ទិវាជាតិអាហារូបត្ថម្ភលើកទី១០ បានប្រព្រឹត្តទៅនាព្រឹកថ្ងៃចន្ទដើមសប្តាហ៍នេះ ក្រោមប្រធានបទ “ការពង្រឹងប្រព័ន្ធស្បៀងអាហារក្នុងបរិបទនៃការប្រែប្រួលអាកាសធាតុ” នៅសណ្ឋាគារ រ៉ាហ្វាល ឡឺរ៉ូយ៉ាល់ ភ្នំពេញ ។ ភាគីពាក់ព័ន្ធដែលបានចូលរួមក្នុងទិវាជាតិនេះ បានលើកឡើងពីបញ្ហាប្រឈមនានាបណ្តាលមកពីការប្រែប្រួលអាកាសធាតុ កំពុងជះឥទ្ធិពលអវិជ្ជមានដល់សកម្មភាពលើកកម្ពស់ប្រព័ន្ធស្បៀង ។ ការប្រែប្រួលអាកាសធាតុជាសកលកំពុងប៉ះពាល់ដល់ការងារកសិកម្ម និងផលិតកម្មស្បៀង ហើយបញ្ហានេះមានទំនាក់ទំនងយ៉ាងជិតស្និទ្ធទៅនឹងសុខភាព និងការលូតលាស់សុខភាពរបស់កុមារនិងស្ត្រី ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៏វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិមួយផលិតផលមួយ មានប្រសាសន៍ថា ការពង្រឹងប្រព័ន្ធស្បៀងក្នុងបរិបទនៃការប្រែប្រួលអាកាសធាតុទាមទារឱ្យមានការសហការ ការសម្របសម្រួល និងការវិនិយោគទៅលើវិស័យកសិកម្មឆ្ពោះទៅរកការអភិវឌ្ឍប៉ៃតង គិតដល់គុណភាពនៃធនធានទឹក កិច្ចគាំពារសង្គម សុខាភិបាល និងវិស័យពាក់ព័ន្ធដទៃទៀត ។

ទន្ទឹមគ្នានេះ ឯកឧត្តមបណ្ឌិតសភាចារ្យ បានបញ្ជាក់បន្ថែមថា ការប្រែប្រួលអាកាសធាតុមានឥទ្ធិពលដល់ប្រព័ន្វស្បៀងយ៉ាងខ្លាំង ជាក់ស្តែងដូចជាការផលិតស្បៀង ការកែច្នៃស្បៀង ការដឹកជញ្ជូនស្បៀងជាដើម ។ រាជរដ្ឋាភិបាលកម្ពុជាមានផែនទីបង្ហាញផ្លូវស្តីពីប្រព័ន្ធស្បៀងសម្រាប់ការអភិវឌ្ឍប្រកបដោយចីរភាពនៅកម្ពុជាឆ្នាំ២០៣០ ដែលមានចក្ខុវិស័យឆ្ពោះទៅពង្រឹងប្រព័ន្ធស្បៀងមួយឱ្យកាន់តែមានភាពរឹងមាំ ឆ្លាតវៃ ភាពធន់ បរិយាបន្ន ផ្តល់របបអាហារសុខភាព និងអាហារូបត្ថម្ភ ។

បញ្ហាប្រព័ន្ធស្បៀង និងការប្រែប្រួលអាកាសធាតុជាបញ្ហាសកល ។ បញ្ហាប្រព័ន្ធស្បៀង និងការប្រែប្រួលអាកាសធាតុ គឺជាបញ្ហាធំៗពីរដែលអង្គការសហប្រជាជាតិកំពុងយកចិត្តទុកដាក់ដោះស្រាយ ដើម្បីឱ្យមនុស្សគ្រប់រូបទទួលបានសន្តិសុខស្បៀង អាហារូបត្ថម្ភ របបអាហារសុខភាព ការការពារបរិស្ថាន និងជំរុញឱ្យប្រព័ន្ធស្បៀងឆ្ពោះទៅរកការអភិវឌ្ឍបៃតង ។ ការលើកកម្ពស់ប្រព័ន្ធស្បៀងតាមរយៈការបង្កើនការផលិត ការកែច្នៃ ការវេចខ្ចប់ ការដឹកជញ្ជូន សកម្មភាពយកស្បៀងទៅប្រើប្រាស់ និងការគ្រប់គ្រងកាកសំណល់ស្បៀងអាហារ បណ្ដាលឱ្យមានកំណើននៃការបំភាយឧស្ម័នផ្ទះកញ្ចក់ធ្វើឱ្យប៉ះពាល់ដល់បរិស្ថាន និងរួមចំណែកឱ្យមានការប្រែប្រួលអាកាសធាតុ ។

ចំណែកឯការប្រែប្រួលអាកាសធាតុនឹងបណ្ដាលឱ្យមានគ្រោះធម្មជាតិ ដូចជា គ្រោះទឹកជំនន់ គ្រោះរាំងស្ងួត ខ្យល់ព្យុះ និងរលកកម្ដៅដែលបង្កឱ្យមានការខាតបង់យ៉ាងធ្ងន់ធ្ងរដល់វិស័យកសិកម្ម ជីវៈចម្រុះ ប្រព័ន្ធអេកូឡូស៊ី ប្រព័ន្ធធារាសាស្ត្រ ដីស្រែចម្ការ ស្ពាន ថ្នល់ សាលារៀន មន្ទីរពេទ្យ ផ្ទះសម្បែង ទ្រព្យសម្បត្តិ និងប៉ះពាល់ដល់សុខភាពសន្តិសុខស្បៀងអាហារូបត្ថម្ភ និងជីវភាពរស់នៅរបស់ប្រជាពលរដ្ឋជាពិសេសស្ត្រីនិងកុមារ ។

លោកស្រី Claire Conan នាយិកាកម្មវិធីស្បៀងអាហារពិភពលោក និងជាតំណាងអង្គការសហប្រជាជាតិនៃចលនាបង្កើនអាហារូបត្ថម្ភនៅកម្ពុជា មានប្រសាសន៍ថា ការប្រែប្រួលអាកាសធាតុ គឺជាការព្រួយបារម្ភជាសកល ។ ការប្រែប្រួលអាកាសធាតុនាំឱ្យមានការកាប់បំផ្លាញព្រៃឈើ ការបាត់បង់ជីវៈចម្រុះ ការបំពុល ការកើតឡើងសីតុណ្ហភាព ការប្រែប្រួលរបបទឹកភ្លៀង និងគ្រោះមហន្តរាយផ្សេងៗ ដែលបង្កឡើងដោយសារអាកាសធាតុញឹកញាប់ ដែលជះឥទ្ធិពលដល់ផលិតកម្មស្បៀងអាហារជាសកល ។

ជាមួយគ្នានេះ វិបាកយ៉ាងធ្ងន់ធ្ងរបណ្តាលមកពីការប្រែប្រួលអាកាសធាតុ អាចនាំឱ្យមានការកើនឡើងតម្លៃ និងកង្វះខាតស្បៀងអាហារ ហើយប្រជាជនភាគច្រើនលាននាក់មិនមានស្បៀងអាហារ និងមិនមានលទ្ធភាពទិញស្បៀងអាហារ ។ លើសពីនេះហានិភ័យនៃជំងឺបានបង្កឡើងដោយការប្រែប្រួលអាកាសធាតុបណ្តាលឱ្យផលប៉ះពាល់យ៉ាងខ្លាំងដល់សុខភាព និងសុខមាលភាពរបស់ប្រជាជន ។

គួរបញ្ជាក់ថា ទិវាជាតិអាហារូបត្ថម្ភលើកទី១០ បានប្រារព្ធឡើងក្រោមប្រធានបទការពង្រឹងប្រព័ន្ធស្បៀងអាហារក្នុងបរិបទនៃការប្រែប្រួលអាកាសធាតុ មានគោលបំណងផ្សព្វផ្សាយអប់រំ និងលើកកម្ពស់ការយល់ដឹងជាសាធារណៈឱ្យបានទូលំទូលាយអំពីសារៈសំខាន់នៃវិស័យសន្តិសុខស្បៀង និងអាហារូបត្ថម្ភក្នុងការចូលរួមចំណែកអភិវឌ្ឍន៍មូលធនមនុស្ស បង្កើនប្រសិទ្ធភាពការងារ ជំរុញកំណើនសេដ្ឋកិច្ច និងវឌ្ឍនភាពសង្គម ៕