ភ្នំពេញ- នៅលើពិភពលោកនេះ ការប្រែប្រួលអាកាសធាតុជាបញ្ហាធំ ដែលទាមទារឱ្យយើងទាំងអស់គ្នាប្រុងប្រយ័ត្ន ។ នេះជាការលើកឡើងរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីប្រគល់វិញ្ញាបនបត្រ និងសញ្ញាបត្រជូនដល់សិក្ខាកាម និងនិស្សិត នៃវិទ្យាស្ថានជាតិពាណិជ្ជសាស្ត្រ(NIB)ជាង ៦ពាន់នាក់ នាព្រឹកថ្ងៃទី៣០ ខែមីនា ឆ្នាំ២០២៣ ។

សម្តេចតេជោនាយករដ្ឋមន្ត្រី បន្ថែមថា យើងអាចដឹងបានថាសង្គ្រាមអ៊ុយក្រែននិងរុស្ស៊ីនឹងត្រូវបញ្ចប់គ្រាន់តែមិនដឹងនៅពេលណា ប៉ុន្តែរឿងដែលគ្រោះថ្នាក់ជាងគេដែលមិនដឹងពេលណាបញ្ចប់នោះ គឺការប្រែប្រួលអាកាសធាតុ។ សម្តេចបន្តថា ឥឡូវនេះ ​ពីមួយថ្ងៃទៅមួយថ្ងៃ បញ្ហាប្រែប្រួលអាកាសធាតុ បានធ្វើឱ្យមានការប៉ះពាល់ធំទូលាយ, ជាក់ស្ដែង នៅប្រទេសកម្ពុជា កាលយប់ម្សិល (២៩ មីនា) បាតុភូតកើតឡើងនៅខេត្តសៀមរាបដែលមានខ្យល់កន្រ្តាក់ដោយសារភ្លៀងផង បានធ្វើឱ្យដួលរលំសម្ភារៈផ្សេងៗ ដោយមានប្រជាជនស្លាប់ និងរបួសទៀតផង។

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា

“ឆ្នាំនេះ តាំងពីខ្ញុំកើតមកមិនដែលមានជំនន់ខែប្រាំង ប៉ុន្តែពេលនេះយើងមានជំនន់ខែប្រាំង”

សម្តេចនាយករដ្ឋមន្ត្រីមានប្រសាសន៍ថា បន្ទាប់ពីមានជំងឺកូវីដ យើង​មិន​ដឹងថា តើនឹងមានរឿងអ្វីកើតឡើងទៀតដោយ​សារ​តែការ​ប្រែប្រួលអាកាសធាតុ ដែលទាមទារ​ឱ្យយើងទាំងអស់គ្នាត្រូវត្រៀមខ្លួនឆ្លើយតបជាមួយនឹងគ្រោះអាសន្ននៃសុខភាពសាធារណៈ។

របាយការណ៍វាយតម្លៃ របស់ក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ(IPCC) បានបញ្ជាក់យ៉ាងច្បាស់ថា ភពផែនដីកំពុងប្រឈមនឹងការប្រែប្រួលអាកាសធាតុបង្កដោយសកម្មភាពមនុស្ស។ យ៉ាងណាក៏ដោយ ការប្រែប្រួលអាកាសធាតុនេះ បានកំពុង​ក្លាយជាប្រធានបទសំខាន់ដែលពិភពលោករួមគ្នារកដំណោះស្រាយដើម្បីបញ្ជៀសពីផលប៉ះពាល់ដែលនឹងអាចកើតមានគ្រប់ពេល។

បើតាមសន្ទានុក្រមការប្រប្រែប្រួលអាកាសធាតុរបស់ក្រសួងបរិស្ថាន បានបង្ហាញថា ការប្រែប្រួលអាកាសធាតុ គឺអាចបញ្ជាក់បានតាមរយៈការបង្កឱ្យមានភ្លៀងធ្លាក់តិច ឬច្រើន, កើតមានកម្តៅខុសប្រក្រតី, ខ្យល់ព្យុះ, ខ្យល់កន្រ្តាក់, កង្វះទឹកស្អាតប្រើប្រាស់, ភ្លើងឆេះព្រៃ, ធ្វើ​ឱ្យកសិផលធ្លាក់ចុះ, កើតជំងឺភ្នែក និងស្បែក, កើតគ្រោះទឹកជំនន់ ឬកើតមានបាតុភូតមិនប្រក្រតីផ្សេងៗជាដើម៕