ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងវេទិការគ្រូបង្រៀនលើកទី៦ កាលពីថ្ងៃទី២៧ ខែឧសភា ឆ្នាំ២០២៣ លោក គង់ សំនៀង ប្រធាននាយកប្រតិបត្តិការនៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានលើកឡើងថា ការបង្រៀនភាសាអង់គ្លេសត្រូវផ្សារភ្ជាប់ជាមួយចំណេះដឹងផ្នែកបច្ចេកវិទ្យា និងជំនាញក្នុងសតវត្សទី២១ ដើម្បីជំរុញសិស្សានុសិស្សឱ្យក្លាយជាធនធានមនុស្សក្នុងយុគសម័យឌីជីថល។
បើតាមការបញ្ជាក់របស់លោក គង់ សំនៀង បច្ចុប្បន្នពិភពលោកមានការប្រែប្រួល ហើយការបង្រៀនក្នុងសតវត្សទី២១នេះ ក៏មានការផ្លាស់ប្តូរយ៉ាងលឿនផងដែរ ជាមួយនឹងការប្រើប្រាស់បច្ចេកវិទ្យាក្នុងការរៀន និងបង្រៀន ហើយសិស្សានុសិស្សចាំបាច់ណាស់ត្រូវតែមានការយល់ដឹងមិនត្រឹមតែភាសាអង់គ្លេសតែប៉ុណ្ណោះទេ គឺពួកគេត្រូវតែមានចំណេះដឹងផ្នែកបច្ចេកវិទ្យា និងជំនាញសំខាន់ៗជាច្រើនទៀតដូចជា ជំនាញក្នុងការដោះស្រាយបញ្ហា ជំនាញក្នុងការធ្វើការសម្រេចចិត្ត ជំនាញក្នុងទំនាក់ទំនង និងជំនាញធ្វើការងារជាក្រុមជាដើម។
លោកបានសង្កត់ធ្ងន់ថា រាល់ការបង្រៀនត្រូវបញ្ជ្រាបជំនាញទាំងអស់ដល់សិស្សានុសិស្ស ហើយបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បាននិងកំពុងធ្វើរឿងទាំងអស់នេះដោយយកចិត្តដាក់បំផុត ដូច្នេះហើយទើបលើកយកប្រធានបទ វិធីសាស្ត្របែបទំនើបសម្រាប់ការបង្រៀនក្នុងសតវត្សទី២១និងការអនុវត្តប្រកបដោយប្រសិទ្ធភាពក្នុងការបង្រៀនភាសាអង់គ្លេស។
ដើម្បីពង្រឹងចំណេះ និងជំនាញឱ្យកាន់តែល្អប្រសើរបន្ថែមទៀតនោះ លោក គង់ សំនៀង បានក្រើនរំលឹកដល់គ្រូបង្រៀនទាំងអស់ត្រូវអភិវឌ្ឍខ្លួនដោយផ្អែកលើកត្តាពីរយ៉ាង ៖ ទី១ គឺឆ្លុះបញ្ចាំងលើខ្លួនឯងនិងប្រៀបធៀបជាមួយអ្នកដទៃ និងទី២ គឺក្រឡេកមើលថា តើក្នុងនាមជាអ្នកអប់រំអាចរៀនសូត្រយល់ដឹងពីអ្វីខ្លះពីពិភពខាងក្រៅ ដើម្បីជាប្រយោជន៍ក្នុងការយកមកអនុវត្តក្នុងអាជីពជាគ្រូបង្រៀន និងជួយជំរុញឱ្យសិស្សានុសិស្សទទួលបាននូវគុណភាពពេញលេញ។
សូមជម្រាបថា វេទិការគ្រូបង្រៀនខាងលើនេះ កាលពីថ្ងៃទី២៧ ខែឧសភា ឆ្នាំ២០២៣ នៅសាលារៀនវ៉េស្ទឡាញន៍ សាខាចំការដូង ដោយមានការចូលរួមពីថ្នាក់ដឹកនាំ និងគ្រូបង្រៀនភាសាអង់គ្លេសកម្មវិធីមត្តេយ្យ កម្មវិធីភាសាអង់គ្លេសសម្រាប់កុមារ កម្មវិធីភាសាអង់គ្លេសសិស្សធំ កម្មវិធីភាសាចិន ចំនួន២២០នាក់ រួមទាំងគ្រូជនជាតិខ្មែរ និងជនជាតិបរទេសមកពីសាលារៀនវ៉េស្ទឡាញន៍ និងសាលារៀនណត្សឡាញន៍គ្រប់សាខា។ វេទិការនេះរៀបចំឡើងជារៀងរាល់ឆ្នាំ ក្នុងគោលបំណងចែករំលែកនូវគំនិត និងបទពិសោធន៍ក្នុងការបង្រៀនភាសាអង់គ្លេសឱ្យកាន់តែមានប្រសិទ្ធភាពខ្ពស់៕
