ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – គិតត្រឹមខែឧសភាឆ្នាំ២០២៣នេះ រយៈពេល ១៣ឆ្នាំហើយដែលអង្គការសុខភាពពិភពលោក (WHO) បានប្រារព្ធទិវាពិភពលោកលាងសម្អាតដៃ ឬទិវាលាងដៃសង្គ្រោះជីវិត ។ ទិវាអនាម័យដៃនេះ កំណត់ប្រារព្ធជារៀងរាល់ថ្ងៃទី៥ ខែឧសភា ប៉ុន្តែផ្ទុយទៅវិញអ្នកជំនាញសុខាភិបាល បានចាត់ទុកថា ទិវាអនាម័យដៃ គឺត្រូវធ្វើឡើងគ្រប់ពេល និងរាល់ពេលដែលមនុស្សមានអារម្មណ៍ថា ដៃមិនស្អាត ឬមានអាការៈថា ត្រូវលាងសម្អាតដៃ ។ នេះបើតាមការបញ្ជាក់របស់ឯកឧត្តម អ៊ឹង ភីរុន រដ្ឋលេខាធិការ ក្រសួងសុខាភិបាល នាឱកាសពិធីប្រារព្ធទិវាអនាម័យដៃកាលពីថ្ងៃទី៥ ឧសភាកន្លង ទៅនៅទីស្តីការក្រសួងសុខាភិបាល ។
ឯកឧត្តម អ៊ឹង ភីរុន រដ្ឋលេខាធិការក្រសួងសុខាភិបាល បានបន្ថែមថា
“តាមរយៈការសិក្សាជាសកល និងបទពិសោធន៍សិក្សារបស់អង្គការសុខភាពពិភពបានបង្ហាញថា ជាងពាក់កណ្តាលនៃជំងឺកើតឡើងដោយសារមនុស្សមិនបានលាងសម្អាតដៃឱ្យបានត្រឹមត្រូវ មានន័យថា ជំងឺជាងពាក់កណ្តាលយើងអាចការពារបានប្រសិនបបើបានលាងសម្អាតដៃ” ។
ទន្ទឹមគ្នានេះ អ្នកជំនាញសុខភាពសាធារណៈបានបញ្ជាក់ទៀតថា ទិវាអនាម័យដៃពិភពលោកកំពុងចូលរួមលើកទឹកចិត្តឱ្យអ្នកជំងឺ សមាជិកគ្រួសារ បុគ្គលិកសុខាភិបាល ចូលរួមចំណែកអនុវត្តអនាម័យដៃឱ្យបានល្អ។ បើតាមអង្គការសុខភាពពិភពលោកមាន អ្នកជំងឺរាប់រយលាននាក់ទូទាំងពិភពលោករងគ្រោះដោយសារឆ្លងរោគតាមរយៈការថែទាំសុខភាព ។ ជាងពាក់កណ្តាលនៃការឆ្លងរោគទាំងនោះ អាចការពារបានតាមរយៈការសម្អាតដៃឱ្យបានត្រឹមត្រូវ ។ ក្រសួងសុខាភិបាលលើកទឹកចិត្តដល់គ្រូពេទ្យទាំងសាធារណៈ និងឯកជន ឬគ្រូពេទ្យផ្តល់សេវានៅមូលដ្ឋានសុខាភិបាល ត្រូវអនាម័យដៃឱ្យបានល្អរាល់ពេលផ្តល់សេវាផ្សេងៗ ។
ឯកឧត្តម អ៊ឹង ភីរុន រដ្ឋលេខាធិការ ក្រសួងសុខាភិបាល បានបញ្ជាក់បន្តថា ៖ “ចាប់ផ្តើមចេញពីសុខាភិបាលមុនគេ ដែលជាជំហ៊ានដំបូងត្រូវអនុវត្តការលាងសម្អាតដៃ ហើយប្រជាពលរដ្ឋខ្លួនឯងក៏ត្រូវតែយល់ដឹងពីការសម្អាត និងអនាម័យដៃនេះ” ។
ស្របនឹងការលើកឡើងនេះ លោកវេជ្ជបណ្ឌិត ប៉ាស្កាល រីងវ៉េដ តំណាងមកពីអង្គការសុខភាពពិភពលោកប្រចាំកម្ពុជា បានបញ្ជាក់បន្ថែមថា ការលាងសម្អាតដៃដើរតួសំខាន់គាំទ្រដល់សុខភាពគ្រួសារទាំងមូល ព្រមទាំងសុខភាពសហគមន៍ ។
លោកវេជ្ជបណ្ឌិត ប៉ាស្កាល រីងវ៉េដ តំណាងមកពីអង្គការសុខភាពពិភពលោកប្រចាំកម្ពុជា អនាម័យដៃបានជួយដល់សុខភាពយ៉ាងច្រើន មានន័យថា នៅពេលដែលគ្រួសាររបស់យើងមានទម្លាប់លាងសម្អាតដៃជាប្រចាំ និងបានត្រឹមត្រូវ ពេលនោះហើយវានឹងជួយកាត់បន្ថយជំងឺដង្កាត់ផ្សេងៗដែលអាចឆ្លងតាមរយៈដៃ ។
លោកវេជ្ជបណ្ឌិត ប៉ាស្កាល រីងវ៉េដ តំណាងមកពីអង្គការសុខភាពពិភពលោកប្រចាំកម្ពុជា មានប្រសាសន៍ថា ៖
“ឥរិយាបថអនាម័យដៃត្រូវផ្តើមចេញពីទម្លាប់បុគ្គលម្នាក់ៗ នោះនឹងជះឥទ្ធិពលដល់ស្វាមី ភរិយា ព្រមទាំងកូននៅក្នុងគ្រួសារ និងមនុស្សជុំវិញខ្លួន! យើងអាចការពារជំងឺបានដោយងាយបំផុត” ។
សូមជម្រាបថា ទិវាពិភពលោកអនាម័យឆ្នាំនេះ បានរៀបចំឡើងដោយលើកប្រធានបទ “ពន្លឿនសកម្មភាពធ្វើអនាម័យដៃ ដើម្បីសង្គ្រោះជីវិត” ។ តាមសុខាភិបាលលាងសម្អាតដៃបានត្រឹមត្រូវ គឺត្រូវប្រើប្រាស់ទឹកស្អាត និងសាប៊ូ ព្រមទាំងអនុវត្តវិធានលាងសម្អាតឱ្យបានត្រឹមត្រូវតាមការណែនាំពីរបៀបលាងសម្អាត ៕
