ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានរៀបចំប្រារព្ធទិវាសប្ដាហ៍ប័ណ្ណសារអន្ដរជាតិឆ្នាំ២០២៥ ក្រោមប្រធានបទ “ប័ណ្ណសារអាចចូលប្រើប្រាស់បាន–ប័ណ្ណសារសម្រាប់អ្នករាល់គ្នា” រយៈពេល៥ថ្ងៃ ចាប់ពីថ្ងៃទី៩ ដល់ថ្ងៃទី១៣ ខែមិថុនា ឆ្នាំ២០២៥ នៅមជ្ឈមណ្ឌលធនធាន អ.វ.ត.ក. ដោយអនុញ្ញាតឱ្យសាធារណជនស្វែងយល់អំពីតួនាទីដ៏សកម្មរបស់ប័ណ្ណសារក្នុងប្រព័ន្ធយុត្តិធម៌ និងចំណេះដឹងសមូហភាព។
លោក ពាង តុលា មន្ត្រីប័ណ្ណសារ និងកំណត់ត្រា មានប្រសាសន៍ថា អ.វ.ត.ក. ប្រារព្ធទិវាសប្ដាហ៍ប័ណ្ណសារអន្តរជាតិ ឆ្នាំ២០២៥ ក្នុងគោលបំណងលើកកម្ពស់ការយល់ដឹងជាធារណៈអំពីសារៈសំខាន់ តម្លៃ និងភាពចាំបាច់ក្នុងការថែរក្សាប័ណ្ណសារ និងផ្សព្វផ្សាយអំពីយុត្តិធម៌ តម្លាភាព គណនយ្យភាព ការពិត និងការចងចាំប្រវត្តិសាស្ត្រ នៃប្រទេសកម្ពុជា អំពីការងារ និងការចូលទៅប្រើប្រាស់ប័ណ្ណសារទាំងអស់នេះ។
លោក ពាង តុលា បន្ថែមថា ខណៈពេលដែល អ.វ.ត.ក. បាននិងកំពុងបន្តការអនុវត្តកិច្ចការដែលនៅសេសសល់របស់ខ្លួន ប័ណ្ណសារទាំងអស់នេះ កាន់តែមានសារៈសំខាន់ទ្វេឡើង ព្រោះវាជាកំណត់ត្រាដែលបង្ហាញអំពីកិច្ចខិតខំប្រឹងប្រែងរបស់កម្ពុជាក្នុងការស្វែងរកយុត្តិធម៌ បង្រួបបង្រួម និងការផ្សះផ្សារជាតិបន្ទាប់ពីរបបខ្មែរក្រហមត្រូវបានផ្ដួលរំលំ។
មន្ត្រីប័ណ្ណសារ និងកំណត់ត្រា រូបនេះ បញ្ជាក់ថា ប័ណ្ណសារ គឺជាកំណត់ត្រាមានសារៈសំខាន់ណាស់សម្រាប់សាធារណៈជន ដើម្បីស្វែងយល់អំពីការពិត នៃអតីតកាល។ វាជាភស្តុតាងដ៏មានសក្តានុពល លាតត្រដាងអំពីការពិតអ្វីមួយដែលបានកើតឡើង ប្រើប្រាស់ក្នុងការស្វែងរកយុត្តិធម៌ បង្រួបបង្រួម និងការផ្សះផ្សាជាតិ និងជាអ្វីមួយដែលសង្គមជ្រើសរើសដើម្បីធ្វើការចងចាំ និងរៀនសូត្រអំពីប្រវត្តិសាស្ត្ររបស់ខ្លួន។
«អតីតកាល គឺជាអ្វីមួយរបស់យើង ដែលយើងត្រូវប្រឈមរៀនសូត្រ និងស្វែងយល់។ ប័ណ្ណសារអាចឱ្យអ្នកយល់ដឹងអំពីវា ហើយការយល់ដឹងអំពីវានឹងអាចធ្វើឱ្យអ្នកមានអំណាចក្នុងការសម្រួចអនាគតរបស់អ្នក។ ប័ណ្ណសារជាកំណត់ត្រារស់ ដែលបានកត់ត្រារឿងរ៉ាវជាច្រើនរួមមាន ការតស៊ូ ការឈឺចាប់ ការរស់រាន ការស្វែងរកយុត្តិធម៌ និងការផ្សះផ្សារ»
មន្ត្រីប័ណ្ណសារ និងកំណត់ត្រា បញ្ជាក់បន្ថែមថា សម្រាប់យុវជន ការយល់ដឹងអំពីប័ណ្ណសារអាចនឹងជួយពួកគេក្នុងការផ្សារភ្ជាប់ខ្លួនជាមួយនឹង អតីតកាលកម្ពុជា គិតវិភាគ និងរួមចំណែកក្នុងការកសាងសង្គមឱ្យកាន់តែប្រសើរឡើង ដែលពោរពេញដោយយុត្តិធម៌ និងសន្តិភាព។ តាមរយៈការរុករកប័ណ្ណសារ យុវជននឹងទទួលបានការយល់ដឹងអំពីរបៀបដែលឯកសារគាំទ្រដល់ដំណើរការស្វែងរកយុត្តិធម៌ ការពារសិទ្ធិមនុស្ស ការពារការបដិសេធប្រវត្តិសាស្រ្ត និងការពារនូវការត្រឡប់មកវិញនូវរបបប្រល័យពូជសាសន៍។
គួរជំរាបជូនថា ចំណុចសំខាន់ៗនៃប័ណ្ណសារ អ.វ.ត.ក. មានឯកសារសំណុំរឿងទាំងអស់ជាង ២៣២.០០០ ឯកសារ (២,៥ លានទំព័រ) នៅក្នុងប័ណ្ណសារតុលាការ, សាលក្រម សាលដីកា និងសេចក្តីសម្រេចរបស់តុលាការ ជាង ១.៣៦០, ឯកសារប្រតិចារឹកសវនាការ ៦៧០, ឯកសារជាភស្តុតាង រាប់ម៉ឺនឯកសារ, មាន ៣ ភាសា (ខ្មែរ អង់គ្លេស បារាំង), ខ្សែអាត់សម្លេង និងវីដេអូសវនាការ ជាង ១១.០០០ ម៉ោង និងកំណត់ត្រាមិនមែនជាឯកសារតុលាការ រាប់ពាន់ឯកសារទៀត៕
