ចំណាត់ថ្នាក់សាកលវិទ្យាល័យក្នុងចក្រភពអង់គ្លេស និងសហរដ្ឋអាមេរិកកំពុងថយចុះ ដោយសារការកាត់បន្ថយថវិកាសម្រាប់ការស្រាវជ្រាវ។ នេះបើយោងតាមទិន្នន័យចុងក្រោយបំផុត របស់ស្ថាប័ន Times Higher Education World Rankings ដែលទើបនឹងចេញផ្សាយថ្មីៗនេះ។

Oxford គឺជាសាកលវិទ្យាល័យឈានមុខគេលើពិភពលោក ក្នុងចំណាត់ថ្នាក់ THE World University Ranking 2024 ខណៈឆ្នាំនេះជាឆ្នាំទី៨ ដែលសាកលវិទ្យាល័យនេះ បន្តឈរជាសាកលវិទ្យាល័យលំដាប់កំពូល។ ប៉ុន្តែបើតាមការវិភាគកាលពីពេលថ្មីៗនេះ បង្ហាញថា គុណភាពប្រព័ន្ធអប់រំរបស់សាកលវិទ្យារបស់អង់គ្លេស និងសហរដ្ឋអាមេរិក កំពុងធ្លាក់ចុះ។ ខណៈសាកលវិទ្យាល័យរបស់ប្រទេសចិន កំពុងខិតទៅក្នុងតារាងសាកលវិទ្យាល័យកំពូលទាំង ១០របស់ពិភពលោក ដោយបច្ចុប្បន្នមានសាកលវិទ្យាល័យចំនួន ២ ស្ថិតក្នុងចំណោមសាកលវិទ្យាល័យកំពូលៗទាំង ១៥ លើពិភពលោក ។

សាកលវិទ្យាល័យ Tsinghua និង Peking បានវ៉ាដាច់ សាកលវិទ្យាល័យ Pennsylvania, សាកលវិទ្យាល័យ Johns Hopkins និងសាកលវិទ្យាល័យ Columbia ដើម្បីឡើងមកចំណាត់ថ្នាក់ទី១២ និងទី ១៤ រៀងគ្នា នៅឆ្នាំនេះ។ ទន្ទឹមនឹងនោះ សាកលវិទ្យាល័យតូក្យូ របស់ប្រទេសជប៉ុន ឥឡូវនេះមានចំណាត់ថ្នាក់ខ្ពស់ជាង សាកលវិទ្យាល័យ Edinburgh, King’s College London និងសាលា London School of Economics and Political Science បន្ទាប់ពីបានកើនឡើងចំណាត់ថ្នាក់ចំនួន ១០ថ្នាក់ ដល់លេខរៀងទី២៩ ក្នុងពិភពលោក។

ការស៊ើបអង្កេតថ្មីនេះរបស់ The Wall Street Journal បានរាយការណ៍ថា សាកលវិទ្យាល័យសាធារណៈល្បីៗរបស់សហរដ្ឋអាមេរិក បានផ្ដោតការវិនិយោគទៅលើ អគារសិក្សាថ្មី កន្លែងស្នាក់នៅរបស់សិស្ស កម្មវិធីកីឡា និងបង្កើនការចំណាយលើប្រព័ន្ធរដ្ឋបាល។

លោក Paul Weinstein សាស្ត្រាចារ្យជាន់ខ្ពស់ផ្នែកគ្រប់គ្រងសាធារណៈនៅសាកលវិទ្យាល័យ Johns Hopkins បាននិយាយថា បច្ចុប្បន្ន រដ្ឋាភិបាលអាមេរិកបានកាត់បន្ថយថវិកាទៅលើកម្មវិធីស្រាវជ្រាវ ដូច្នេះសាកលវិទ្យាល័យគួរកាត់បន្ថយការចំណាយលើការងាររដ្ឋបាល ដោយងាកមកចំណាយ ដើម្បីធ្វើឱ្យការស្រាវជ្រាវ និងការបង្រៀនប្រសើរជាងមុន។ ទន្ទឹមនឹងនេះ លោក Simon Marginson សាស្ត្រាចារ្យនៃឧត្តមសិក្សានៅសាកលវិទ្យាល័យ Oxford បាននិយាយថា សាកលវិទ្យាល័យនៅអង់គ្លេស និងអាមេរិក គឺលើការស្រាវជ្រាវ និងគុណភាពនៃការបង្រៀន​ ព្រោះនេះជាមូលហេតុដែលអាចទាក់ទាងសិស្សនិសិ្សតមកពីជុំវិញពិភពលោក៕