ថ្ងៃដំបូងនៃដើមខែវិច្ឆិកានេះ កិច្ចប្រជុំកំពូលដ៏សំខាន់ និងជាលើកដំបូងបំផុតរបស់ពិភពលោកស្តីពីសុវត្ថិភាពបញ្ញាសិប្បនិម្មិត (AI) ឬ AI Safety Summit បានរៀបចំឡើងនៅ វិមាន Bletchley ភាគខាងជើងនៃទីក្រុងឡុងដ៍ ចក្រភពអង់គ្លេស ។ ខ្លឹមសារសំខាន់នៃកិច្ចប្រជុំអំពីបច្ចេកវិទ្យាបញ្ញាសិប្បនិម្មិតនេះ មានគោលបំណងបង្ហាញពីឱ្យឃើញកាន់តែច្បាស់ពីសារៈសំខាន់របស់បច្ចេកវិទ្យាបញ្ញាសិប្បនិម្មិត ការវិវឌ្ឍរបស់បច្ចេកវិទ្យាបញ្ញាសិប្បនិម្មិត និងហានិភ័យនានាដែលនឹងបង្កឡើងដោយច្ចេកវិទ្យាបញ្ញាសិប្បនិម្មិត ឬ AI ។

គេសង្កេតឃើញនៅក្នុងកិច្ចប្រជុំកំពូលពីសុវត្ថិភាពបញ្ញាសិប្បនិម្មិត (AI) ដែលបានបើកទ្វារជួបជុំនៅក្នុងចក្រភពអង់គ្លេស មានវត្តមានមេដឹកនាំនយោបាយ និងម្ចាស់ក្រុមហ៊ុនបច្ចេកវិទ្យាធំៗរបស់ពិភពលោកជាច្រើនរូបចូលរួមពិភាក្សាអំពីការឆ្លើយតបបញ្ហានានា ដែលអាចកើតមានដោយសារបច្ចេកវិទ្យាបញ្ញាសិប្បនិម្មិតជំរុញឱ្យមានផ្លាស់ប្រែសង្គមរស់នៅរបស់មនុស្សជាតិ ។

បើតាមការចុះផ្សាយរបស់ AFP ក្រៅពីលោក Rishi Sunak នាយករដ្ឋមន្ត្រីអង់គ្លេស កិច្ចប្រជុំនេះក៏មានវត្តមានលោកស្រី Kamala Harris អនុប្រធានាធិបតីអាម៉េរិក, លោកស្រី Ursula Vonder Leyen ប្រធានគណៈកម្មការអឺរ៉ុប, និងលោក Antonio Guterres អគ្គលេខាធិការអង្គការសហប្រជាជាតិលោក ព្រមទាំង ថ្នាក់ដឹកនាំប្រទេសក្រុមប្រទេស G7 ផងដែរ ។

លោក Rishi Sunak នាយករដ្ឋមន្ត្រីអង់គ្លេស បានលើកឡើងពីក្តីបារម្ភនានាចំពោះវត្តមាននៃការរីកចម្រើនបញ្ញាសិប្បនិម្មិត ។ អនាគតបញ្ញាសិប្បនិម្មិត ឬ AI នេះឯងអាចនឹងមានសមត្ថភាពកាន់តែខ្លាំងសរសេរកូដកម្មវិធីផ្សេងៗ ដែលអាចបង្កហានិភ័យដល់ការរស់នៅរបស់មនុស្សជាតិ ។ ប្រសិនបើមិនមានការគ្រប់គ្រងច្បាស់លាស់ នោះបច្ចេកវិទ្យា AI នឹងបង្កើតការភ័យខ្លាចដល់សន្តិសុខពិភពលោកជាក់ជាមិនខាន ។

ទន្ទឹមគ្នានេះ តាមរយៈបទអន្តរាគមន៍របស់លោក Rishi Sunak អង់គ្លេសមានបំណងជំរុញឱ្យភាគីពាក់ព័ន្ធបង្កើតក្រុមការងារអាជ្ញាកណ្តាលត្រីភាគីមួយ “third-party referee” ដែលមានតួនាទីឃ្លាំមើលក្រុមហ៊ុនជាច្រើនដែលអភិវឌ្ឍន៍៍បច្ចេកវិទ្យាបញ្ញាសិប្បនិម្មិត ឬ AI ហើយក្រុមនេះនឹងដឹងពីសញ្ញាព្រមានគ្រោះថ្នាក់ណាមួយជាមុន ប្រសិនបើមានបញ្ហាកើតឡើងដោយសារបច្ចេកវិទ្យាបញ្ញាសិប្បនិម្មិត ។

ការលើកឡើងនេះ ដោយសារអង់គ្លេសមានបំណងចង់បង្ហាញទៅកាន់មេដឹកនាំពិភពលោកថា ការគិតគូរពីសុវត្ថិភាពបញ្ញាសិប្បនិម្មិតជារឿងសំខាន់បំផុត ព្រោះវត្តមានបច្ចេកវិទ្យាបញ្ញាសិប្បនិម្មិតនេះហើយ អាចបណ្តាលឱ្យមនុស្សបាត់បង់ការងារ ព្រមទាំងមានសមត្ថភាពវាយប្រហារទិន្នន័យតាមប្រព័ន្ធអ៊ីនធឺណិត និងការគ្រប់គ្រងលើប្រព័ន្ធព័ត៌មានផ្សេងៗជាដើម ។

គួររំលឹកថា នេះជាលើកទីមួយហើយដែលពិភពលោកបានបើកជំនួបកំពូលពិភាក្សាគ្នាអំពីហានិភ័យបច្ចេកវិទ្យាដ៏ទំនើប “បញ្ញាសិប្បនិម្មិត” ដែលកំពុងវិវឌ្ឍខ្លួនយ៉ាងលឿនរហ័សនាប៉ុន្មានឆ្នាំចុងក្រោយនេះ ។ កិច្ចប្រជុំ AI Safety Summit ២០២៣ បានប្រព្រឹត្តទៅនៅក្នុងទីតាំងវិមាន Bletchley ភាគខាងជើងនៃទីក្រុងឡុងដ៍ ដែលជាកន្លែងបំបែកកូដខ្លាំងបំផុតកាលពីសម័យសង្គ្រាមលោកលើកទីពីររបស់អង់គ្លេស ៕