នាព្រឹក​ថ្ងៃទី១៩ ខែមិថុនា ឆ្នាំ២០២៥ លោកស្រី Zhang Lingling អគ្គលេខាធិការរងនៃសហគមន៍អភិវឌ្ឍន៍ការអប់រំវិជ្ជាជីវៈចិន-ឡាវ និងលោកស្រី ហេង សុគន្ធី ប្រធានសមាគមផ្លាស់ប្តូរការអប់រំវិជ្ជាជីវៈ កម្ពុជា-ចិន បាន​ជួប​សម្តែង​ការ​គួរសម​ជាមួយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ដោយ​បង្ហាញពីចំណាប់អារម្មណ៍ ក្នុងការ​ពង្រីក​ការបណ្តុះបណ្តាល​នៅ​កម្ពុជា​ទៅ​លើជំនាញពាក់ព័ន្ធនឹង​បច្ចេកវិទ្យា ដែល​កំពុង​មានតម្រូវការ​ទីផ្សារការងារ។

លោកស្រី Zhang Lingling បានឱ្យដឹងថា បច្ចុប្បន្ន វិទ្យាស្ថានបណ្ដុះបណ្ដាលវិជ្ជាជីវៈរបស់លោកស្រី ទទួលបានការគាំទ្រពីសំណាក់រដ្ឋបាលនៃក្រុងឆុងឈីង ដើម្បីផ្តល់ការបណ្តុះបណ្តាលលើជំនាញចាំបាច់សម្រាប់បំពេញទីផ្សារការងារ ដោយផ្តោតលើជំនាញពាក់ព័ន្ធបច្ចេកវិទ្យា រ៉ូបូត និងបញ្ញាសិប្បនិម្មិត (AI) ជំនាញថែទាំរថយន្ត និងជំនាញផ្សេងៗជាច្រើនទៀត ជាពិសេសវិទ្យាស្ថានមានកម្មវិធីបណ្តុះបណ្ដាលគ្រូឧទ្ទេស សំដៅលើកកម្ពស់ស្តង់ដាជំនាញវិជ្ជាជីវៈ ការពង្រឹងជំនាញ (Upskill) និងរៀនជំនាញថ្មី (Reskill) នៅតាមតំបន់ដែលមានកិច្ចសហការជាមួយវិទ្យាស្ថាន។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបង្ហាញការគាំទ្រ ចំពោះគម្រោងពង្រីកវិសាលភាពនៃការបណ្ដុះបណ្ដាលរបស់វិទ្យាស្ថាននេះនៅកម្ពុជា ជាពិសេសឯកភាពលើការបង្កើនការបណ្តុះបណ្តាលទៅកម្រិតបរិញ្ញាបត្ររង និងបរិញ្ញាបត្រ ដែលនឹងមកនូវឱកាសសិក្សា ឱកាសការងារ ការពង្រីកចំណេះជំនាញ បច្ចេកវិទ្យា ពង្រឹងបទពិសោធន៍ និងជំនាញចាំបាច់ជាច្រើនឆ្លើយតបនឹងទីផ្សារការងារ ព្រមទាំងបានចែករំលែកពីលក្ខខណ្ឌសំខាន់ៗ ក្នុងការស្នើសុំអាជ្ញាបណ្ណសម្រាប់ការបណ្តុះបណ្តាលកម្រិតបរិញ្ញាបត្រ និងការរៀបចំឱ្យមានកម្មវិធីផ្លាស់ប្តូរកម្មវិធីសិក្សា និងកម្មសិក្សារវាងកម្ពុជា និងក្រុងឆុងឈីង។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណដល់ សមាគមផ្លាស់ប្តូរការអប់រំវិជ្ជាជីវៈ កម្ពុជា-ចិន និង វិទ្យាស្ថាន បណ្តុះបណ្តាលវិជ្ជាជីវៈក្រុងឆុងឈីង ប្រទេសចិន ចំពោះកិច្ចខិតខំប្រឹងប្រែងក្នុងការផ្សារភ្ជាប់ទំនាក់ទំនង និងលើកកម្ពស់កិច្ចសហប្រតិបត្តិការរវាងវិទ្យាស្ថានបណ្ដុះបណ្ដាលវិជ្ជាជីវៈ ក្រុងឆុងឈីង និងក្រសួងអប់រំ យុវជន និងកីឡា ដែលបានចូលរួមចំណែកយ៉ាងសំខាន់ដល់ការអភិវឌ្ឍធនធានមនុស្សនៅកម្ពុជា ឆ្លើយតបនឹងចក្ខុវិស័យរាជរដ្ឋាភិបាលក្នុងការជំរុញឱ្យពលរដ្ឋម្នាក់ត្រូវមានជំនាញមួយយ៉ាងតិចប្រចាំជីវិត៕