ថ្លែងក្នុងវេទិកាអប់រំបណ្ដុះបណ្ដាលបច្ចេកទេស និងវិជ្ជាជីវៈអាស៊ី ក្នុង​ពិព័រណ៍បរិក្ខារ​អប់រំ​ពិភពលោក​ ឆ្នាំ​២០២៥​ និង​សន្និសីទ​ឌីជីថល​ សម្រាប់​ការ​អប់រំ​នៅ​អាស៊ី​ នៅ​ប្រទេស​ចិន កាលពីពេលថ្មីៗនេះ លោកជំទាវ​បណ្ឌិត​ គឹម​ សេដ្ឋានី​ រដ្ឋលេខាធិការ​ប្រចាំ​ការ​ ក្រសួងអប់រំ​ យុវជន​ និង​កីឡា​ លើកឡើងថា ការអប់រំវិជ្ជាជីវៈ នឹងជំរុញការអភិវឌ្ឍក្នុងតំបន់ដែលបើកឱកាសកាន់តែសម្បូរបែប និងទូលំទូលាយដល់យុវជនគ្រប់រូបក្នុងតំបន់អាស៊ីឱ្យរកឃើញនូវជំនាញដែលខ្លួនស្រលាញ់ដើម្បីឈោងចាប់អនាគតដ៏ភ្លឺស្វាង និងសម្រេចក្តីស្រមៃរបស់ខ្លួន។

លោកជំទាវ​បណ្ឌិត​ គឹម​ សេដ្ឋានី មានប្រសាសន៍ថា បច្ចុប្បន្នប្រទេសក្នុងតំបន់អាស៊ី កំពុងស្ថិតក្នុងដំណាក់កាលនៃការធ្វើសមាហរណកម្មស៊ីជម្រៅ នៃបរិវត្តកម្មឧស្សាហកម្ម និងការអភិវឌ្ឍន៍វិស័យអប់រំ ហើយការអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) បានក្លាយជាកម្លាំងស្នូលសម្រាប់បណ្តាប្រទេសនានា ដើម្បីបណ្ដុះបណ្ដាលអ្នកដែលមានជំនាញ និងលើកកម្ពស់បរិវត្តកម្មសេដ្ឋកិច្ច។

តាម​រយៈ​វេទិកាអប់រំបណ្ដុះបណ្ដាលបច្ចេកទេស និងវិជ្ជាជីវៈអាស៊ី រដ្ឋលេខាធិការ​ប្រចាំ​ការ​ក្រសួងអប់រំកម្ពុជា ​ជឿជាក់យ៉ាងមុតមាំថា នឹងអាចជំរុញបណ្តាប្រទេសក្នុងតំបន់ជាច្រើន ចាប់យកឱកាសចុះកិច្ចព្រមព្រៀងអនុវត្តកិច្ចសហប្រតិបត្តិការឱ្យកាន់តែច្រើនបន្ថែមទៀតក្នុងវិស័យអប់រំវិជ្ជាជីវៈ ដើម្បីរួមគ្នាសម្រេចបានឱ្យបាននូវចក្ខុវិស័យ “ទ្វីបអាស៊ីដែលមានជំនាញ – Skilled Asia”។

បើតាម​លោកជំទាវ​ គឹម​ សេដ្ឋានី សម្រាប់កម្ពុជា ដើម្បីឆ្លើយតបនឹងចក្ខុវិស័យកម្ពុជាឆ្នាំ២០៥០ និងយុទ្ធសាស្ត្របញ្ចកោណ ក្រសួងអប់រំ យុវជន និងកីឡា និងភាគីពាក់ព័ន្ធ កំពុងប្រឹងប្រែងអស់ពីកម្លាំងកាយចិត្ត ដើម្បីកសាងប្រព័ន្ធសេដ្ឋកិច្ចដែលប្រកបដោយបរិយាបន្ន ឌីជីថល ដោយផ្អែកលើចំណេះដឹង និងជំនាញច្បាស់លាស់ ហើយការអប់រំវិជ្ជាជីវៈ គឺជាមូលដ្ឋានគ្រឹះដ៏សំខាន់ឈានទៅសម្រេចបាននូវគោលដៅនេះ។

រដ្ឋលេខាធិការ​ប្រចាំ​ការ​ក្រសួងអប់រំ លើកឡើងថា កម្ពុជានិងចិន បានកសាងមូលដ្ឋានគ្រឹះដ៏ល្អសម្រាប់កិច្ចសហប្រតិបត្តិការក្នុងវិស័យអប់រំវិជ្ជាជីវៈ ដែលក្នុងនោះរួមមាន កិច្ចសហប្រតិបត្តិការអភិវឌ្ឍសៀវភៅសិក្សា និងកម្មវិធីសិក្សា ការផ្លាស់ប្តូរគ្រូ-សិស្ស និងទិដ្ឋភាពផ្សេងទៀត, បានបណ្តុះក្រុមអ្នកមានជំនាញសម្រាប់ប្រទេសកម្ពុជា ដែលសម្របតាមតម្រូវការនៃឧស្សាហកម្មក្នុងស្រុក។ ជាមួយ​គ្នានេះ លោកជំទាវ​បណ្ឌិត​ គឹម​ សេដ្ឋានី រំពឹងទុកថា កិច្ចសហប្រតិបត្តិការលើវិស័យអប់រំវិជ្ជាជីវៈរវាងកម្ពុជា និងចិន នឹងបន្តពង្រឹង និងពង្រីកគ្រូបង្រៀន និងនិស្សិតកម្ពុជាកាន់តែច្រើនឱ្យមានឱកាសបានចូលរួមក្នុងសកម្មភាពផ្លាស់ប្តូរការអប់រំវិជ្ជាជីវៈក្នុងតំបន់ រៀនសូត្របទពិសោធកម្រិតខ្ពស់ និងពង្រីកទស្សនៈវិស័យអន្តរជាតិរបស់ពួកគេឱ្យបានកាន់តែទូលំទូលាយ។

គួរជំរាបជូនថា មូលបទស្នូល នៃវេទិកានេះគឺ “ការរួមគ្នាកសាង ទ្វីបអាស៊ីដែលមានជំនាញ ៖ ឱកាស និងបញ្ហាប្រឈមក្នុងការអប់រំបណ្ដុះបណ្ដាលបច្ចេកទេស និងវិជ្ជាជីវៈ” (Co-building a ‘Skilled Asia’: Opportunities and Challenges in Technical and Vocational Education) ដោយបានគូសរំលេចយ៉ាងច្បាស់ពីតម្រូវការរួម និងភាពចាំបាច់នៃការអភិវឌ្ឍវិស័យអប់រំវិជ្ជាជីវៈនៅតាមបណ្តាប្រទេសក្នុងតំបន់អាស៊ី៕