ថ្ងៃប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាន់តែខិតជិតមកដល់ហើយ តើប្អូនៗសិស្សានុសិស្សថ្នាក់ទី១២បានត្រៀមខ្លួនអ្វីខ្លះសម្រាប់ការប្រឡងបាក់ឌុបនៅថ្ងៃខាងមុខ? ប្រាកដណាស់ថា​ មានសិស្សមួយចំនួនបានត្រៀមខ្លួនរួចរាល់ ចំណែកសិស្សមួយចំនួនទៀត មិនសូវច្បាស់មេរៀននៅឡើយ ស្ទើរកន្លែងនេះផង ស្ទើរកន្លែងនោះផង ហើយថែមទាំងបារម្ភខ្លាំងព្រោះជិតដល់ថ្ងៃប្រឡងទៀត។ យ៉ាងណាក៏ដោយ បើតាម​បទពិសោធន៍​របស់យុវតី សែម ចាន់សុភ័គ ជាអតីតសិស្សនិទ្ទេស B សម័យប្រឡងឆ្នាំ​២០២២ មក​ពីវិទ្យាល័យហ៊ុនសែនគរ ខេត្តកំពង់ចាម ថា ការរៀបចំកាលវិភាគរៀនបានត្រឹមត្រូវ ពិតជាអាចជួយ​ឱ្យ​បេក្ខជន​ទទួលបាននិទ្ទេសល្អនៅពេលប្រឡងបាក់ឌុប។

យុវតី សែម ចាន់សុភ័គ បច្ចុប្បន្នជានិស្សិតពេទ្យនៃសកលវិទ្យាល័យវិទ្យាសាស្ត្រសុខាភិបាល លើកឡើងថា ពេលវេលាកាន់តែកៀក ហើយរយៈពេលនៃការប្រឡងបាក់ឌុបក៏កាន់តែខិតជិតមកដល់ ដោយសិស្សានុសិស្សគួរតែរៀបចំកាលវិភាគ ក៏ដូចជារៀបចំតារាងពេលវេលារៀនឱ្យបានត្រឹមត្រូវ ដើម្បីកំណត់សកម្មភាពរៀនបានល្អ ដែលអាចធ្វើឱ្យយើងដឹងថា យើងរៀនចប់អ្វីខ្លះ? នៅសល់អ្វីខ្លះ? ឬរៀនមុខវិជ្ជាប្រឡងទាំងអស់ចប់នៅថ្ងៃណា? នៅពេលយើងតាមដានបែបនេះ អាចធ្វើឱ្យកាលវិភាគនៃការសិក្សារបស់យើងមានភាពជាក់លាក់ ហើយយើងបានត្រៀមខ្លួនរួចរាល់ក្នុងការប្រឡងឱ្យទទួលបាននិទ្ទេសល្អផងដែរ។

អតីតសិស្សនិទ្ទេស B រូបនេះ បន្តថា សិស្សានុសិស្សក៏គួរចំណាយពេលវេលាជាមួយខ្លួនឯងឱ្យបានច្រើនដើម្បីស្វ័យសិក្សា ឬរៀនជាមួយមិត្តភក្ដិ ដើម្បីពង្រឹងសមត្ថភាពចំណេះដឹងទាំងអស់គ្នា ។ ម៉្យាងវិញទៀត ចំពោះម៉ោងរៀនគួរ ប្រសិនជាអាចកាត់បន្ថយបានក៏គួរកាត់បន្ថយ ដោយយកពេលវេលានេះរៀនដោយខ្លួនឯង គឺជាជម្រើសល្អបំផុត ។

ជាមួយគ្នានេះ សិស្សានុសិស្សក៏ត្រូវស្គាល់ខ្លួនឯងឱ្យច្បាស់ដែរថា តើយើងពូកែមុខវិជ្ជាអ្វី និងខ្សោយមុខវិជ្ជាអ្វី? យុវតី សែម ចាន់សុភ័គ បញ្ជាក់ថា យើងដឹងហើយថា ការប្រឡងបាក់ឌុបប្រសិនបើចេះតែមួយ ពីរ ឬបីមុខ គឺមិនអាចប្រឡងជាប់បាក់ឌុបបានទេ។ យើងត្រូវមានសមត្ថភាពចេះមុខវិជ្ជាដែលត្រូវប្រឡងនោះស្មើៗគ្នា។ ឧទាហរណ៍ប្រសិនយើងចូលចិត្តមុខវិជ្ជាគណិតវិទ្យា យើងរៀនតែមុខវិជ្ជាគណិត ចំណែកមុខវិជ្ជាផ្សេងដូចជា រូបវិទ្យា យើងគិតថាពិបាកយើងឈប់រៀនតែម្ដង។ ការធ្វើបែបនេះ គឺមិនត្រឹមត្រូវទេ ប្រសិនបើប្អូនៗស្ថិតនៅក្នុងស្ថានភាពបែបនេះ សូមឈប់ជាបន្ទាន់ហើយយើងត្រូវកែប្រែខ្លួនឯងម្ដងទៀត។

យុវតីរូបនេះ បន្ថែមថា បន្ទាប់ពីយើងដឹងថា យើងខ្សោយមុខវិជ្ជាអ្វី យើងត្រូវចំណាយពេលជាមួយមុខវិជ្ជានោះឱ្យបានច្រើនជាងមុនរាល់ថ្ងៃ។ ឧទាហរណ៍ថា បើយើងរៀនមុខវិជ្ជាដែលគិតថាខ្សោយនេះ មួយថ្ងៃតែមួយម៉ោង យើងអាចបង្កើនម៉ោងរៀនបន្ថែម ពីរទៅបីម៉ោង ហើយយើងចាប់ផ្ដើមរៀនពីមូលដ្ឋានគ្រឹះជាមុន ។ នៅពេលយើងចំណាយពេលវេលាច្រើនទៅលើមុខវិជ្ជាខ្សោយ ធ្វើឱ្យមុខវិជ្ជានោះយើងចាប់ផ្ដើមខ្លាំង ហើយមុខវិជ្ជាដែលខ្លាំងស្រាប់ក៏មិនត្រូវបន្ថយដៃដែរ ។ ចុងក្រោយសមត្ថភាពរបស់យើងនឹងអាចស្មើដៃគ្នាបាន ហើយការប្រឡងបាក់ឌុបនឹងរលូន អាចប្រឡងជាប់ ឬអាចទទួលបាននិទ្ទេសល្អមិនខាន។

យុវតី សែម ចាន់សុភ័គ ក៏បានលើកទឹកចិត្តសិស្សានុសិស្សដែលជាបេក្ខជនប្រឡងត្រូវយកចិត្តទុកដាក់ថែរក្សាសុខភាពផ្លូវចិត្ត និងផ្លូវកាយឱ្យបានល្អ កុំបាក់ទឹកចិត្ត កុំដាក់សម្ពាធលើខ្លួនឯង ឬប្រៀបធៀបជាមួយមនុស្សនៅជុំវិញខ្លួន។ លើសពីនេះ ត្រូវសម្រាកឱ្យបានគ្រប់គ្រាន់ ព្រោះនៅពេលយើងបានសម្រាកគ្រប់គ្រាន់កម្លាំងក្នុងការរៀនក៏ល្អដែរ។ ហើយរបបអាហារគឺសំខាន់ យើងត្រូវញ៉ាំអាហារដែលផ្ដល់តុល្យភាពដល់រាងកាយ ពេលដែលយើងមានសុខភាពល្អ យើងក៏រៀនឆាប់ចាំផងដែរ។

យើងរៀនហត់ទាំងផ្លូវកាយ ហត់ទាំងផ្លូវចិត្ត រងនូវការស្ដីបន្ទោស មានសម្ពាធ ប៉ុន្តែយើងត្រូវដឹងថាអ្នកដែលព្យាយាមរកលុយមកផ្គត់ផ្គង់ការសិក្សារបស់យើងគាត់ពិបាកជាងយើងទៅទៀត។

យុវតី សែម ចាន់សុភ័គ អតីតសិស្សនិទ្ទេសB កាលពីឆ្នាំ២០២២

យុវតី សែម ចាន់សុភ័គ សង្ឃឹមថា ការចែករំលែកគន្លឹះខាងលើនេះ អាចរួមចំណែកជួយទៅដល់ប្អូនៗសិស្សានុសិស្សដែលជាបេក្ខជនប្រលងឡងបាក់ឌុបខាងមុខក្នុងការពង្រឹងសុខភាពផ្លូវកាយ និងសុខភាពផ្លូវចិត្តរបស់ខ្លួន ចាប់ផ្ដើមស្វ័យសិក្សា អនុវត្តលំហាត់ជាប្រចាំ និងចេះរៀបចំកាលវិភាគរៀនបានត្រឹមត្រូវ។ ទន្ទឹមគ្នានេះ ត្រូវចេះលើកទឹកចិត្តខ្លួនឯង និងគិតថាគេអាចធ្វើបានយើងក៏អាចធ្វើបាន៕