នៅពេលបុគ្គលម្នាក់ចាប់កាន់សៀវភៅមួយក្បាលអាន ឬកាន់ក្រដាសដែលមានសរសេរអក្សរជាច្រើនទំព័រ នោះគឺជាពេលវេលាដែលបុគ្គលអាចបង្កើនចំណេះដឹងអ្វីមួយតាមរយៈអំណាន ។ ថ្វីត្បិតផលចំណេះដឹងទាំងនេះ មិនអាចដឹងថាតិច ឬច្រើន ប៉ុន្តែវាបានបង្ហាញយ៉ាងច្បាស់ថា អក្ខរកម្ម (លទ្ធភាពចេះអក្សរ) ជួយឱ្យមនុស្សអាចយល់ខ្លឹមសារនៃសេចក្តីដែលខ្លួនបានអាន ។ បើតាមអង្គការ UNESCO បច្ចុប្បន្នគេចាត់ទុកអំណានជាមូលដ្ឋានគ្រឹះនៃអក្ខរកម្មសម្រាប់មនុស្សគ្រប់រូប ព្រមទាំងចូលរួមអភិវឌ្ឍន៍សមត្ថភាពរបស់មនុស្សជាបន្តបន្ទាប់ ។ អក្ខរកម្មគឺជាសិទ្ធិដើម្បីដឹង ទំនាក់ទំនង និងយល់គ្នាទៅវិញទៅមក ។ ខាងក្រោមនេះ ជាគុណសម្បត្តិទាំង ៧ចំណុចដែលមនុស្សទទួលបានតាមរយៈអំណានប្រចាំថ្ងៃ ។

១. អំណានជួយឱ្យមនុស្សទទួលបានព័ត៌មានទូលំទូលាយ ៖ រហូតមកដល់ពេលនេះនៅតែមិនអាចបដិសេធបានថា អំណានមិនមានប្រយោជន៍សម្រាប់មនុស្សឡើយ ។ នៅពេលដែលមនុស្សអានកាន់តែច្រើន មនុស្សនឹងទទួលបានព័ត៌មានកាន់តែច្រើន ហើយតាមរយៈព័ត៌មានដែលទទួលបានពីអំណាននឹងជួយឱ្យមនុស្សដឹងកាន់តែច្រើនពីអ្វីៗនៅជុំវិញខ្លួន ។ ដោយសារតែគុណតម្លៃនៃអំណាននេះហើយ ទើបកន្លងទៅបណ្ដារប្រទេសជាច្រើននៅក្នុងពិភពលោក តែងឱ្យតម្លៃទៅលើបណ្ណាល័យដែលជាទីតាំងផ្ទុកឯកសារអំណាន ព្រមទាំងរៀបចំទិវាជាតិអំណានជាហូរហែរ ។

២. គិតបានលឿនរហ័ស ៖ ខណៈអំណានដើរតួនាទីសំខាន់នៅក្នុងជីវភាពប្រចាំថ្ងៃ ព័ត៌មានដែលទទួលបានពីអំណាននឹងជួយឱ្យមនុស្សគិតបានលឿនរហ័ស និងសម្រេចចិត្តបានត្រឹមត្រូវ ។ បុគ្គលដែលចូលចិត្តអាន ឬស្រលាញ់អំណានពួកគេតែងតែមានព័ត៌មានគ្រប់គ្រាន់ក្នុងដៃរាល់ពេលប្រាស្រ័យទាក់ទងជាមួយនរណាម្នាក់ ឬបង្ហាញព័ត៌មានទាំងនោះកាន់តែជាក់លាក់ទៅកាន់នរណាម្នាក់ ។ ការគិតលឿនរហ័សតាមរយៈអំណាន ធ្វើឱ្យបុគ្គលមិនងាយវិនិច្ឆ័យទិដ្ឋភាពអ្វីមួយភ្លាមៗ តាមអារម្មណ៍នោះទេ ។

៣. ស្គាល់ពាក្យថ្មី ៖ ជាការពិតណាស់ពាក្យថ្មីៗនៅក្នុងការប្រើប្រាស់ភាសាតែងតែកើតមាននៅក្នុងសំណេរដែលយើងនឹងប្រទះតាមរយៈការអាន ។ ពេលដែលយើងអានកាន់តែច្រើន នោះយើងនឹងស្គាល់ពាក្យបច្ចេកទេស ពាក្យថ្មីៗ ឬពាក្យគន្លឹះកាន់តែច្រើន ។ ពាក្យគន្លឹះដែលមាននៅក្នុងអំណានសំខាន់ណាស់ ព្រោះបានជួយឱ្យមនុស្សយល់ដល់សេចក្តីផ្សេងៗ នៅក្នុងជីវភាពប្រចាំថ្ងៃ ។

៤. ជំនាញសរសេរ ៖ ជាការពិតអំណាចមានទំនាក់ទំនងដល់ការសរសេររបស់មនុស្ស ។ កាលណាមនុស្សអានកាន់តែច្រើន លំហូរគំនិតទាំងឡាយនៅលើសំណេរនឹងកើតឡើងជាបន្តបន្ទាប់ ។ នៅពេលដែលមនុស្សបោះបង់អំណាន មនុស្សនឹងមិនអាចមានគំនិត ឬសេចក្តីអធិប្បាយនៅលើសំណេររបស់ខ្លួនឡើយ ។ ក្រៅតែពីសរសេរសំណេរ ការនិយាយនៅទីសាធារណៈក៏ពឹងផ្អែកទៅលើចំណេះដឹងដែលទទួលបានតាមរយៈអំណានផងដែរ ។

៥. បង្កើនការចងចាំ ៖ អានច្រើនបង្កើនការចងចាំ គឺជាឃ្លាគន្លឹះមួយដែលអ្នកសិក្សាភាគច្រើនរមែងតែងអនុវត្តឱ្យខ្លួនមានទម្លាប់អាន ។ មិនថាអានលើសន្លឹកសៀវភៅ អានឯកសារស្រាវជ្រាវ ឬអានអត្ថបទនៅលើបច្ចេកវិទ្យានោះទេ ផលរបស់អំណាននឹងជួយឱ្យមនុស្សបង្កើនការចងចាំបានល្អ ។ ការសិក្សាបានរកឃើញថា ការចងចាំតាមរយៈអំណានមានសេចក្តីស៊ីជម្រៅ (គិតស៊ីជម្រៅ) ជាងការចងចាំតាមរយៈមធ្យោបាយផ្សេងៗ ។

៦. ជួយសុខភាពផ្លូវចិត្ត ៖ នៅពេលខ្លះមនុស្សស្ទើរតែមិនជឿថា អំណានជួយដល់សុខភាពផ្លូវចិត្ត ។ តែផ្ទុយទៅវិញអំណានបានជួយដល់សុខភាពផ្លូវចិត្តមនុស្សយ៉ាងច្រើននៅពេលដែលមនុស្សចាប់កាន់សៀវភៅចំណេះដឹងអ្វីមួយអាន ឬអានដើម្បីស្វែងរកដំណោះស្រាយ ។ សៀវភៅខ្លះមិនបានផ្ដល់ពីវិធីសាស្រ្តឱ្យមនុស្សដោះស្រាយបញ្ហាផ្លូវចិត្តដោយផ្ទាល់នោះទេ ។ ក៏ប៉ុន្តែតាមរយៈអំណាន មនុស្សនឹងអាចវិនិច្ឆ័យបទពិសោធន៍ជាក់លាក់មួយចេញពីសៀវភៅ ប្រៀបធៀបទៅនឹងបញ្ហា ឬទិដ្ឋភាពដែលខ្លួនបានជួប ។ ពេលនោះហើយអំណានផ្ដល់សារៈសំខាន់ដល់សុខភាពផ្លូវចិត្ត ។ លើសពីនេះ មនុស្សដែលអានច្រើនរមែនមានចិត្តស្ងប់ និងមានការអត់ធ្មត់ខ្ពស់រាល់ពេលជួបបញ្ហា ។

៧. បង្កើតទឡ្ហីករណ៍បែបវិទ្យាសាស្ត្រ ៖ មនុស្សដែលអានតិច និងមិនចូលចិត្តអំណាន រមែងនិយាយបានតិចតួចបំផុត ឬអាចនិយាយបានថា ជាមនុស្សក្រនិយាយក៏ថាបាន ។ ក៏ប៉ុន្តែប្រសិនបើមនុស្សចូលចិត្តអំណាន ឬបានអានច្រើន បុគ្គលនោះរមែងមានពាក្យពេចន៍និយាយជាហូរហែរ ព្រមទាំងទាញបាននូវហេតុផលនានា ដើម្បីគាំទ្រគំនិតរបស់ខ្លួន ។ រាល់អំណះអំណាងទាំងឡាយនៅពេលដែលនិយាយ សរសេរ ឬស្រាវជ្រាវ នឹងមានទម្ងន់កាន់តែជាក់លាក់នៅពេលដែលមនុស្សបានអានឯកសារបានកាន់តែច្រើន ។ ដូច្នេះហើយទើបមានពាក្យមួយឃ្លាថា អានច្រើន ចម្រើនចំណេះ៕