ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នាព្រឹកថ្ងៃទី១៥ ខែមីនា ឆ្នាំ២០២៤ នៅវិមានសន្តិភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានលើកឡើងពីការវិវត្តនៃកម្មវិធីនយោបាយអាទិភាព៦ចំណុច របស់រាជរដ្ឋាភិបាលដែលបានដាក់ឱ្យអនុវត្តក្រោយរាជរដ្ឋាភិបាលថ្មីឡើងកាន់តំណែង។ ក្នុងនោះសម្រាប់វិស័យអប់រំ រាជរដ្ឋាភិបាលបានធ្វើការកែទម្រង់ និងកំពុងអនុវត្តនីតិវិធីជ្រើសរើសសាលារៀនគោលដៅចំនួន៥០ ដើម្បីអនុវត្តកម្មវិធីក្រៅម៉ោងសិក្សា ផ្តោតលើសីលធម៌ ចរិយាធម៌ និងការចូលរួមសហគមន៍។

តាមប្រសាសន៍របស់សម្តេចធិបតី ហ៊ុន ម៉ាណែត ពេលនេះ រាជរដ្ឋាភិបាលបានរៀបចំក្រុមការងារ និងកំពុងអនុវត្តនីតិវិធីជ្រើសរើសសាលារៀនគោលដៅចំនួន៥០ ស្ថិតនៅកម្រិតបឋមសិក្សានៅតាមបណ្តារាជធានីខេត្តចំនួន៩ សម្រាប់អនុវត្តជំហានដំបូង ដោយផ្តោតលើកម្មវិធីក្រៅម៉ោងសិក្សាចំនួន២ម៉ោងបន្ថែម រួមមាន៖ វិន័យ សីលធម៌ ចរិយាធម៌ ការងារស្ម័គ្រចិត្តសហគមន៍ ការចូលរួមសហគមន៍ និងវត្តអារាម។

ខ្ញុំសូមបញ្ជាក់ថា ការជ្រើសរើសមូលដ្ឋានដែលចាប់ផ្តើមពីបឋមសិក្សានេះ គឺស្ថិតនៅក្នុងគោលដៅ និងផែនការក្នុងការពង្រឹងពីថ្នាក់មត្តេយ្យ រហូតដល់ថ្នាក់ទី១២ ដែលជាមូលដ្ឋាន, ប៉ុន្តែដោយសារចំនួនសាលាច្រើន យើងចាប់ផ្តើមពីកម្រិត ដែលជាមូលដ្ឋានគ្រឹះចាប់ផ្តើមពីបឋមសិក្សាតែម្តង ដោយចាប់ផ្តើមអនុវត្តគម្រោងជំហានដំបូងចំនួន៥០បឋមសិក្សា…

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា

បើតាមការបញ្ជាក់របស់សម្តេចធិបតី ការអនុវត្តគម្រោងកម្មវិធីនេះ នឹងអនុវត្តជាផ្លូវការក្នុងពេលឆាប់ៗនេះ។

គួររំលឹកថា ក្នុងឱកាសជួបជាមួយប្រជាពលរដ្ឋខ្មែរនៅសហរដ្ឋអាមេរិក កាលពីដើមឆ្នាំនេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានមានប្រសាសន៍ថា រាជរដ្ឋាភិបាលអាណត្តិទី៧ នឹងផ្តោតលើការពង្រឹងគុណធម៌ សីលធម៌ ពីថ្នាក់មត្តេយ្យសិក្សា រហូតដល់ថ្នាក់ទី១២ ដោយធ្វើយ៉ាងណាឱ្យការអប់រំមិនត្រឹមតែពង្រឹងមនុស្សឱ្យចេះអក្សរ មានសមត្ថភាព តែត្រូវគួបផ្សំជាមួយនឹងគុណធម៌ សីលធម៌ និងឥរិយាបទល្អ។ សម្តេចបញ្ជាក់ថា អត្តចរិតពិតជាសំខាន់ណាស់សម្រាប់ធនធានមនុស្សយើង៕