ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នេះជាប្រវត្តិសាស្ត្រថ្មីមួយសម្រាប់កីឡាការិនី ប៉ា ឆរស្មី និងសម្រាប់កម្ពុជាដែលមានកីឡាករយកមេដាយ ៦គ្រឿងតែម្នាក់ឯកជូនជាតិនៅក្នុងព្រឹត្តិការណ៍ប្រកួតកីឡាអាស៊ីអាគ្នយ៍ (Sea Games 2023) ដែលកម្ពុជាធ្វើជាម្ចាស់ផ្ទះរៀបចំការប្រកួត ។ មេដាយដែលកីឡាការិនី ប៉ា ឆរស្មី យកបានពីការប្រកួតកីឡាវ៉ូវីណាម រួមមាន មេដាយមាស ៤គ្រឿង មេដាយប្រាក់មួយគ្រឿង និងមេដាយសំរឹទ្ធមួយគ្រឿង ។
កីឡាការិនី ប៉ា ឆរស្មី បាននិយាយថា លទ្ធផលប្រកួតបានមេដាយ ៦គ្រឿងនេះកើតឡើងលើសពីការរំពឹងទុកបន្ទាប់ពីប្រកួតលើវិញ្ញាសាផ្សេងៗយ៉ាងជាលក្ខណៈក្រុម និងលក្ខណៈឯកត្តជន ។ មេដាយមាសទី១ បានលើវិញ្ញាសានារី ៣នាក់ និងបុរស ៣នាក់លើបច្ចេកទេសការពារខ្លួនមូលដ្ឋានគ្រឹះ, មេដាយមាសទី២ បានលើវិញ្ញាសារដាវក្រុមនារី ៤នាក់, មេដាយមាសទី៣ បានលើវិញ្ញាសាកាំបិតធំឯកត្តជននារី, និងមេដាយមាសទី៤ បានលើវិញ្ញាសារកាំបិតភ្លោះឯកត្តជននារី ។
កីឡាការិនី ប៉ា ឆរស្មី បានបញ្ជាក់បន្ថែមថា
“ស៊ីហ្គេមនៅកម្ពុជាពិតជាអស្ចារ្យសម្រាប់ខ្ញុំជាអត្តពលិក អរគុណសម្តេចតេជោនាយករដ្ឋមន្ត្រី ហើយព្រោះតែវិស័យកីឡាថ្ងៃនេះធ្វើឱ្យខ្មែរមានមុខមាត់លើឆាកអន្តរជាតិ និងអរគុណដល់បងប្អូនប្រជាជនកម្ពុជាដែលបានចូលរួមគាំទ្រលើសពីអ្វីដែលខ្ញុំរំពឹងទុក”
សូមជម្រាបថា កន្លងទៅកីឡាការិនី ប៉ា ឆរស្មី អាយុ ៣៧ឆ្នាំ បានចូលរួមប្រកួតកីឡាវ៉ូវីណាមនៅក្នុងព្រឹត្តិការណ៍កីឡាអាស៊ីអាគ្នេយ៍ ឬស៊ីហ្គេមចំនួន ៣លើករួមមកហើយរាប់នៅទាំងកម្ពុជា ។ បន្ទាប់ពីទទួលបានជោគជ័យមេដាយមាសលើកទី៣នេះ កីឡាការិនី ប៉ា ឆរស្មី កំពុងត្រៀមខ្លួននិងហ្វឹកហាត់ដើម្បីចូលរួមប្រកួតជើងឯកពិភពលោកនៅខែវិច្ឆិកាខាងមុខ ដែលនឹងប្រព្រឹត្តិទៅនៅប្រទេសវៀតណាម ។ ទន្ទឹមទេពកោសល្យនិងសមត្ថភាពកីឡាវ៉ូវីណាម កីឡាយូដូ និងកីឡាតៃក្វាន់ដូ កីឡាការិនី ប៉ា ឆរស្មី ក៏កំពុងបង្ហាត់វឹកយុវជនកម្ពុជាពីប្រភេទកីឡារ៉ូវីណាមនេះផងដែរ ៕
