ក្រៅតែពីផ្តល់ជំនាញ​ច្បាស់លាស់ជូនដល់យុវជន កម្មវិធី​បណ្តុះបណ្តាល​ជំនាញ​វិជ្ជាជីវៈ និងបច្ចេកទេស ១,៥លាននាក់ របស់រាជរដ្ឋាភិបាល​អាណត្តិទី៧ ក៏បានផ្តល់ឱកាសដល់និយោជិត ក្នុងការ​បង្កើន​សមត្ថភាពជំនាញ ក៏​ដូចជា​អភិវឌ្ឍ​ខ្លួន​ឱ្យ​បានខ្ពស់ជាងមុន ទាំងការងារ និង​ប្រាក់ចំណូល។

លោក ព្រហ្ម វាសនា ជា​បុគ្គលិក​ធ្វើការ​នៅ​ក្រុមហ៊ុន​ឯកជន​មួយ បច្ចុប្បន្ន​លោក​កំពុង​សិក្សា​ជំនាញ​នៅ​វិទ្យាស្ថាន​ជាតិ​ពហុបច្ចេកទេស​ ផ្នែក Automation ។​ លោក​និយាយថា ការ​មក​រៀនជំនាញបន្ថែមនេះ គឺព្រោះតែលោក​ចង់បង្កើន​សមត្ថភាព​លើ​ជំនាញ​ដែលមាន​ស្រាប់ ដោយ​ធ្វើ​យ៉ាង​ណា​ឱ្យ​មានសមត្ថភាពល្អជាងមុន ដើម្បីទទួលបាន​ឱកាស​ការងារល្អ និង​ប្រាក់ចំណូល​ខ្ពស់​នៅ​ក្រុមហ៊ុន​បច្ចុប្បន្ន​ដែលលោក​កំពុង​បម្រើការ។

លោក វាសនា បន្ថែមថា ការសិក្សាជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលអាណត្តិទី៧នេះ គឺមានសារសំខាន់ណាស់សម្រាប់ពលរដ្ឋកម្ពុជា ហើយវាជាឱកាសមួយសម្រាប់ពលរដ្ឋទាំងឡាយណាដែលចង់សិក្សាជំនាញរយៈពេលខ្លី ហើយមានជំនាញមួយច្បាស់លាស់ប្រចាំជីវិត មានប្រាក់ចំណូលសមរម្យ។

ដោយឡែកលោក ឡេង វណ្ណៈ ជាបុគ្គលិក​នៃក្រុមហ៊ុនផលិតទឹកបរិសុទ្ធមួយ ហើយ​បច្ចុប្បន្ន​ក៏​កំពុង​រៀនជំនាញ Automation ក្នុងកម្មវិធីបណ្តុះបណ្តាលជំនាញវិជ្ជាជីវៈ និង​បច្ចេកទេស ១,៥លាននាក់ នៅវិទ្យាស្ថានជាតិពហុបច្ចេកទេស ក៏បានលើកឡើងដែរថា ការដែលលោក​ចូលរៀន​ជំនាញបន្ថែមទៀត ក៏​ព្រោះតែ​ចង់អភិវឌ្ឍសមត្ថភាព​ឱ្យ​ល្អជាងមុន។

“ខ្ញុំសម្រេចចិត្តមកសិក្សាជំនាញបន្ថែមនេះ ពីព្រោះខ្ញុំចង់អភិវឌ្ឃន៍សមត្ថភាពឱ្យល្អជាងមុន…ដើម្បីជាឱកាសក្នុងការចាប់យកអត្ថប្រយោជន៍ផ្សេងៗបន្ថែមទៀតពីក្រុមហ៊ុនបច្ចុប្បន្ន”

លោក ឡេង វណ្ណៈ

សូមបញ្ជាក់ថា រាជរដ្ឋាភិបាលកម្ពុជាអាណត្តិទី៧ បានដាក់ចេញកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស១,៥ លាននាក់ទៅដល់យុវជនមកពីគ្រួសារក្រីក្រ និងងាយរងហានិភ័យ ក្នុងនោះដែរកម្មវិធីនេះ ក៏ត្រូវបានអនុញ្ញាតឱ្យពលរដ្ឋទាំងឡាយណាដែលមានការងារធ្វើក៏មានឱកាសមកសិក្សាជំនាញបន្ថែមទៀត (Re-Skill, Up-Skill) ពីលើការងារបច្ចុប្បន្នដោយឥតគិតថ្លៃ៕