ភ្នំពេញ – កាលពីពេលថ្មីៗនេះ រាជរដ្ឋាភិបាលកម្ពុជាតាមរយៈក្រសួងបរទេស និងសហប្រតិបត្តិការអន្តរជាតិកម្ពុជា បានផ្តល់ជំនួយមនុស្សធម៌ជាទឹកប្រាក់ចំនួន ៣សែនដុល្លារអាមេរិក ដើម្បីជួយគាំទ្រដល់កិច្ចខិតខំប្រឹងប្រែងរបស់រដ្ឋាភិបាលមីយ៉ាន់ម៉ា ដែលបានរងគ្រោះមហន្តរាយព្យុះស៊ីក្លូនម៉ូឆា ។ ឥទ្ធិពលព្យុះស៊ីក្លូនម៉ូឆា (Cyclone Mocha) បានបណ្តាលឱ្យប្រជាពលរដ្ឋរាប់រយនាក់បាត់បង់ជីវិត ព្រមទាំងការខូចខាតទ្រព្យសម្បត្តិ និងហេដ្ឋារចនាសម្ព័ន្ធ នៅក្នុងរដ្ឋរ៉ាក់ខាញនៃសាធារណរដ្ឋសភាពមីយ៉ាន់ម៉ា ។

ពិធីប្រគល់ និងទទួលថវិកាបានរៀបចំឡើងនៅទីស្តីការក្រសួងបរទេស និងសហប្រតិបត្តិការអន្តរជាតិកម្ពុជា ដោយមានវត្តមានចូលរួមរបស់ឯកឧត្តម អ៊ូ ធីត លីញអូន ឯកអគ្គរដ្ឋទូតនៃសាធារណរដ្ឋសហភាពមីយ៉ាន់ម៉ាប្រចាំកម្ពុជា និងឯកឧត្តមបណ្ឌិត ញឹម ខេមរា រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ ។ ជាមួយគ្នានេះ រដ្ឋាភិបាលកម្ពុជាបានចូលរួមរំលែកទុក្ខយ៉ាងជ្រាលជ្រៅបំផុតចំពោះផលប៉ះពាល់យ៉ាងធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាជនមីយ៉ាន់ម៉ា ហើយសង្ឃឹមថា មីយ៉ាន់ម៉ានឹងអាចជម្នះស្ថានភាពដ៏លំបាកនេះបានយ៉ាងឆាប់រហ័ស ។

គួរបញ្ជាក់ថា បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងថា កាយវិការសប្បុរសធម៌ខាងលើឆ្លុះបញ្ចាំងពីគុណតម្លៃនៃមនុស្សជាតិ ព្រមទាំងចំណងមិត្តភាព និងសាមគ្គីភាពរបស់ព្រះរាជាណាចក្រកម្ពុជា ជាមួយសាធារណរដ្ឋសហភាពមីយ៉ាន់ម៉ា ដែលកំពុងស្ថិតក្នុងស្ថានភាពដ៏លំបាក សំដៅរួមចំណែកជួយសម្រួលដល់ដំណើរការស្តារប្រទេសឡើងវិញ ។

សូមជម្រាបថា ឥទ្ធិពលព្យុះស៊ីក្លូនម៉ូឆា (Cyclone Mocha) បានកើតឡើងនៅតំបន់ភាគខាងលិចប្រទេសមីយ៉ាន់ម៉ា និងបានបណ្តាលឱ្យប្រជាពលរដ្ឋមីយ៉ាន់ម៉ាប្រមាណជាង ៦ម៉ឺនបីពាន់នាក់បានជួយសង្គ្រោះបន្ទាន់ ហើយប្រជាពលរដ្ឋប្រមាណជាង ២សែនបីម៉ឺននាក់បានទទួលស្បៀងអាហារជំនួយមនុស្សធម៌សង្គ្រោះបន្ទាន់ទៅកាន់ទីតាំងសុវត្ថិភាព ។

តាមការចុះផ្សាយរបស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានឱ្យដឹងថា សាលារៀន និងហេដ្ឋារចនាសម្ព័ន្ធបម្រើដល់ការអប់រំ ៨០ភាគរយបានបំផ្លាញដោយសារខ្យល់ព្យុះ និងកំពុងត្រូវការស្តារឡើងវិញជាបន្ទាន់ ។ គេបានប៉ាន់ប្រមាណថា មនុស្សប្រមាណជាង ១,៦លាននាក់ត្រូវការជំនួយ និងប្រើប្រាស់ថវិកាប្រមាណជាង ៣៣៣លានដុល្លារអាមេរិក ៕