ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីដើមសប្តាហ៍នេះ (២៩ កក្កដា) ក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រកាសដាក់ឱ្យអនុវត្តគោលនយោបាយស្តីពីការថែទាំជំនួសចំពោះកុមារ ក្នុងការលើកកម្ពស់សិទ្ធិកុមារ ដើម្បីទទួលបានការគាំពារ និងឧត្តមប្រយោជន៍ពេញលេញ។
បើតាមក្រសួងសង្គមកិច្ច អតីតយុទ្ធជន និងយុវនីតិសម្បទា គោលនយោបាយនេះ ត្រូវបានកែសម្រួលឡើងវិញ ដោយមានការគាំទ្រពីអង្គការយូនីសេហ្វ និងអង្កការដៃគូពាក់ព័ន្ធ ក្នុងគោលដៅធានាថា កុមារដែលពុំទទួលបានការថែទាំពីឪពុកម្តាយ អាចរស់នៅបរិយាកាសគ្រួសារដែលមានស្ថិរភាព ទទួលបានការលើកកម្ពស់សុខុមាលភាព និងការលូតលាស់ ព្រមទាំងកំណត់ថា ការថែទាំនៅតាមមណ្ឌល គួរត្រូវបានប្រើប្រាស់ជាជម្រើសចុងក្រោយ នៅពេលដែលគ្មានជម្រើសថែទាំនៅតាមគ្រួសារ និងសហគមន៍។
ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា គោលនយោបាយស្តីពីការថែទាំជំនួសនេះ គឺជាវឌ្ឍនភាពថ្មីមួយលើការកំណែទម្រង់ការងារថែទាំជំនួសចំពោះកុមារ ដែលត្រូវចាត់ទុកថា ជាបរិបទមួយយ៉ាងសំខាន់ក្នុងការខិតខំគិតគូររួមគ្នាដើម្បីឧត្តមប្រយោជន៍កុមារនៅកម្ពុជា តាមរយៈការធ្វើឱ្យប្រសើរឡើងនូវគុណភាពសេវា ការគ្រប់គ្រងមណ្ឌលថែទាំកុមារ ការលើកកម្ពស់ការថែទាំកុមារនៅតាមគ្រួសារ និងសហគមន៍ស្របតាមច្បាប់ជាតិ អន្តរជាតិ និងកម្មវិធីគោលនយោបាយរបស់រាជរដ្ឋាភិបាលនីតិកាលទី៧ ជាពិសេសគោលការណ៍ នៃការថែទាំជំនួសចំពោះកុមាររបស់អង្គការសហប្រជាជាតិ ក្នុងនាមជាប្រទេសហត្ថលេខី នៃអនុសញ្ញាអន្តរជាតិស្តីពីសិទ្ធិកុមារ។
លោកបណ្ឌិត វីល ផាកស៍ នាយកយូនីសេហ្វប្រចាំប្រទេសកម្ពុជា មានប្រសាសន៍ថា ការថែទាំកុមារនៅតាមគ្រួសារ គឺជាជម្រើសដ៏ល្អបំផុតសម្រាប់កុមារគ្រប់រូប ព្រោះវាជំរុញឱ្យមានការលូតលាស់ល្អ ទាំងផ្លូវអារម្មណ៍ ផ្លូវចិត្ត និងសង្គមរបស់កុមារ។
គោលនយោបាយដ៏សំខាន់នេះ មានលក្ខណៈស្របតាមស្តង់ដារសកលលោក និងត្រូវបានរៀបចំឡើងដោយមានកិច្ចខិតខំប្រឹងប្រែង និងសហប្រតិបត្តិការជាមួយក្រសួង ស្ថាប័នជាតិ និងអង្គការដៃគូ បានបង្ហាញពីការប្តេជ្ញាចិត្តរួមគ្នា ក្នុងការលើកកម្ពស់កិច្ចការពារកុមារគ្រប់រូប និងសិទ្ធិរបស់ពួកគេក្នុងការលូតលាស់នៅក្នុងបរិយាកាសមានការគាំទ្រ ថែរក្សា និងស្ថិរភាព
លោកបណ្ឌិត វីល ផាកស៍ នាយកយូនីសេហ្វប្រចាំប្រទេសកម្ពុជា
របាយការណ៍ចេញផ្សាយកាលពីឆ្នាំ២០២៣បានបង្ហាញថា មានកុមារ និងយុវជន ចំនួនជាង ៩ពាន់នាក់ បានរស់នៅតាមកន្លែងថែទាំចំនួន ២៧០កន្លែង ដែលរួមមានមណ្ឌលថែទាំកុមារ ផ្ទះស្នាក់នៅបណ្តោះអាសន្ន ផ្ទះស្នាក់នៅជាក្រុម វត្តអារាម និងអគារសាសនា និងអន្តេវាសិកដ្ឋាន។ ទិន្នន័យនេះ បានបង្ហាញពីការថយចុះយ៉ាងខ្លាំងគួរឱ្យកត់សម្គាល់ បើធៀបនឹងទិន្នន័យក្នុងឆ្នាំ២០១៥ ដែលមានកុមារ និងយុវជនប្រមាណជាង ៣ម៉ឺន៥ពាន់នាក់ បានរស់នៅតាមកន្លែងថែទាំចំនួន ៦៣៩កន្លែង។
យ៉ាងណាក៏ដោយ តាមរយៈគោលនយោបាយ “ថែទាំជំនួសចំពោះកុមារ” ក្រសួងសង្គមកិច្ច អតីតយុទ្ធជន និងយុវនីតិសម្បទា បានប្តេជ្ញាបន្តខិតខំប្រឹងប្រែងបំពេញបេសកកម្មការងាររបស់ខ្លួនបន្ថែមទៀត ដើម្បីធានាថា កុមារកំព្រា កុមារត្រូវបានគេបោះបង់ ក៏ដូចជាកុមាររងគ្រោះ និងងាយរងគ្រោះដ៏ទៃទៀត ទទួលបានការការពារ និងផលប្រយោជន៍ ស្របតាមចក្ខុវិស័យរបស់រាជរដ្ឋាភិបាល ដោយផ្តោតលើការអភិវឌ្ឍមូលធនមនុស្ស និង គោលការណ៍របស់រាជរដ្ឋាភិបាលកម្ពុជា គឺមិនទុកប្រជាពលរដ្ឋណាម្នាក់ចោល ដោយមិនបានយកចិត្តទុកដាក់នោះទេ៕
