ចំណេះដឹងផ្នែកហិរញ្ញវត្ថុ គឺចាំបាច់ចំពោះមនុស្សគ្រប់វ័យ ពីព្រោះមនុស្សគ្រប់រូបត្រូវប្រើប្រាស់ប្រាក់ជារៀងរាល់ថ្ងៃ។ ទន្ទឹមគ្នានេះ ការមានចំណេះដឹងហិរញ្ញវត្ថុ នឹងជំរុញយុវជនយល់ដឹងពីសារៈសំខាន់នៃការសន្សំលុយផងដែរ។

លោក ឆាយ វីវូឌីន គ្រូបង្គោលអប់រំផ្នែកហិរញ្ញវត្ថុ មានប្រសាសន៍ថា ការសន្សំជួយយើងបានច្រើននៅពេលត្រូវការប្រើប្រាស់ថវិកាបន្ទាន់។ លោកបន្តថា ដើម្បីសន្សំលុយបាន គឹត្រូវជៀសវាងចាយហើយ ចាំសល់ទើបសន្សំតាមក្រោយ មានន័យថា នៅពេលមានចំណូលភ្លាមត្រូវគិតពីផែនការសន្សំភ្លាម នោះទើបការសន្សំជោគជ័យ។ ដូច្នេះ យើងត្រូវផ្ដើមពីការសន្សំម្ដងបន្តិចៗ ហើយធ្វើវាឱ្យទៀងទាត់ នោះយើងនឹងមានទម្លាប់ល្អក្នុងការចាត់ចែងថវិកា។

លោក ឆាយ វីវូឌីន បញ្ជាក់ថា ការសន្សំលុយ គឺត្រូវគិតចាប់តាំងពីវ័យកុមារមកម៉្លេះ ដោយឪពុកម្ដាយត្រូវបង្រៀនកូនក្មេងឱ្យចេះសន្សំ។ ហើយសម្រាប់យុវជន ការសន្សំជួយការពារហានិភ័យមួយចំនួនដែលកើតឡើងដោយមិនបានគ្រោងទុក។ ជាពិសេស ជៀសវាងការខ្ចីលុយគេ ទោះផ្លូវការ ឬមិនផ្លូវការ យើងនឹងជាប់បំណុលគេ ហើយចាំបាច់ត្រូវសងគេវិញ។

លោក ឆាយ វីវូឌីន បន្ថែមថា សម្រាប់យុវជននៅវ័យសិក្សា ការសន្សំគឺពិតជាសំខាន់ ដោយយើងអាចសន្សំប្រាក់ចំណូលដែលបានមកពីឪពុកម្ដាយផ្គត់ផ្គង់ ប៉ុន្តែប្រសិនបើរៀនបណ្ដើរ ធ្វើការបណ្ដើរ គឺត្រូវតែមានការសន្សំសម្រាប់អនាគត។

“យុវជន ត្រូវមានទម្លាប់ក្នុងសន្សំ កាត់បន្ថយចំណាយដែលមិនចាំបាច់ ដើម្បីលើកកម្ពស់គុណភាពជីវិតថ្ងៃអនាគត”

កញ្ញា ណឺ មិនា​ ជាអ្នកសារព័ត៌មានសេរី និយាយថា ការសន្សំសំខាន់ដោយសារនៅពេលយើងមានបញ្ហាបន្ទាន់ណាមួយកើតឡើងដែលមិនបានដឹងមុន យើងអាចយកលុយសន្សំមកប្រើប្រាស់បាន។ ប៉ុន្តែប្រសិនបើយើងគ្មានលុយសន្សំ ធ្វើឱ្យយើងពិបាកក្នុងការខ្ចីលុយអ្នកដទែ។

យុវតីជាអ្នកសារព័ត៌មានរូបនេះ បន្ថែមថា ប្រសិនជាយើងអាចបែងចែកថវិកាដើម្បីសន្សំ គឺជារឿងល្អប្រសើរ ទោះបីយើងមានប្រាក់ខែតិចក្ដី ឬច្រើនក្ដី គឺគួរតែចាប់ផ្ដើមរៀនសន្សំ។ មិនា​ បន្តថា នៅពេលរូបគេអាចសន្សំលុយបាន គឺធ្វើឱ្យ ទី១.សុខភាពផ្លូវចិត្តរឹងមាំជាងមុន ទី២.ហិរញ្ញវត្ថុស្ថិតស្ថេរ និង ទី៣.ទំនាក់ទំនងក្នុងសង្គមល្អប្រសើរ។

កញ្ញា ណឺ មិនា​ ក៏បានលើកទឹកចិត្តយុវជនឱ្យចាប់ផ្ដើមសន្សំលុយបណ្ដើរៗ ព្រោះយើងនៅក្មេង មានពេលវេលាច្រើនក្នុងការសន្សំ កុំចាំដល់ពេលមានលុយច្រើនទើបសន្សំ។ លើសពីនេះ សិក្សាស្រាវជ្រាវពីចំណេះដឹងហិរញ្ញវត្ថុឱ្យបានច្រើន។

លោក ហ៊ុន សុវិជ្ជា និស្សិតឆ្នាំទី១ ជំនាញប្រព័ន្ធផ្សព្វផ្សាយ និងទំនាក់ទំនង នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) យល់ថា ការសន្សំសំខាន់ពីព្រោះការសន្សំ គឺជាផ្នែកមួយនៃជីវិតដែលនាំឱ្យយើងផ្លាស់ប្ដូរឥរិយាបទក្នុងការចាត់ចែងថវិកា ដើម្បីជៀសវាងបំណុល។

និស្សិតឆ្នាំទី១ ជំនាញប្រព័ន្ធផ្សព្វផ្សាយ និងទំនាក់ទំនង បន្ថែមថា រូបគាត់ចេះសន្សំតាំងពីនៅក្មេង ដោយសារក្រុមគ្រួសារបានធ្វើជាគំរូ ក៏ដូចជាបង្រៀនឱ្យចេះសន្សំលុយតាំងពីក្មេង។ សុវិជ្ជា បន្តថា ការសន្សំលុយ​ អាចជួយឱ្យលោកមានភាពជឿជាក់លើខ្លួនឯង គ្មានភាពភ័យខ្លាច គ្មានស្រ្តេស ព្រោះនៅពេលមានបញ្ហាគ្រួសារ ការបាត់បង់ការងារ ឬបញ្ហាណាមួយកើតឡើងដោយមិនបានគ្រោងទុក ក៏អាចមានប្រាក់សន្សំយកមកប្រើបានភ្លាមៗ។

លោក ហ៊ុន សុវិជ្ជា ក៏បានលើកទឹកចិត្តយុវជនផ្សេងទៀត ត្រូវមានទម្លាប់ក្នុងការសន្សំដើម្បីសម្រេចគោលដៅ ហើយត្រូវមានទស្សនៈផ្ទាល់ខ្លួនថា យើងត្រូវតែសន្សំមិនថាតិច ឬច្រើន ទោះសន្សំចាប់ពី ១០០រៀលក៏ដោយ។ លើសពីនេះ ត្រូវរៀនសូត្របន្ថែមពីមនុស្សជុំវិញខ្លួន ជាពិសេសអ្នកពូកែសន្សំ គឺនឹងជួយយើងឱ្យទៅដល់ការសម្រេចផែនការហិរញ្ញវត្ថុ។

គួរជំរាបបជូនថា​ គោលដៅចម្បងរបស់ចំណេះដឹងផ្នែកហិរញ្ញវត្ថុ គឺការអប់រំឱ្យមនុស្សចេះគ្រប់គ្រងថវិការបស់​ខ្លួន និងយល់ពីសារៈសំខាន់អំពីការសន្សំប្រាក់ និងការវិនិយោគ ដើម្បីទទួលបានសេរីភាពផ្នែកហិរញ្ញវត្ថុ និងជីវភាពធូរធារនាពេលអនាគត​៕