ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប គឺជាការប្រឡងដ៏សំខាន់សម្រាប់ប្អូនៗសិស្សានុសិស្សថ្នាក់ទី១២។ នៅមិនដល់មួយសប្តាហ៍ទៀតទេ ការប្រឡងដ៏សំខាន់មួយនេះនឹងមកដល់ ដែលជាពេលវេលាដ៏តានតឹង ហើយបេក្ខជនភាគច្រើនប្រហែលជាមានអារម្មណ៍ភ័យបារម្ភ និងមិនទាន់ប្រាកដចិត្តថា តើគួរត្រៀមខ្លួនបែបណាខ្លះក្នុងរយៈពេលមួយសប្ដាហ៍ចុងក្រោយមុនថ្ងៃប្រឡងនេះ។
ដើម្បីជួយសម្រួលដល់ការលំបាកនេះ កញ្ញា ហ៊ុត ម៉ីឡាង ដែលជាអតីតសិស្សនិទ្ទេស A ឆ្នាំ២០២២ បានចែករំលែកបទពិសោធន៍ផ្ទាល់ខ្លួន ជាគន្លឹះសំខាន់ៗចំនួន ៤ ក្នុងការត្រៀមខ្លួន ដើម្បីកាត់បន្ថយភាពតានតឹង និងបង្កើនទំនុកចិត្តលើខ្លួនឯងសម្រាប់ការប្រឡងបាក់ឌុប ដែលនឹងប្រព្រឹត្តទៅនៅថ្ងៃទី២៨ សីហា ខាងមុខ៖
ទី១. រៀបចំសម្ភារៈប្រឡងដាច់ដោយឡែកឱ្យរួចរាល់ ៖ សម្ភារៈដែលចាំបាច់មានដូចជា ប៊ិក បន្ទាត់ ប៉ារ៉ាបូល កាតប្រឡងជាដើម។ គួរទិញប៊ិកម៉ាកដូចគ្នា ពណ៌ដូចគ្នា ជាប៊ិកធ្លាប់ប្រើប្រាស់ ហើយស្រួលសរសេរ មិនប្រតាក។ យើងអាចត្រៀមពី៣ ទៅ៤ដើម។ ម៉្យាងវិញទៀត អាចត្រៀមជាក្រដាសជូតតុ ជូតទឹកប៊ិកដែលហៀរ, ត្រៀមថ្នាំព្យាបាល ឈឺពោះ និងសម្ភារៈផ្សេងៗទៀត ជាពិសេសនាឡិកាសម្រាប់ផ្ទៀងម៉ោង ដែលជានាឡិកាទ្រនិច មិនមែនជានាឡិកាឆ្លាតវៃ។
ទី២. ទៅមើលទីតាំងប្រឡងជាក់ស្ដែង ៖ ប្អូនៗជាបេក្ខជនប្រឡងអាចជិះទៅមើលទីតាំងមណ្ឌលប្រឡង លេចតុ លេខបន្ទប់ ឱ្យបានយ៉ាងហោចណាស់ម្ដងទៅពីរដង។ ជិះតាមផ្លូវឱ្យស្ទាត់ ហើយស្មានមើលថា រយៈពេលធ្វើដំណើរពីផ្ទះទៅមណ្ឌលប្រឡងចំណាយពេលប៉ុន្មាន? ជៀសវាងការវង្វេងផ្លូវ ធ្វើឱ្យមានការយឺតយ៉ាវនៅក្នុងថ្ងៃប្រឡង។ ក្រៅពីមើលលេខបន្ទប់ និងលេខតុ យើងក៏អាចពិនិត្យមើលបរិវេណសាលា ដើម្បីងាយស្រួលដល់ការប្រឡង។ ឧទាហរណ៍ តើបន្ទប់ទឹកណាដែលនៅជិតបន្ទប់ប្រឡងយើងជាងគេ?
ទី៣. ត្រូវថែរក្សាសុខភាពឱ្យបានមាំមួន ៖ ប្អូនៗដែលជាបេក្ខជនប្រឡងគួរគេងឱ្យបានគ្រប់គ្រាន់ក្នុងមួយថ្ងៃយ៉ាងហោចណាស់ ៧ទៅ៨ម៉ោង, ផឹកទឹកឱ្យបានគ្រប់គ្រាន់ និងបរិភោគអាហារណាដែលមានសារធាតុបំប៉ន ហើយទទួលទានឱ្យបានទៀងពេល។ កាលណាយើងមានសុខភាពល្អ នោះខួរក្បាលយើងនឹងដំណើរការបានល្អ មិនងាយភ្លេចរូបមន្ត ហើយក៏ធ្វើឱ្យដំណើរការប្រឡងរបស់យើងទទួលបានលទ្ធផលល្អ។ លើសពីនេះ ជៀសវាងញ៉ាំអាហារណាដែលអាចប៉ះពាល់ដល់សុខភាព ដូចជា អាហារខ្ចប់ អាហារបំពង របស់ផ្អាប់ ឬគ្រឿងកំប៉ុងជាដើម។ ជាពិសេស គឺមួយយប់មុនពេលប្រឡង ដោយសារវាអាចធ្វើឱ្យប៉ះពាល់ដល់សុខភាពរបស់យើងនៅថ្ងៃប្រឡង និងអាចបង្អាក់ដល់ដំណើរការប្រឡងរបស់យើង។
ទី៤. កុំសម្រុកមើលមេរៀនខ្លាំងពេក ៖ យើងអាចរម្លឹកមេរៀនដែលសំខាន់ៗ ដើម្បីអាចសម្រាកខួរក្បាលបានខ្លះ។ ប្រសិនអាច កុំធ្វើដំណើរផ្លូវឆ្ងាយ ហើយនៅផ្ទះដើម្បីសម្រាកយកកម្លាំង។ មកដល់ពេលនេះប្អូនៗ ច្បាស់ជាមានភាពភ័យខ្លាច មិនដឹងថា ដល់ថ្ងៃប្រឡងធ្វើបានល្អ ឬមិនល្អ ប៉ុន្តែអ្វីដែលសំខាន់ជាងគេត្រូវតាំងស្មារតីឱ្យបាននឹងនរ គិតតែរឿងវិជ្ជមាន ហើយជឿជាក់ទៅលើខ្លួនឯង ដោយសារតែយើងបានរៀនត្រៀមសម្រាប់ការប្រឡងបាក់ឌុបនេះយូរមកហើយ។ ដូច្នេះ យើងត្រូវជឿជាក់លើសមត្ថភាពខ្លួនឯង គិតរឿងវិជ្ជមាន ហើយជឿជាក់ថា ប្អូនៗទាំងអស់គ្នានឹងធ្វើបានលទ្ធផលល្អក្នុងថ្ងៃប្រឡង៕
