ភ្នំពេញ – «ខ្ញុំគាំទ្រការប្រើប្រាស់ពាក្យពេចន៍ ឃ្លាឃ្លោង សំណេរ វោហារស័ព្ទ សូរសៀងប្រកបដោយគុណធម៌ និងសីលធម៌បញ្ជាក់ពីប្រទេសកម្ពុជាដែលមានអារិយ្យធម៌រុងរឿងនៅក្នុងតំបន់អាស៊ីអាគ្នេយ៍ ក៏ដូចជានៅលើឆាកអន្តរជាតិផងដែរ។ ដូចសុភាសិតខ្មែរលើកឡើងថា សម្ដីសជាតិ មារយាទសពូជ គឺជាតិរបស់យើងជាជាតិសាងអង្គរថ្កុំថ្កើងរុងរឿង ដោយយើងត្រូវបង្ហាញពេលនេះ ឱ្យសមស្របនឹងអ្វីដែលយើងបានរុងរឿងតាំងពីបុរាណកាលរហូតមកដល់បច្ចុប្បន្ននេះ គឺយើងនៅតែជាជាតិច្បងដូចចម្រៀងដែលច្រៀងនៅក្នុងបទពង្សាវតាខ្មែរ»។ នេះជាប្រសាសន៍​លើក​ឡើង​របស់​លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា ។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា មានប្រសាសន៍ថា ខណៈកម្ពុជាកំពុងរៀបចំការប្រកួតកីឡាស៊ីហ្គេមលើកទី៣២ គៀកដល់ពេលវេលាបិទបញ្ចប់ ដែលយើងធ្វើបានជោគជ័យនឹកស្មានមិនដល់ យើងមិនគួរប្រើប្រាស់ពាក្យពេចន៍មិនសមរម្យចំពោះគ្នាទេ កុំថាឡើយតែភ្ញៀវអន្តរជាតិ គឺចំពោះកីឡាករ កីឡាការិនី ចំពោះភ្ញៀវជាតិ និងអន្តរជាតិដែលបានអញ្ជើញចូលរួមក្នុងព្រឹត្តិការណ៍ស៊ីហ្គេម ឬអញ្ជើញមកទស្សនាក្នុងប្រទេសកម្ពុជា គឺយើងត្រូវប្រកាន់ពាក្យពេចន៍ សំណេរប្រកបដោយឃ្លាឃ្លោងសីលធម៌ គុណធម៌ ដើម្បីបង្ហាញពីឥរិយាបទពង្សាវតាខ្មែររបស់យើងដែលល្អពីមុនមកហើយបន្តភាពល្អបន្ថែមតទៀត។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា

“ ប្រសិនបើយើងប្រើប្រាស់ពាក្យសម្ដីសមរម្យល្អ រួសរាយរាក់ទាក់ នឹងធ្វើឱ្យគេពាំនាំស្នាមញញឹមរបស់ប្រជាជនយើង ទឹកដមនៃការទទួលភ្ញៀវរបស់យើង នាំឱ្យគេចង់មកទស្សនាប្រទេសយើងបន្តទៀត ក៏ដូចជាការមកវិនិយោគជាដើម”

អគ្គលេខាធិការ នៃរាជបណ្ឌិតសភាកម្ពុជា បញ្ជាក់បន្ថែមថា ការដែលយើងបង្ហាញឥរិយាបទមិនល្អ និងពាក្យសម្ដីមិនសមរម្យធ្វើឱ្យបរទេសគេចងចាំរូបភាពប្រទេសយើងអាក្រក់ទៅវិញ។ ទន្ទឹមគ្នានេះ សូមឱ្យការប្រើប្រាស់ឥរិយាបទល្អ ពាក្យពេចន៍ល្អដែលធ្វើឱ្យគេចងចាំក្នុងដួងចិត្តនូវស្នាមញញឹម និងភាពរួសរាយរាក់ទាក់របស់ប្រជាជនខ្មែរក៏ដូចជាការខិតខំប្រឹងប្រែងរបស់រាជរដ្ឋាភិបាលកម្ពុជាត្រឡប់ទៅប្រទេសគេវិញដែលនេះជាផលចំណេញយូរអង្វែងសម្រាប់អនាគត ។

លោកបណ្ឌិត យង់ ពៅ ក៏បានសំណូមពរដល់ប្រជាពលរដ្ឋ និងអ្នកគាំទ្រកីឡាទាំងអស់ សូមប្រកាន់នូវឥរិយាបទថ្លៃថ្នូរ ពាក្យពេចន៍ ពីរោះពិសា ដើម្បីបង្ហាញពូជពង្សអង្គរ ពូចពង្សថ្លៃថ្នូររបស់យើងដល់ប្រជាជាតិទាំងឡាយដែលបានចូលរួម ក៏ដូចជាការបង្ហាញដល់ពិភពលោកផងដែរ។ ទន្ទឹមគ្នានេះ រាជរដ្ឋាភិបាល ក៏ដូចជាប្រជាពលរដ្ឋរបស់យើងបានចូលរួមទាំងអស់គ្នា ដើម្បីបង្ហាញនូវបេះដូងដ៏ទូលាយរបស់កម្ពុជា ស្នាមញញឹមដ៏រួសរាយដូចស្នាមញញឹមបាយ័នជាដើម៕