ដោយ​មានការ​គាំទ្រពី​ក្រសួងបរិស្ថាន និង​ក្រសួងអប់រំ យុវជន និងកីឡា មហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ នឹងប្រព្រឹត្តទៅនៅថ្ងៃទី១០ និង១១ ខែឧសភា ឆ្នាំ២០២៤ ចុងសប្តាហ៍នេះ នៅផ្សារទំនើបអ៊ីអនម៉លមានជ័យ ក្រោម​មូលបទ “ចីរភាពតាមរយៈនវានុវត្តន៍បៃតង” ។

មូលបទ “ចីរភាពតាមរយៈនវានុវត្តន៍បៃតង” នៃមហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ មានគោល​បំណង​ជំរុញឱ្យអ្នកចូលរួមកំណត់រកចំណុចរួមមួយនៃវិទ្យាសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា (STEAM) ដោយយកបញ្ហាបរិស្ថានធ្វើជាចំណុចឆ្លុះបញ្ចាំង។ ទន្ទឹមនឹងការដោះស្រាយបញ្ហាបម្រែបម្រួលអាកាសធាតុ និងការរេចរឹលនៃបរិស្ថានដែលជាការចាំបាច់បន្ទាន់ មហោស្រពរបស់យើងទៀតសោតក៏នឹងចូលរួមលើកទឹកចិត្តសិស្ស-និស្សិតឱ្យបង្ហាញស្នាដៃក្នុងការបង្កើតគម្រោងស្ទែមនានា តាមរយៈនវានុវត្តន៍បៃតង ដើម្បីធានាបាននូវបរិស្ថានបៃតងស្អាតកាន់តែបវរជូនប្រទេសកម្ពុជា។

ដើម្បីជំរុញការប្តេជ្ញាសម្រេចតាមគោលដៅ នៃការអប់រំស្ទែមឱ្យបាន ម្ចាស់ឧបត្ថម្ភកម្មវិធីធំៗដែលមានដូចជា ក្រសួងបរិស្ថាន និងក្រុមហ៊ុន SMART Axiata រួមទាំងក្រុមហ៊ុនផារ៉ាហ្គន អេឌ្យូខេសិន និង KILAT Events ដែលជាដៃគូសហការ បានរួមគ្នាគាំទ្រការរៀបចំមហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ នេះឡើង។ ការរួមចំណែកនេះគឺជាកាយវិការមួយដ៏សំខាន់ក្នុងការជំរុញឱ្យយុវជនកម្ពុជាយើងមានវប្បធម៌ចេះប្រើប្រាស់វិទ្យាសាស្រ្ត និងនវានុវត្តន៍មកធ្វើជាមធ្យោបាយក្នុងការសិក្សារៀនសូត្រ។

មហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ នឹងមានសកម្មភាពចម្រុះជាច្រើន ហើយជាអាទិ៍រួមមានការតាំងបង្ហាញគម្រោងវិទ្យាសាស្រ្តរបស់សិស្ស-និស្សិត ការពិសោធវិទ្យាសាស្រ្តផ្ទាល់ជាក់ស្តែង កម្មវិធីទស្សនីយភាពផ្សេងៗ ការចែករំលែកចំណេះដឹងរបស់វាគ្មិនសំខាន់ៗ និងការប្រកួតប្រជែងនានាជាច្រើនទៀតផង។ សិស្ស-និស្សិតមកពីសាលារៀន និងសាកលវិទ្យាល័យនានាទូទាំងប្រទេសកម្ពុជានឹងមានឱកាសបង្ហាញស្នាដៃក្នុងការបង្កើតគម្រោងស្ទែម និងចូលរួមជាមួយមិត្តអ្នកសិក្សា លោកគ្រូ អ្នកគ្រូ អ្នកជំនាញក្នុងវិស័យសំខាន់ៗ ក៏ដូចជាតំណាងរដ្ឋាភិបាលផងដែរ។

ក្រៅពីការដាក់តាំងបង្ហាញគម្រោងស្ទែម ក៏មានការប្រកួតគំនូរ ដែលផ្ដោតសំខាន់លើប្រធានបទ “ទម្លាប់ប្រចាំថ្ងៃរបស់ខ្ញុំដើម្បីសង្គ្រោះបរិស្ថាន” ។ ការប្រកួតប្រជែងនេះត្រូវបានរៀបចំឡើងដើម្បីបំផុសគំនិត និងជួយឱ្យប្អូនៗកុមារចេះស្វែងយល់អំពីការអនុវត្តជាក់ស្តែងក្នុងជីវិតប្រចាំថ្ងៃ ដើម្បីចូលរួមការពារបរិស្ថាន។ មិនតែប៉ុណ្ណោះ ការបញ្ចេញភាពច្នៃប្រឌិតតាមរយៈការគូរគំនូរនឹងជួយឱ្យពួកគាត់ស្គាល់អំពីទម្លាប់សាមញ្ញធម្មតាៗ ដែលអាចនាំមកនូវផលហុចឱ្យខ្ពស់ដល់ការថែរក្សាបរិស្ថានទៀតផង។

លោកស្រី អ៊ាង និធិជ្ជនី ដឺណេ នាយកប្រតិបត្តិ នៃអង្គការពិព័រណ៍វិទ្យាសាស្រ្តកម្ពុជា មានប្រសាសន៍ថា ៖ “យើងមានសេចក្តីរំភើបរីករាយក្នុងការរៀបចំមហោស្រពពិព័រណ៍វិទ្យាសាស្រ្តកម្ពុជាប្រចាំឆ្នាំលើកទី១៨ ដោយកៀរគរសិស្ស-និស្សិត លោកគ្រូ អ្នកគ្រូ និងដៃគូសហការក្នុងវិស័យនេះ ដើម្បីអបអរសាទរកិច្ចការរួមគ្នា និងនវានុវត្តន៍បៃតង ដែលជាកម្លាំងចលករដ៏សំខាន់មួយ។ ទន្ទឹមនឹងការជំរុញការស្រឡាញ់ចូលចិត្តការអប់រំស្ទីម (STEAM) និងចីរភាពនៃបរិស្ថាន យើងកំពុងតម្រង់ទៅរកការលើកកម្ពស់ការកសាងសមត្ថភាពរបស់យុវជនជំនាន់ក្រោយឱ្យក្លាយជាអ្នកដោះស្រាយបញ្ហា និងបង្កើតឱ្យមានការផ្លាស់ប្ដូរថ្មី សំដៅដឹកនាំប្រទេសកម្ពុជាឆ្ពោះទៅរកអនាគតកាន់តែត្រចះត្រចង់ និងមានចីរភាព”។

រួមគ្នាបំផុសគំនិត និងលើកតម្កើងយុវជនកម្ពុជាឱ្យក្លាយជាអ្នកដឹកនាំទៅថ្ងៃអនាគតនាសម័យកាលដែលមានស្ទែមជាយាន