មហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ ប្រព្រឹត្តទៅនៅផ្សារទំនើបអុីអនមានជ័យ នៅថ្ងៃទី១០ និង១១ ខែឧសភា ឆ្នាំ២០២៤ ដោយ​ឆ្នាំនេះ មហោស្រព​នៅ​បន្តបំផុសគំនិតនវានុវត្តន៍ ក្នុងការលើក​កម្ពស់បរិស្ថាន ក៏ដូចជាលើកកម្ពស់ការអប់រំស្ទែម។

នៅក្នុងមហោស្រពពិព័រណ៍វិទ្យាសាស្រ្តកម្ពុជាលើកទី១៨នេះ មានការតាំងបង្ហាញគម្រោងស្ទែមជាង២០០គម្រោង ស្នាដៃសិល្បៈគំនូរជាង៥៥០ផ្ទាំង និងទស្សនីយភាពសិល្បៈចម្រុះជាង៣០ គម្រោងស្ទែមនីមួយៗសុទ្ធតែស្តែងចេញពីនវានុវត្តន៍ចម្រុះសំខាន់ៗ ដូចជាផ្នែកថាមពលកកើតឡើងវិញ ការគ្រប់គ្រងកាកសំណល់ ការអភិរក្សជីវចម្រុះ និងកសិកម្មប្រកបដោយនិរន្តរភាពជាដើម។

លោកស្រី អ៊ាង និធិជ្ជនី ដឺណេ នាយកប្រតិបត្តិនៃអង្គការពិព័រណ៍វិទ្យាសាស្រ្តកម្ពុជា បានថ្លែងថា មហោស្រពរបស់យើងមានសកម្មភាពចម្រុះជាច្រើន ដែលជាអាទិ៍រួមមានការតាំងបង្ហាញគម្រោងវិទ្យាសាស្រ្តរបស់សិស្ស-និស្សិត ការធ្វើពិសោធន៍វិទ្យាសាស្រ្តផ្ទាល់ជាក់ស្តែង ការចែករំលែកចំណេះដឹងរបស់វាគ្មិនសំខាន់ៗ និងការប្រកួតប្រជែងនានាជាច្រើនទៀតផងដែរ។ ទាំងនេះជាកត្តាជំរុញការអភិវឌ្ឍការយល់ដឹងអំពីសារៈសំខាន់នៃបរិស្ថានប្រកបដោយចីរភាព និងតួនាទីនៃការអប់រំស្ទែមក្នុងការបង្កើតប្រយោជន៍រួម និងមានផលជាវិជ្ជមាន។ ក្នុងនោះដែរ យើងមានការប្រកួតគំនូរសម្រាប់កុមារ ក្រោមប្រធានបទ “ទម្លាប់ប្រចាំថ្ងៃរបស់ខ្ញុំដើម្បីសង្គ្រោះបរិស្ថាន” ដែលជាមធ្យោបាយមួយក្នុងការជំរុញឱ្យពួកគាត់ចូលរួមថែរក្សាបរិស្ថាន តាមរយៈការអនុវត្តល្អៗ និងភាពច្នៃប្រឌិត។

ឯកឧត្តម ជួប ប៉ារីស៍ រដ្ឋលេខាធិការ​ក្រសួងបរិស្ថាន​ មានប្រសាសន៍ថា ក្រសួងបរិស្ថាន​គាំទ្រ​ស្ទែមពេញទំហឹង ដោយថា ស្ទែម គឺជាផ្នែកមួយ នៃ​យុទ្ធសាស្រ្ត​ចក្រាវិស័យបរិស្ថាន ដែល​ក្រសួងកំពុងតែអនុវត្ត។ ជាមួយគ្នា ឯកឧត្តម​រដ្ឋលេខាធិការ ក៏​បានអំពាវនាវ​ដល់សិស្សានុសិស្ស ក៏​ដូចជា​យុវជន ដែល​កំពុង​ចាប់អារម្មណ៍ និង​រៀន​ពីស្ទែម ឱ្យបន្ត​ខិតខំបន្ថែមទៀត ។ តាមប្រសាសន៍​បញ្ជាក់របស់ ឯកឧត្តម ជួប ប៉ារីស៍ ជំនាញស្ទែម គឺជាកត្តាសំខាន់ ក្នុងការ​សម្រេច​បាន​នូវចក្ខុវិស័យ​​កម្ពុជា​ក្លាយ​ទៅជា​ប្រទេស​មាន​ប្រាក់ចំណូល​ខ្ពស់​ក្នុងឆ្នាំ​២០៥០។

មហោស្រពពិព័រណ៍វិទ្យាសាស្រ្តកម្ពុជាលើកទី១៨ ដែលប្រព្រឹត្តទៅរយៈពេលពីរថ្ងៃ ត្រូវគេ​រំពឹងថា នឹងក្លាយជាថ្នាលអប់រំសម្រាប់សិស្ស-និស្សិតនៅទូទាំងប្រទេសកម្ពុជា ដើម្បីអាចបង្ហាញស្នាដៃគម្រោងស្ទែមដ៏អស្ចារ្យ និងរស់រវើក ក៏ដូចជាជំរុញការពិភាក្សាគ្នាអំពីការថែរក្សាបរិស្ថាន និងបច្ចេកវិទ្យាបៃតងផងដែរ។ ក្រៅពីការជំរុញការបង្កើតថ្មី មហោស្រពពិព័រណ៍វិទ្យាសាស្រ្តកម្ពុជាបានបោះជំហានយ៉ាងសំខាន់ក្នុងការលើកកម្ពស់ចីរភាពនៃបរិស្ថាន។ តាមរយៈការអនុវត្តល្អ និងគំនិតផ្តួចផ្តើមសំខាន់ៗ នៅឆ្នាំនេះ គេអាចគ្រប់គ្រង និងកាត់បន្ថយការប្រើប្រាស់ផ្លាស្ទិកចំនួន ១០.០០០ មុខ ដូចជាដប កែវ និងបំពង់បឺតផ្លាស្ទិកជាដើម ដែលនេះជាគោលដៅកាត់បន្ថយការបោះចោលកាកសំណល់ចូលបរិស្ថាន និងធ្វើជាគំរូវិជ្ជមានសម្រាប់ព្រឹត្តិការណ៍នាពេលក្រោយៗទៀត៕