កម្មវិធីប្រកួតប្រជែងឡូហ្គោក្រោមប្រធានបទ «កម្ពុជាក្នុងបេះដូងខ្ញុំ» ត្រូវបានរៀបចំឡើងដើម្បីស្វែងរកជើងឯកក្នុងការប្រកួតប្រជែងដែលមានភាពឆ្នៃប្រឌិតខ្ពស់ ផ្ដល់អាទិភាពឱ្យអ្នករចនាគ្រប់រូបក្នុងការបង្ហាញស្នាដៃ។ នេះជាការលើកឡើងរបស់ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅក្នុងថ្ងៃវគ្គផ្ដាច់ព្រ័ត្រនៃកម្មវិធីប្រកួតប្រជែងរចនាឡូហ្កោ « កម្ពុជាបេះដូងខ្ញុំ» កាលពីថ្ងៃទី១៧ ខែសីហា ឆ្នាំ២០២៤ កន្លងទៅនេះ។

ឯកឧត្ដម ហ៊ុន ម៉ានី មានប្រសាសន៍ថា កម្មវិធីនេះរៀបចំឡើងក្នុងគោលបំណងរួមជាច្រើនសម្រាប់ជាប្រយោជន៍រួមដូចជា ផ្ដល់ជាវេទិកាសម្រាប់អ្នកទាំងអស់គ្នាក្នុងការចូលរួមបង្ហាញភាសាបេះដូងសម្រាប់កម្ពុជា ជាការផ្ដល់ឱកាសចូលរួមបង្ហាញ និងដុសខាត់ទេពកោសល្យរបស់ខ្លួន និងជាការជួបជុំប្រាស្រ័យទាក់ទងគ្នាទៅវិញទៅមករបស់បេក្ខជនទាំងអស់។ ឯកឧត្ដមបន្ថែមថា លើសពីនេះការបង្កើតកម្មវិធីនេះឡើង ក៏​ដើម្បីផ្ដល់ឱកាសដល់អ្នករចនាគ្រប់វ័យ គ្រប់កម្រិត មកពីគ្រប់ទិសទី អាចចូលរួមបញ្ចេញស្នាដៃប្រកបដោយភាពច្នៃប្រឌិតក្នុងស្នាដៃរចនាជៀសវាងការផ្ដល់អាទិភាពឱ្យអ្នករចនាជំនាញតែម្នាក់មកធ្វើការរចនាឡូហ្គោសម្រាប់យុទ្ធនាការដែលមានជាបន្តបន្ទាប់នាពេលខាងមុខ។

គួរជម្រាបថា កម្មវិធីប្រកួតប្រជែងនេះត្រូវបានរៀបចំជាដំណាក់កាលដោយរាប់ចាប់ពីតាំងពីការប្រកាសជាផ្លូវការអំពីប្រកួតប្រជែង ការរៀបចំការបណ្ដុះបណ្ដាលមូលដ្ឋានគ្រឹះនៃការរចនាពីសំណាក់គណៈកម្មាការជំនាញទៅកាន់អ្នកចូលរួមទាំងអស់ និងដំណើរការពិនិត្យ វាយតម្លៃលើរាល់ស្នាដៃដែលបានដាក់ពាក្យចូលរួមទាំងអស់ ព្រមទាំងដំណើរការពិនិត្យ​វាយតម្លៃលើរាល់ស្នាដៃពីគណៈកម្មការជំនាញយ៉ាងសុក្រិត្យ និងប្រកបដោយតម្លាភាព។

ជាមួយគ្នានេះ គណៈកម្មាការដែលបានចូលរួមពិនិត្យ វាយតម្លៃដល់បេក្ខជនមានសមាសភាពដូចជា ឯកឧត្ដម សុខ សប្បាយណា សមាជិកគណៈអចិន្ត្រៃយ៍គណៈកម្មាធិការកណ្ដាល និងប្រធាននាយកដ្ឋានអភិវឌ្ឍន៍យុវជន និងកម្មវិធី នៃសហភាពសហព័ន្ធយុវជនកម្ពុជា ដែលឯកឧត្តមផ្តោតសំខាន់លើការចែលរំលែកពីសាវតា និងគុណតម្លៃរបស់យុទ្ធនាការទៅកាន់អ្នកចូលរួមទាំងអស់។ លោក ប្រុស និច Creative Director ដែលផ្ដោតសំខាន់លើការចែករំលែកអំពីទំនើបកម្មនៃការប្រើប្រាស់ភាពជាខ្មែរមករចនាស្នាដៃរបស់ខ្លួន និង លោក ម៉ៅ អង្គារិទ្ធ សហស្ថាបនិក និងជាប្រធានគ្រប់គ្រងផ្នែកយុទ្ធសាស្ត្រ ដែលដោតសំខាន់លើការបង្កើនស្តង់ដានៃការរចនារបស់របស់សហគមន៍នៃអ្នករចនាកម្ពុជានៅលើឆាកអន្តរជាតិ។ លោក សុត សេរី សិល្បករគំនូរលើឌីជីថល ដែលផ្ដោតលើការចែករំលែកអំពីសិល្បៈដែលកើតចេញពីឬសគល់នៃសិល្បៈខ្មែរក្នុងសម័យទំនើប។

នៅទីបំផុតកម្មវិធីប្រកួតប្រជែងនេះ បានស្វែងរកឃើញជ័យលាភីលេខមួយគឺលោក វិសិដ្ឋ វិសាល ក្នុងការរចនាឡូហ្កោបានដោយជោគជ័យក្រោយឆ្លងកាត់ការប្រកួតយ៉ាងតឹងរឹង តាំងពីផ្សព្វផ្សាយដំបូង។ ជារួមកម្មវិធីនេះទទួលបានការចាប់អារម្មណ៍ពីសំណាក់សាធារណជន និងចុះឈ្មោះចូលរួមសិក្ខាសាលាបណ្ដុះបណ្ដាលចំនួន២៣៥នាក់ រហូតមានអ្នកចូលរួមចំនួន១៣០នាក់ និងទទួលបានការដាក់ពាក្យប្រកួតប្រជែងស្នាដៃពីបេក្ខជនចំនួន៦៥ រូបដែលមានការចូលរួមពីគ្រប់វ័យគ្រប់កម្រិត៕