សៀមរាប – ស្រុកបន្ទាយស្រីក្នុងខេត្តសៀមរាប ជាស្រុកទី៣ ដែលក្រសួងអភិវឌ្ឍន៍ជនបទបានប្រកាសទទួលស្គាល់ ជាស្រុកបញ្ចប់ការបន្ទោ​បង់​ពាស​វាលពាសកាល (ODF) ។ ស្រុកមានបង្គន់អនាម័យប្រើប្រាស់គ្រប់ខ្នងផ្ទះនេះ បានប្រកាសនៅថ្ងៃអង្គារ៍ ទី២១ ខែមីនា ឆ្នាំ២០២៣ ដោយមាន​អ្នកចូលរួមប្រមាណជាង ២០០នាក់ស្ថិតនៅក្នុងបរិវេណសាលាស្រុកបន្ទាយស្រី ខេត្តសៀមរាប ។

ឯកឧត្តម ថោង ពោជ អនុរដ្ឋលេខាធិការ ក្រសួងអភិវឌ្ឍន៍ជនបទ មានប្រសាសន៍ថា វិស័យផ្គត់ផ្គង់ទឹកស្អាត និងអនាម័យជនបទ គឺជាផ្នែកមួយសំខាន់របស់រាជរដ្ឋាភិបាលក្នុងការកែលម្អលក្ខខណ្ឌនៃការរស់នៅរបស់ប្រជាជនឱ្យកាន់តែប្រសើរឡើង ។ ទឹកស្អាត និងអនាម័យជួយដល់សុខភាពប្រជាសហគមន៍ ព្រមទាំងសុខភាពកុមារ ពិសេសលើកកម្ពស់គុណភាពការអប់រំរបស់កុមារកម្ពុជា ។

ឯកឧត្តម ថោង ពោជ អនុរដ្ឋលេខាធិការ ក្រសួងអភិវឌ្ឍន៍ជនបទ

“សកម្មភាពលើកកម្ពស់ទឹកស្អាត និងអនាម័យជនបទនេះ ឈានទៅសម្រេចទស្សនៈវិស័យរបស់រាជរដ្ឋាភិបាល ដោយកំណត់នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវទទួលបានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តរភាព​ ។”

លោក រិន ឡូត អភិបាល នៃគណៈអភិបាលស្រុកបន្ទាយស្រី បានលើកឡើងថា ការសាងសង់បង្គន់អនាម័យប្រើប្រាស់គ្រប់ខ្នងផ្ទះ គឺចូលរួមពន្លឿនកិច្ចអភិវឌ្ឍលើគ្រប់វិស័យ ។ ស្រុកបន្ទាយស្រីមាន ០៦ឃុំ ស្មើ ៣៦ភូមិ មានប្រជាពលរដ្ឋសរុប ៥ម៉ឺនសែសិបបួននាក់ ស្មើនឹង ១ម៉ឺនមួយពាន់បីរយគ្រួសារ ហើយប្រជាពលរដ្ឋ ៩០% ជាកសិករធ្វើស្រែ និងមួយផ្នែកធ្វើការងារសិប្បកម្ម និងសេវាផ្សេងៗ ។

ផ្អែកតាមរបាយការណ៍របស់អង្គការដៃគូពាក់ព័ន្ធ និងការលើកឡើងរបស់ខេត្តសៀមរាប អំពីវឌ្ឍនភាពរបស់ខេត្ត អត្រាគ្រប់ដណ្តប់អនាម័យឡើងដល់ ៨៤,៥៣% ក្នុងនោះមាន ៣៥០ភូមិក្នុង ៣០ឃុំ នៃស្រុកចំនួន០៣ បានបញ្ចប់ការបន្ទោបង់ពាសវាលពាសកាល(ODF) ។

សូមជម្រាបថា ការងារលើកកម្ពស់អនាម័យរបស់រដ្ឋបាលស្រុកបន្ទាយស្រី បានសហការណ៍អនុវត្តការងារដោយមន្ទីរអភិវឌ្ឍន៍ជនបទ, អង្គការយូរីដូ, អង្គការបណ្តុះកុមារ, និងអង្គការភ្លែនអន្តរជាតិ ប្រចាំកម្ពុជា ៕