ថ្ងៃស្អែកនេះ គឺជាថ្ងៃនៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប, បេក្ខជនមួយចំនួនប្រហែលជា​កំពុង​មានអារម្មណ៍ភ័យខ្លះៗ ប៉ុន្តែក៏សប្បាយចិត្ត ព្រោះបានបញ្ចេញសមត្ថភាពក្នុងការប្រឡងរយៈពេល២ថ្ងៃ ខណៈខំប្រឹងរៀនអស់ជាង១២ឆ្នាំ។ លោក សាន គីមស័ង ជាអតីតសិស្សនិទ្ទេស A អតីតសិស្សពូកែគណិតវិទ្យាទូទាំងប្រទេសឆ្នាំ២០១៩ បានចែករំលែកគន្លឹះត្រៀមខ្លួនមួយថ្ងៃមុនប្រឡងបាក់ឌុប ក៏ដូចជាជួយឱ្យបេក្ខជនកាត់បន្ថយអារម្មណ៍ភ័យខ្លាចពេលការប្រឡងមកដល់។

ជាបទពិសោធន៍របស់លោក សាន គីមស័ង មួយថ្ងៃមុនប្រឡងបាក់ឌុប គឺបេក្ខជនត្រូវរំលឹកមេរៀនឡើងវិញត្រង់ចំណុចសំខាន់ៗ អង្គុយមើលលំហាត់ ឬវិញ្ញាសាធ្លាប់រៀនឡើងវិញ ហើយមើលទៅលើមុខវិជ្ជាដែលត្រូវប្រឡងមុនគេ។ លើស​ពីនេះ ត្រូវថែទាំសុខភាព ញ៉ាំអាហារឱ្យបានល្អ និងទៀងពេល ​កុំញ៉ាំពេលយប់ជ្រៅពេក កុំញ៉ាំហឹរ កុំញ៉ាំអាហារផ្អាប់ ឬកុំញ៉ាំម្ជូរជាដើម ដែលអាចមានបញ្ហាសុខភាព ជាពិសេស ហាមសេពគ្រឿងស្រវឹង ព្រោះអាចប៉ះពាល់ដល់ដំណើរការប្រឡង។

អតីតសិស្សនិទ្ទេស A ឆ្នាំ២០១៩រូបនេះ បន្ថែមថា ដើម្បីកុំឱ្យភ័យពេលប្រឡង បេក្ខជនអាចអនុវត្តការធ្វើសមាធិ ដោយការដកដង្ហើមចេញចូល មុនការប្រឡង ១០ ទៅ១៥នាទី, អាចអង្គុយនៅបន្ទប់ប្រឡង ហើយបិទភ្នែក រួចយកអារម្មណ៍របស់យើងមកផ្ដោតលើការដកដង្ហើមចេញចូល។ គីមស័ង បន្តថា ការដកដង្ហើមចេញចូល ជាលក្ខណៈធម្មជាតិរបស់មនុស្សដែលខ្វះមិនបាន ប៉ុន្តែមនុស្សភាគច្រើនមិនសូវខ្វល់ ប៉ុន្តែដើម្បីកាត់បន្ថយការភ័យ និងជួយឱ្យស្មារតីល្អប្រសើរ យើងអាចអនុវត្តវិធីសមាធិនេះបាន។ លើសពីនេះ​ ផ្ដោតអារម្មណ៍លើលំហាត់ ដែលចេះជាងលំហាត់ដែលអត់ចេះ។

“ប្រសិនបើអារម្មណ៍របស់យើងខ្វល់ខ្វាយ ឬក៏ភ័យលើលំហាត់ដែលយើងអត់ចេះ ខ្លាចបាត់ពិន្ទុ គឺនឹងធ្វើឱ្យយើងភ័យ ប៉ុន្តែបើយើងផ្ដោតលើលំហាត់ដែលចេះ អាចធ្វើបាន នោះនឹងធ្វើឱ្យអារម្មណ៍ល្អជាងមុន និងមានទំនុកចិត្តជាងមុន”

លោក សាន គីមស័ង បន្ថែមទៀតថា នៅពេលប្រឡងយូរម៉ោង ជាធម្មតាត្រូវការទៅបន្ទប់ទឹក ប្រសិនយើងត្រូវការបន្ទោរបង់ផ្សេងៗក្នុងអំឡុងពេលប្រឡង ដោយមិនលើកទឹកចិត្តឱ្យអង្គុយទ្រាំនោះទេ។ ហើយពេលដើរទៅបន្ទប់ទឹក យើងអាចសម្លឹងមើលទេសភាពខ្លះ ដើម្បីជួយឱ្យអារម្មណ៍ស្រស់ស្រាយជាងពេលអង្គុយប្រឡង ហើយក៏អាចជួយឱ្យយើងមានការផ្ដោតអារម្មណ៍ប្រឡងបានល្អ ពេលត្រឡប់មកពីបន្ទប់ទឹកវិញ។ ជាក់ស្ដែង មានកូនសិស្សប្រឡងខ្លះមិនហ៊ានទៅបន្ទប់ទឹកទេ ព្រោះខ្លាចខាតម៉ោង ប៉ុន្តែការខាតម៉ោងជារឿងមួយ ចំណែកការខាតអារម្មណ៍ ខាតកម្លាំងជារឿងមួយផ្សេងទៀត។ បើយើងមានអារម្មណ៍ល្អ គិតបានលឿន គឺចំណេញជាងពេលវេលាដែលយើងខាតសម្រាប់ទៅបន្ទប់ទឹកទៅទៀត។

អតីតសិស្សនិទ្ទេស A ឆ្នាំ២០១៩ ក៏បានប្រាប់​ដល់បេក្ខជនទាំងអស់តែត្រូវព្យាយាមឱ្យអស់ពីសមត្ថភាព ខិតខំធ្វើឱ្យបានល្អ កុំឱ្យមានវិប្បដិសារីទៅថ្ងៃក្រោយ និងជូនពរទទួលបាននិទ្ទេសដែលខ្លួនប៉ងប្រាថ្នា៕