និស្សិតសាកលវិទ្យាល័យចិនអាយុ ១៩ឆ្នាំម្នាក់ មានបញ្ហាជើងដើរលែងរួច បន្ទាប់ពីមានទម្លាប់ឱនក្បាលយូរ អំឡុងពេលធ្វើការ និងលេងហ្គេមតាមទូរស័ព្ទ, នេះយោងតាមកាសែត VN Express។

យុវជន Xiaodong ជានិស្សិតឆ្នាំទី៣ មកពីទីក្រុង Quanzhou ខេត្ត Fujian បានធ្វើការក្រៅម៉ោង ជាបុគ្គលិកលាងចាន និងសម្អាតតុ អំឡុងពេលវិស្សមកាលរដូវក្ដៅរបស់គាត់។ បើតាម Fujian Health News បានរាយការណ៍ថា នៅម៉ោងសម្រាកពីការងារ គាត់តែងតែចំណាយពេលច្រើនជាង ២ ទៅ ៣ម៉ោង លេងហ្គេមនៅលើទូរស័ព្ទ ហើយខណៈពេលកំពុងលេងហ្គេមនោះ គាត់តែងតែអង្គុយឱនក្បាលទៅមុខ ហើយមានពេលខ្លះ គាត់មានអាការៈស្ពឹកដៃ ជើង និងកញ្ចឹងក។

នៅថ្ងៃទី៣០ ខែកក្កដា ជើងរបស់យុវជនរូបនេះ ស្រាប់តែលែងមានអារម្មណ៍ ហើយគាត់បានកត់សម្គាល់ឃើញថា ដៃរបស់គាត់ចុះខ្សោយកម្លាំង ហើយធ្វើឱ្យគាត់ត្រូវចូលបន្ទប់សង្គ្រោះបន្ទាន់នៅមន្ទីរពេទ្យលេខ១ ក្នុងទីក្រុង Quanzhou ភ្លាមៗ។

លោកវេជ្ជបណ្ឌិត Huang Jiecong អនុប្រធាននាយកដ្ឋានរបួសឆ្អឹងរបស់មន្ទីរពេទ្យបាននិយាយថា ឥរិយាបថ​ឱន​ក្បាល​ក្នុងរយៈពេលយូរ បណ្ដាលឱ្យឆ្អឹងខ្នងយុវជនរូបនេះ មានការបង្ហាប់ធ្ងន់ធ្ងរ។ ការស្កែនបង្ហាញពីកំណកឈាម ដែលសង្កត់លើខួរឆ្អឹងខ្នងរបស់យុវជន Xiaodong និងធ្វើឱ្យគាត់ គ្មានអារម្មណ៍នៅផ្នែកខាងក្រោមដើមទ្រូង និងបណ្ដាលឱ្យកម្លាំងដៃរបស់គាត់ចុះខ្សោយ។

គ្រូពេទ្យវះកាត់បានដកកំណកឈាមចេញ នៅក្នុងប្រតិបត្តិការសង្គ្រោះបន្ទាន់ ហើយចាប់តាំងពីពេលនោះមក គាត់អាចធ្វើចលនាលើផ្នែកមួយចំនួនឡើងវិញ​ ប៉ុន្តែនៅតែស្ថិតក្នុងការស្ដារឡើងវិញ។

លោក Huang បានបន្ថែមថា ការឱនជាប្រចាំអាចបង្កើនភាពតានតឹងសាច់ដុំច្រើនដងលើសទម្ងន់ក្បាល ទីបំផុតសកម្មភាពនេះ អាចបំផ្លាញសរសៃចងឆ្អឹងខ្នង និងសរសៃឈាម ហើយក្នុងករណីធ្ងន់ធ្ងរ នាំឱ្យមានបញ្ហាខ្វិនជាអចិន្ត្រៃយ៍។

លោកបានព្រមានថា ជាមួយនឹងការប្រើប្រាស់ទូរស័ព្ទស្មាតហ្វូន និងកុំព្យូទ័រយ៉ាងទូលំទូលាយ ជំងឺឆ្អឹងកងកកាន់តែកើតមានជាញឹកញាប់។ រោគសញ្ញាទូទៅរួមមាន ការរឹងក ស្ពឹកដៃ ឬជើង និងការឈឺចាប់ពេញរាងកាយ។ ករណីធ្ងន់ធ្ងរ អាចបណ្ដាលឱ្យពិបាកដើរ ឬខ្វិន។

អ្នកជំនាញផ្នែកវេជ្ជសាស្ត្របានណែនាំថា នរណាម្នាក់ ដែលមានការឈឺចាប់កជាប់រហូត រមួលក្រពើ ឬខ្សោយគួរតែស្វែងរក ការថែទាំឆ្អឹងខ្នង ដែលមានជំនាញវិជ្ជាជីវៈ ជាជាងសេវាម៉ាស្សា ឬការចាក់ម្ជុលវិទ្យាសាស្ត្រ ដែលមិនបានបញ្ជាក់ ដែលអាចពន្យារពេលព្យាបាល។ ពួកគេ ក៏ណែនាំឱ្យរក្សាឥរិយាបថឱ្យបានត្រឹមត្រូវ ជៀសវៀងការឱនសំឡឹងចុះក្រោមយូរ និងពង្រឹងសាច់ដុំតាមរយៈការធ្វើលំហាត់ប្រាណទៀងទាត់៕