ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – លើកឡើងនៅក្នុងឱកាសចូលរួមពិធីប្រកាសផែនការបណ្តុះបណ្តាល និងអភិវឌ្ឍន៍ឆ្នាំ២០២៣ របស់វិទ្យាស្ថានអភិវឌ្ឍវិស័យអប់រំ (EDI) កាលពីពេលថ្មីៗនេះ ឯកឧត្តម ជា កុកហុង ប្រធានគម្រោងមូលនិធិអភិវឌ្ឍន៍ជំនាញ (SDF) នៃក្រសួងសេដ្ឋកិច្ច និងហិរញ្ញវត្ថុ បានលើកទឹកចិត្តដល់វិស័យឯកជនក្នុងការបង្កើនសមត្ថភាពផ្នែកធនធានមនុស្សក្នុងស្ថាប័នរបស់ខ្លួន។
ឯកឧត្តម ជា កុកហុង មានប្រសាសន៍ថា ជានិន្នាការពិភពលោក ពីមួយឆ្នាំទៅមួយឆ្នាំ គឺមានការផ្លាស់ប្តូរ ហើយគួបផ្សំនឹងវិបត្តិសេដ្ឋកិច្ច ពីនេះទៅមុខ គឺនឹងមានការប្រកួតប្រជែង ដែលចាំបាច់ស្ថាប័ននីមួយៗត្រូវតែពង្រឹងជំនាញបុគ្គលិក ដែលជាយុទ្ធសាស្រ្តវែងឆ្ងាយ ក្នុងការអភិវឌ្ឍស្ថាប័ននោះទៅមុខទៀត។
ឯកឧត្តមប្រធានក៏បានលើកឡើងដែរថា រាជរដ្ឋាភិបាលមានទស្សនវិស័យច្បាស់លាស់ ក្នុងការប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតខ្ពស់នៅក្នុងឆ្នាំ២០៣០ និងជាប្រទេសដែលមានចំណូលខ្ពស់នៅក្នុងឆ្នាំ២០៥០, ហើយបើកក្រឡេកមើលក្នុងរយៈពេល៥ឆ្នាំចុងក្រោយនេះ សេដ្ឋកិច្ចកម្ពុជាហាក់មានកំណើនខ្ពស់ ដែលរុញច្រានឱ្យមានការប្រើប្រាស់សេវាដែលមានកម្រិតជំនាញខ្ពស់ជាងមុន ។ យ៉ាងណាក៏ដោយ បើតាម ឯកឧត្តម ជា កុកហុក បច្ចុប្បន្នជំនាញរបស់យើងនៅមិនទាន់ឆ្លើយតបជាមួយនឹងតម្រូវការនៅឡើយ ដូច្នេះចាំបាច់ត្រូវតែមានការបណ្តុះបណ្តាល និងអភិវឌ្ឍជំនាញ ជាពិសេសស្ថាប័នឯកជនគួរតែរៀបចំយុទ្ធសាស្រ្តច្បាស់លាស់ក្នុងការអភិវឌ្ឍសមត្ថភាពបុគ្គលិករបស់ខ្លួន។
“សេដ្ឋកិច្ចរបស់យើងចង់ជ្រៀតចូលទៅក្នុងតំបន់ អញ្ចឹងយើងត្រូវការជំនាញ… ហើយក្រុមហ៊ុនទាំងអស់ក៏ចង់ធ្វើការអភិវឌ្ឍ ដូច្នេះប្រសិនបើគ្មានកម្លាំងគាំទ្រពីកម្មករ ក៏ទៅមិនរួចដែរ…”
បើយោងតាមរបាយការណ៍អង្កេតកម្លាំងពលកម្មកម្ពុជា ដែលធ្វើឡើងដោយវិទ្យាស្ថានជាតិស្ថិតិ នៃក្រសួងផែនការ បានបង្ហាញថា កម្ពុជាមានប្រជាជនក្នុងអាយុធ្វើការប្រមាណ ១១,៥លាននាក់ ដែលស្មើនឹងប្រមាណជាង ៧៣ភាគរយ នៃប្រជាជនសរុប។ ក្នុងនោះប្រមាណ ១០,៨% នៃអ្នកមានការងារធ្វើមិនដែលបានរៀន, ប្រមាណ ៣៨,១% នៃប្រជាជនមានការងារធ្វើទាំងអស់បានបញ្ចប់បឋមសិក្សា ខណៈ ២៥,១% បានបញ្ចប់មធ្យមសិក្សាបឋមភូមិ និង ១៥,៧% បញ្ចប់មធ្យមសិក្សាទុតិយភូមិ ហើយមានតែ ៦,៦% បានបញ្ចប់សាកលវិទ្យាល័យ និង ០,៤% មានវិញ្ញាបនបត្រវិជ្ជាជីវៈ៕
