កញ្ញា សម្បត្តិ សុនិតា ជា​និស្សិត​ខ្មែរ​ដែលកំពុងសិក្សានៅប្រទេសអូស្រ្តាលី លើជំនាញវិទ្យាសាស្ត្រសុខាភិបាលបានប្រាប់ឱ្យដឹងថា នាឱកាសបុណ្យចូលឆ្នាំខ្មែរ គឺជាពេលវេលាដែលតែងតែបានជួបជុំឪពុកម្ដាយ សាច់ញាតិ មិត្តជិតឆ្ងាយនៅស្រុកកំណើត និងនាំយកចង្ហាន់ទៅប្រគេនព្រះសង្ឃជុំគ្រួសារ តែឆ្នាំនេះ សុនិតា​ មិនបានជួបជុំក្រុមគ្រួសារដូចឆ្នាំមុនៗឡើយព្រោះកំពុងបន្តការសិក្សានៅប្រទេសអូស្ត្រាលី និងមិនទាន់មានឱកាសត្រឡប់មកលេងស្រុកកំណើតបាននៅឡើយ។ តែយ៉ាងណាក្នុងឱកាស​ពិធីបុណ្យចូលឆ្នាំខាងមុខនាង​មានគម្រោងជាមួយមិត្តភក្តិទៅវត្តខ្មែរ​ដែលស្ថិត​នៅ Melbourne ។

កញ្ញា សុនិតា បន្តថា ត្បិតមិនបានជួបជុំជាមួយគ្រួសារនៅប្រទេសកម្ពុជា ប៉ុន្តែកញ្ញា និងនិស្សិតខ្មែរដែលកំពុងសិក្សានៅទីនោះដទៃទៀត មានគម្រោងនាំយកនូវចង្ហាន់ និងតិយទានមួយចំនួនទៅប្រគេនព្រះសង្ឃនៅវត្តខ្មែរនាប្រទេសអូស្ត្រាលី ដែលហៅថា វត្តខ្មែរ-មែលប៊ន(Wat Khmer Melbourne) ដែលមានការរៀបចំនូវពិធីផ្សេងៗ។

និស្សិតខ្មែររូបនេះបន្ថែមថា នៅថ្ងៃទី១៤ ខែមេសា ខាងមុននេះ កញ្ញា និងនិស្សិតខ្មែរមួយចំនួនទៀតនឹងទៅវត្តរយៈពេលមួយថ្ងៃពេញដើម្បីប្រគេនចង្ហាន់ និងចូលរួមលេងល្បែងកំសាន្ត កម្មវិធីរាំលេងកម្សាន្តជាមួយប្រជាជនខ្មែរដែលរស់នៅប្រទេសអូស្ត្រាលី ដែលមានការរៀបចំដោយព្រះសង្ឃនៅទីនោះ។

បើទោះបីជាបានទៅវត្ត និងជួបជុំមិត្តភក្តិ និងបងប្អូនខ្មែរនៅអូស្ត្រាលីក៏ពិតមែន ប៉ុន្តែមិនអាចធ្វើឱ្យកញ្ញាបាត់ឈប់នឹកផ្ទះ និងអ្នកផ្ទះនោះទេ ព្រោះរាល់ឆ្នាំតែងតែទៅវត្តជាមួយក្រុមគ្រួសារ ប៉ុន្តែក៏អាចបន្ថយភាពនឹកស្រុកកំណើតបានខ្លះៗដែរ។

ជាមួយគ្នានេះ កញ្ញា សម្បត្តិ សុនិតា សូមជូនពរដល់លោកឪពុក អ្នកម្ដាយ និងបងប្អូនប្រជាពលរដ្ឋខ្មែរទាំងនៅក្នុង និងក្រៅប្រទេសនាឱកាសចូលឆ្នាំថ្មី មានសុខភាពល្អ មានសិរីសួស្ដី និងជួបតែរឿងល្អៗក្នុងឆ្នាំថ្មី៕