កម្ពុជា​បាន​បង្ហាញពីមោទនភាពជាតិថ្មីមួយ​ទៀត​នៅក្នុងវិស័យបច្ចេកវិទ្យាឌីជីថល តាមរយៈការ​ទទួលបាន​ចំណាត់ថ្នាក់​លេខ១១៨ លើពិភពលោក ក្នុងរបាយការណ៍សន្ទស្សន៍ភាព​រួចរាល់​នៃ​បញ្ញាសិប្បនិម្មិតនៅក្នុងរដ្ឋាភិបាល (Government AI Readiness Index) របស់ស្ថាប័ន Oxford Insights។

បើតាមរបាយការណ៍សន្ទស្សន៍ សហរដ្ឋអាមេរិក​បាន​ទទួលចំណាត់ថ្នាក់លេខ១ ក្នុងពិន្ទុ ៧៩.៧៥ ដោយសារភាពខ្លាំងលើវិស័យឯកជន ការស្រាវជ្រាវ និងហេដ្ឋារចនាសម្ព័ន្ធបច្ចេកវិទ្យា, ប្រទេសចិនជាប់ចំណាត់ថ្នាក់លេខមួយនៅក្នុងក្រុមអាស៊ីបូព៌ា ដោយទទួលបានពិន្ទុ ៧៥.៤ តាមពីក្រោយ​ដោយ​ប្រទេស​សឹង្ហបុរី ដែលទទួលបានពិន្ទុ ៧៥.១ ខណៈកម្ពុជា​ទទួលបានពិន្ទុ ៣៣.៥។

ក្រសួងប្រៃសណីយ៍ និង​ទូរគមនាគមន៍ (ក.ប.ទ.) បានលើក​ឡើង​នៅ​ក្នុង​សេចក្តីប្រកាស​ព័ត៌មានថា ចំណាត់ថ្នាក់សាកលរបស់កម្ពុជា ស្ថិត​នៅលេខ១១៨ ក្នុង​ចំណោម ១៩៥ប្រទេស គឺបង្ហាញពីវឌ្ឍនភាពគួរ​ឱ្យ​កត់សម្គាល់ ខណៈកាលពីឆ្នាំ២០២៤ កម្ពុជា​ស្ថិត​ក្នុង​ចំណាត់ថ្នាក់លេខ ១៤៥។ ការកើនឡើងចំណាត់ថ្នាក់រហូត​ដល់់ ២៧លំដាប់នេះ បានបង្ហាញថា កម្ពុជាកំពុងធ្វើដំណើរក្នុងទិសដៅដ៏ត្រឹមត្រូវលើការចាប់យកបញ្ញាសិប្បនិម្មិតជាឧបករណ៍យុទ្ធសាស្ត្រ និងបានឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការអភិវឌ្ឍហេដ្ឋារចនាសម្ព័ន្ធឌីជីថល ការពង្រឹងមូលធនជំនាញ ការរៀបចំគោលនយោបាយនិងលិខិតបទដ្ឋានគតិយុត្តអំណោយផល ការលើកទឹកចិត្តផ្នែកនវានុវត្តន៍និងធុរកិច្ចថ្មី និងការជំរុញប្រើប្រាស់បញ្ញាសិប្បនិម្មិតប្រកបដោយបរិយាបន្ន និងការទទួលខុសត្រូវ។

បើតាមក្រសួងប្រៃសណីយ៍និងទូរគមនាគមន៍ ក្នុងរយៈពេល ២ ឆ្នាំចុងក្រោយនេះ ក្រសួង ស្ថាប័នពាក់ព័ន្ធសម្រេចបានសមិទ្ធផលសំខាន់ៗជាច្រើន មានដូចជា ការដាក់ឱ្យដំណើរការមជ្ឈមណ្ឌលស្រាវជ្រាវជាតិសម្រាប់បញ្ញាសិប្បនិម្មិតក្នុងវិស័យអប់រំ ការដាក់ចេញនូវរបាយការណ៍ស្តីពីការវាយតម្លៃភាពរួចរាល់ផ្នែកសីលធម៌បញ្ញាសិប្បនិម្មិតនៅកម្ពុជា និងផែនទីបង្ហាញផ្លូវអភិវឌ្ឍន៍ជំនាញឌីជីថលនៅកម្ពុជា ២០២៤-២០៣៥ ការរៀបចំឯកសារសំខាន់ៗ ដូចជា សេចក្តីព្រាងយុទ្ធសាស្ត្រជាតិស្តីពីបញ្ញាសិប្បនិម្មិត សេចក្តីព្រាងច្បាប់ស្តីពីកិច្ចការពារទិន្នន័យបុគ្គល សេចក្តីព្រាងច្បាប់ស្ដីពីសន្តិសុខសាយប័រ និងការដាក់ឱ្យប្រើប្រាស់កម្មវិធីដែលមានបច្ចេកវិទ្យាបញ្ញាសិប្បនិម្មិតមួយចំនួន ដូចជា ថ្នាលផ្ទៀងផ្ទាត់ឯកសារ verify.gov.kh កម្មវិធីបកប្រែ TranslateKH កម្មវិធីសារិកា (Sarika) កម្មវិធីម៉ាស៊ីនបកប្រែខ្មែរប្រៃយ៍ (Khmer Braille) កម្មវិធីបំប្លែងសំឡេងនិយាយភាសាខ្មែរទៅជាអត្ថបទសរសេរ (Khmer ASR) កម្មវិធីខ្មែរ Fastype និងថ្នាលបញ្ញា សិប្បនិម្មិតកម្ពុជា (https://ai.gov.kh)។

ក្រសួងប្រៃសណីយ៍ និង​ទូរគមនាគមន៍ ក៏​បានសម្តែង​ការ​ជឿជាក់ដែរថា កម្ពុជានឹងអាចទទួលបានចំណាត់ថ្នាក់កាន់តែល្អប្រសើរបន្ថែមទៀតនៅពេល ដែលមជ្ឈមណ្ឌលទិន្នន័យជាតិ និងម៉ូឌែលភាសាខ្មែរធំ (Khmer LLM) ត្រូវបានដាក់ឱ្យប្រើប្រាស់នាពេលខាងមុខ៕