ក្នុង​ឱកាស​ប្រគល់សញ្ញាបត្រ​ដល់និស្សិត​ជ័យលាភី ចំនួន ១៤៨៧នាក់ នៃសាកលវិទ្យាល័យ​ភូមិន្ទ​កសិកម្ម, វិទ្យាស្ថានជាតិ​កសិកម្ម​ព្រែកលៀប និង​វិទ្យាស្ថាន​ជាតិកសិកម្ម​កំពង់ចាម នាព្រឹកថ្ងៃទី១៦ កញ្ញា ឯកឧត្តម ហង់ជួន ណារ៉ុន ឧបនាយករដ្ឋមន្រ្តី តំណាង​របស់​សម្តេច​បវរធិបតី ហ៊ុន ម៉ាណែត បានផ្តល់អនុសាសន៍​ដល់​គ្រឹះស្ថាន​ឧត្តម​សិក្សា​ទាំងបីនេះ បន្ត​ជំរុញ​លើក​កម្ពស់​គុណភាពសិក្សា ឆ្ពោះទៅ​កាន់​ការ​ធ្វើកសិកម្ម​ទំនើបឌីជីថល និង​បច្ចេកវិទ្យា​សិប្បនិម្មិត (AI)។

ឯកឧត្តម ហង់ជួន ណារ៉ុន ក៏​បាន​សង្កត់ធ្ងន់ ពីការ​បង្កើន​សមត្ថភាព​សាស្រ្តាចារ្យ និងលោកគ្រូ អ្នកគ្រូ និង​ការ​បំពាក់​សម្ភារៈឧបករណ៍​ចាំបាច់ និង​ទាញយកសក្តានុពល​ឱ្យ​អស់​ពីលទ្ធភាព​ពីគម្រោង​កែលម្អ​ការ​អប់រំ​ឧត្តមសិក្សា​ទី២ (HEIP 2) ដែលជាគម្រោងវិនិយោគរបស់រាជរដ្ឋាភិបាល ដើម្បីបណ្តុះបណ្តាលនិស្សិតឱ្យឆ្លើយតបនឹងតម្រូវការទីផ្សារការងារ។

ជាមួយ​គ្នានេះ គ្រឹះស្ថានឧត្តមសិក្សាកសិកម្ម ក៏​ត្រូវ​បង្កើនការស្រាវជ្រាវ និងអនុវត្តផ្ទាល់ឱ្យបានកាន់តែច្រើនថែមទៀតសម្រាប់និស្សិត និងអភិវឌ្ឍមាតិកាស្រាវជ្រាវល្អៗលើមុខជំនាញឯកទេស ដើម្បីផ្សារភ្ជាប់ទ្រឹស្តី និង ការអនុវត្តជាក់ស្តែង និងបង្កើតជាកញ្ចប់បច្ចេកវិទ្យា និងសេវាកម្ម ដើម្បីជួយគាំទ្រ និង ផ្តល់ដំណោះស្រាយដល់កសិករ និងវិស័យឯកជន នៅក្នុងខ្សែច្រវាក់ផលិតកម្ម ចាប់តាំងពីការដាំដុះ រហូតដល់ការកែច្នៃជាផលិតផលសម្រាប់ផ្គត់ផ្គង់តម្រូវការក្នុងស្រុកការនាំចេញ។ ទន្ទឹមនេះ ត្រូវបន្តពង្រឹងកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន ដើម្បីបង្កើនឱកាសដល់និស្សិតក្នុងការចុះកម្មសិក្សា និង អនុវត្តផ្ទាល់។

ដោយឡែកសម្រាប់​និស្សិត​ជ័យលាភី ឯកឧត្តមឧបនាយករដ្ឋមន្រ្តី ក៏​បានផ្តាំផ្ញើដល់ពួកគេ​ឱ្យ​យកចំណេះដឹង និង​បច្ចេកទេស​ដែលទទួលបាន​ទៅអនុវត្ត​ក្នុងជីវិត​ការងារ​ឱ្យបានជោគជ័យ។ ឯកឧត្តមមានប្រសាសន៍ថា ការរៀនសូត្រ មិនមែនមានតែនៅសាលា ឬចប់ត្រឹមពេលទទួល សញ្ញាបត្រនោះទេ ប៉ុន្តែជាដំណើរការបន្តឥតឈប់ឈរ។ “ដូច្នេះនៅក្នុង ជីវិតការងារ ក្មួយៗនឹងត្រូវបន្តរៀនសូត្រ និងអភិវឌ្ឍសមត្ថភាពថែមទៀត ដើម្បីប្រសិទ្ធភាព ការងារ និងប្រាក់ចំណូល និងក្លាយជាពលរដ្ឋសកម្មក្នុងការរួមចំណែកជំរុញការអភិវឌ្ឍ ជាតិមាតុភូមិកម្ពុជា“៕