ក្នុងចំណោមកុមារ ក្មេងជំទង់ និងយុវជន ចំនួន ១,២ពាន់លាននាក់ទូទាំងពិភពលោក មាន ១៦ភាគរយ កំពុងស្ថិតក្នុងដំណាក់កាលជីវិត ដែលត្រូវធ្វើការសម្រេចចិត្តសំខាន់ៗជាច្រើន។ ពួកគេកំពុងប្រឈមមុខនឹងអនាគត ដែលបច្ចេកវិទ្យាមានការវិវត្តន៍ឥតឈប់ឈរ ភាពច្របូកច្របល់ផ្នែកសេដ្ឋកិច្ច និងការវិវត្តនៃសង្គម ដែលទាមទារពីមនុស្សវ័យក្មេងច្រើនជាងមនុស្សជំនាន់មុនៗ។

បើទោះបីជាទីផ្សារការងារពិភពលោក មានភាពប្រសើរឡើងក៏ដោយ ភាពអត់ការងារធ្វើរបស់យុវជននៅតែជាកង្វល់ដ៏ធំមួយដដែល។ នៅឆ្នាំ២០២៣ យុវជនចំនួន ៦៤,៩លាននាក់ ដែលមានអាយុពី ១៥ ទៅ២៤ឆ្នាំ កំពុងគ្មានការងារធ្វើ ដែលអាត្រាអត់ការងារធ្វើរបស់យុវជនមាន ១៣,៦ភាគរយ ច្រើងជាងមនុស្សពេញវ័យ៣ដង។ នេះមិនមែនគ្រាន់តែជាស្ថិតិទេ វាតំណាងឱ្យក្ដីសុបិនរបស់មនុស្សរាប់លាននាក់ ដែលត្រូវពន្យារពេលចាប់យកក្ដីសុបិន មិនអាចអភិវឌ្ឍអាជីព និងមិនអាចសម្រេចសក្តានុពលពិតប្រាកដរបស់ខ្លួន។ នៅពីក្រោយតួលេខទាំងនេះ មានឧបសគ្គមួយចំនួន ដែលបង្កើតឱ្យមានបញ្ហានេះ រួមមាន ឧស្សាហកម្មស្វ័យប្រវត្តិកម្មដែលវិវត្តន៍យ៉ាងឆាប់រហ័ស ការរីកធំនៃគម្លាតជំនាញ និងអស្ថេរភាពសេដ្ឋកិច្ច។

ការអប់រំ គឺជាមូលដ្ឋានគ្រឹះ នៃការផ្ដល់សិទ្ធិអំណាចដល់យុវជន ប៉ុន្តែកុមារ និងយុវជនចំនួន ២៤៤លាននាក់ កំពុងនៅក្រៅសាលាទូទាំងពិភពលោក។ កុមារទាំងនេះ ភាគច្រើនរស់នៅក្នុងប្រទេសដែលមានប្រាក់ចំណូលទាប ជាពិសេសនៅអនុតំបន់សាហារ៉ាអាហ្វ្រិក ដែលមានច្រើនជាងពាក់កណ្ដាលនៃកុមារ ដែលនៅក្រៅសាលា និងក្មេងជំទង់ទាំងអស់នៅទូទាំងពិភពលោក។ កង្វះលទ្ធភាពទទួលបានការអប់រំប្រកបដោយគុណភាព ដែលធ្វើឱ្យឱកាសស្វែងរកការងាររបស់គេមានចំនួនកំណត់ ហើយជំរុញឱ្យវដ្តនៃភាពក្រីក្រកាន់តែធ្ងន់ធ្ងរ។

នៅពេលដែលអង្គការសុខភាពពិភពលោករាយការណ៍ថា ៥០ភាគរយ នៃបញ្ហាផ្លូវចិត្តចាប់ផ្ដើមនៅអាយុ ១៨ឆ្នាំ នេះគឺជាសារដែលគូសបញ្ជាក់ថា ពិភពលោកកំពុងជួបប្រទះនឹងភាពអាសន្នក្នុងជំនាន់មួយ។ ប៉ុន្តែករណីភាគច្រើន នៅតែមិនអាចព្យាបាល ដោយសារការមាក់ងាយ កង្វះលទ្ធភាពទទួលបានការថែទាំ និងសេវាសុខភាពផ្លូវចិត្តមិនគ្រប់គ្រាន់។ ខណៈការធ្វើអត្តឃាត គឺជាមូលហេតុឈានមុខគេមួយ នៃការស្លាប់ក្នុងចំណោមមនុស្សវ័យក្មេង។

ទិដ្ឋភាពច្របូលច្របល់នៃបញ្ហាផ្លូវចិត្តយុវជន

ខុសពីមនុស្សជំនាន់មុន យុវជនបច្ចុប្បន្ន ត្រូវប្រឈមនឹងបញ្ហាបែបប្រពៃណី និងសម្ពាធក្នុងយុគសម័យឌីជីថល។ វិបត្តិដែលយុវជនប្រឈមមុខ នឹងមិនអាចយល់ក្នុងភាពដាច់ដោយឡែក ព្រោះវាកើតចេញពីសម្ពាធក្នុងស្រុក និងពិភពលោក ដែលមានទំនាក់ទំនងគ្នាទៅវិញទៅមក ៖

កត្តាសេដ្ឋកិច្ចសង្គម ៖ អស្ថិរភាពហិរញ្ញវត្ថុ អសន្តិសុខលំនៅដ្ឋាន និងភាពតានតឹងទាក់ទងនឹងការងារ ដែលបង្កើតបរិយាកាសមិនច្បាស់លាស់សម្រាប់យុវជនទូទាំងពិភពលោក។

ការព្រួយបារម្ភអំពីបរិស្ថាន ៖ ការប្រែប្រួលអាកាសធាតុបានផ្លាស់ទីលំនៅមនុស្សវ័យក្មេង ជាមួយនឹងបញ្ហាអាកាសធាតុធ្ងន់ធ្ងរ ដែលរំខានដល់ការអប់រំកុមារយ៉ាងហោចណាស់ ២៤២លាននាក់ក្នុងប្រទេស​ ៨៥ក្នុងឆ្នាំ២០២៤។

បញ្ហាសង្គម ៖ ការប្រើប្រាស់បណ្ដាញសង្គមហួសហេតុ ការគំរាមកំហែងតាមអ៉ីនធឺណិត ភាពឯកាដែលមានអត្រាខ្ពស់បំផុត ការមិនឱ្យតម្លៃខ្លួនឯង និងការថយចុះនៃទំនាក់ទំនងក្នុងសង្គម។

សម្ពាធក្នុងការសិក្សា និងគ្រួសារ ៖ ប្រព័ន្ធអប់រំរឹងមាំ ការប្រកួតប្រជែងកើនឡើង និងការរំពឹងទុកខ្ពស់ពីគ្រួសារបង្កើតបរិយាកាសដែលបង្កភាពតានតឹងរយៈពេលវែងយ៉ាងច្រើនសម្រាប់សិស្ស។

ផលប៉ះពាល់នៃអំពើហិង្សា និងការប្រើប្រាស់សារធាតុញៀន ៖ កុមារជិត ១នាក់ ក្នុងចំណោម ៥នាក់ នៅទូទាំងពិភពលោករស់នៅក្នុងតំបន់ជម្លោះ ដោយមានកុមារជាង ៤៧៣លាននាក់ ទទួលរងអំពើហិង្សាធ្ងន់ធ្ងរ ដែលជាចំនួនខ្ពស់បំផុត ចាប់ពីតាំងសង្គ្រាមលោកលើកទី២មក។

ជំហានសំខាន់ៗ សម្រាប់ការគាំទ្រយុវជន

ការដោះស្រាយបវិបត្តិសុខផ្លូវចិត្តយុវជន ទាមទារឱ្យមានវិធានការជាបន្ទាន់ និងសម្របសម្រួលពីភាគីពាក់ព័ន្ធផ្សេងៗ ជាច្រើនរួមមាន ៖

អ្នកបង្កើតគោលនយោបាយ ៖ វិនិយោគលើវិស័យអប់រំ សុខភាពផ្លូវចិត្ត និងហេដ្ឋារចនាសម្ព័ន្ធការងាររបស់យុវជន និងចូលរួមជាមួយយុវជនឱ្យបានសកម្មក្នុងការពិភាក្សា អំពីគោលនយោបាយ ។

សាជីវកម្ម ៖ ផ្ដល់ការណែនាំ ការបណ្ដុះបណ្ដាលជំនាញ និងបង្ហាញផ្លូវសម្រាប់ការអភិវឌ្ឍអាជីព។ តាមរយៈការគាំទ្រដល់យុវជន ក្រុមហ៊ុន សាជីវកម្ម កំពុងតែបង្កើតមូលដ្ឋានគ្រឹះសម្រាប់កម្លាំងការងារនាពេលអនាគត ដោយដោះស្រាយបញ្ហាប្រឈមផ្នែកសុខុមាលភាពសម្រាប់ពួកគេ។ តាមរយៈការផ្ដល់ឱ្យយុវជននូវកៅអី សម្រាប់ការសម្រេច ដើម្បីរៀបចំយុទ្ធសាស្ត្រសម្រាប់មនុស្សជំនាន់ក្រោយ។

សហគមន៍ និងបុគ្គល ៖ តស៊ូមតិ ដើម្បីជំរុញការយល់ដឹងអំពីសុខភាពផ្លូវចិត្តរបស់យុវជន និងគាំទ្រគំនិតផ្ដួចផ្ដើមផ្សេងៗជុំវិញការលើកកម្ពស់សុខភាពផ្លូវចិត្ត។

បើតាមវេទិកាសេដ្ឋកិច្ចពិភពលោកបញ្ជាក់ថា ប្រសិនបើបរាជ័យក្នុងការធ្វើសកម្មភាពឥឡូវនេះ នោះមនុស្សពេញមួយជំនាន់ ដែលផ្លូវចិត្តនឹងចុះខ្សោយ ភាពមិនប្រាកដប្រាជាខាងសេដ្ឋកិច្ច និងការបាត់បង់សក្តានុពល។ ប៉ុន្តែជាមួយនឹងការរៀបចំគោលនយោបាយត្រឹមត្រូវ ការរៀបចំបរិយាកាសការងារប្រកបដោយបរិយាប័ន្ន និងការផ្ដល់សិទ្ធអំណាចដល់សហគមន៍ យើងនឹងអាចដោះស្រាយបញ្ហានេះបាន៕