល់ និងដឹងឱ្យកាន់តែច្បាស់ពីប្រវត្តិសាស្ត្រនៃរបបកម្ពុជាប្រជាធិបតេយ្យ និងបញ្ជៀសមិនឱ្យមានប្រវត្តិសាស្ត្រច្រំដែលបែបនេះកើតឡើងនៅក្នុងរូបភាពណាមួយឡើយ” ។ នេះបើតាមការឯកឧត្តម ក្រាញ់ តូនី ប្រធានរដ្ឋបាលស្តីទីនៃអង្គជំនុំជម្រះវិសាមញ្ញក្នុងតុលាការកម្ពុជា ។

គួរបញ្ជាក់ថា រាជរដ្ឋាភិបាលកម្ពុជា អង្គការសហប្រជាជាតិ និងសហគមន៍អន្តរជាតិ បានបន្តផ្តល់ការគាំទ្រដល់អ.វ.ត.ក. ជាពិសេសការផ្សព្វផ្សាយព័ត៌មានអំពីបណ្ណាសារនៃសំណុំរឿង និងដំណើរការជំនុំជម្រះក្តីរបស់អ.វ.ត.ក. ឱ្យបានទូលំទូលាយដល់សាធារណជន សិស្ស និស្សិត និងអ្នកស្រាវជ្រាវជាតិអន្តរជាតិតាមរយៈការបង្កើតមជ្ឈមណ្ឌលធនធាន ។

អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) គឺជាតុលាការពិសេសមួយរបស់កម្ពុជា ដែលទទួលបានការគាំទ្រពីមជ្ឈដ្ឋានអន្ដរជាតិ តាមរយៈអង្គការសហប្រជាជាតិ (UNAKRT) តុលាការនេះត្រូវបានគេស្គាល់ថាជាតុលាការខ្មែរក្រហម ឬអង្គជំនុំជម្រះកម្ពុជា ។ អង្គជំនុំជម្រះវិសាមញ្ញក្នុងតុលាការកម្ពុជា បានបង្កើតឡើងក្នុងបំណងវិនិច្ឆ័យទោសមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ និងជនទាំងឡាយដែលទទួលខុសត្រូវខ្ពស់បំផុតចំពោះឧក្រិដ្ឋកម្មដែលកើតឡើងក្នុងចន្លោះពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕