មនុស្សពឹងផ្អែកលើសត្វ រុក្ខជាតិ និងអតិសុខុមប្រាណជាច្រើនប្រភេទ ដើម្បីបង្កើតបរិស្ថានរស់នៅ ដែលមានសុខភាពល្អ។ ការស្រាវជ្រាវបានបង្ហាញថា ការថយចុះជាបន្តបន្ទាប់នៃជីវចម្រុះ គឺជាការគម្រាមកំហែងដល់ជីវិតរស់នៅរបស់មនុស្ស។ ខណៈជីវចម្រុះដើរតួនាទីយ៉ាងសំខាន់ សម្រាប់សុខុមាលភាពផ្លូវចិត្តរបស់មនុស្ស។

ការសិក្សាជាច្រើនបានបង្ហាញថា ការភ្ជាប់ទំនាក់ទំនងជាមួយធម្មជាតិផ្ដល់អត្ថប្រយោជន៍ដល់សុខុមាលភាពផ្លូវចិត្ត ជាពិសេសសម្រាប់អ្នករស់នៅទីក្រុង។ ជាក់ស្ដែង ការសិក្សារបស់ NIH បានរកឃើញថា ហានិភ័យនៃការវិវត្តទៅជាជំងឺផ្លូវចិត្តពីរ ដែលរីករាលដាលខ្លាំងបំផុតក្នុងពិភពលោក គឺជំងឺធ្លាក់ទឹកចិត្ត និងការថប់បារម្ភ ត្រូវបានកាត់បន្ថយរហូតដល់ ៧១ ភាគរយសម្រាប់អ្នករស់នៅទីក្រុង ដែលរស់នៅក្បែរកន្លែង មានធម្មជាតិបៃតង។ ទោះជាយ៉ាងណាក៏ដោយ ការសិក្សាមួយចំនួនធំ មិនបានសិក្សាពិចារណាអំពីវិសាលភាព និងអត្ថប្រយោជន៍ នៃភាពចម្រុះរបស់ធម្មជាតិនោះទេ។

ដើម្បីដោះស្រាយគម្លាតនៃការស្រាវជ្រាវនេះ ក្រុមអ្នកសិក្សាអំពីសុខភាពផ្លូវចិត្ត របស់សាកលវិទ្យាល័យ King’s Collage London បានសិក្សាទៅលើបរិស្ថាន ដែលមានលក្ខណៈធម្មជាតិសម្បូរបែប ដូចជា ដើមឈើ រុក្ខជាតិ ផ្លូវទឹក និងសត្វព្រៃ ពិតជាអាចពង្រឹងសុខភាពផ្លូវចិត្តមនុស្សបានល្អជាង បរិស្ថានដែលមានធម្មជាតិតិចតួច ឬយ៉ាងណា?

នៅចន្លោះខែមេសា ឆ្នាំ២០១៨ ដល់ខែកញ្ញា ឆ្នាំ២០២៣ ក្រុមអ្នកស្រាវជ្រាវ បានប្រមូលទិន្នន័យ តាមរយៈកម្មវិធី Urban Mind ដែលវាស់ស្ទង់បទពិសោធន៍អ្នកប្រើប្រាស់កម្មវិធី អំពីការរស់នៅទីក្រុង និងជនបទ។ មនុស្ស ១,៩៩៨នាក់ បានចូលរួមក្នុងការសិក្សានេះ។

ជាលទ្ធផល ក្រុមអ្នកស្រាវជ្រាវរកឃើញថា លំហបៃតង ដែលមានភាពចម្រុះនៃធម្មជាតិខ្ពស់ មានអត្ថប្រយោជន៍ច្រើន សម្រាប់សុខភាពផ្លូវចិត្ត ច្រើនជាងកន្លែងដែលមានភាពចម្រុះនៃធម្មជាតិទាប។ អ្នកចូលរួម ជិតមួយភាគបួន បានសន្មត់ថា ឥទ្ធិពលវិជ្ជមាននៃធម្មជាតិ មានចំពោះសុខភាពផ្លូវចិត្តមានរយៈពេលរហូតដល់ ៨ម៉ោង។

ធម្មជាតិ ជាពិសេសជីវចម្រុះ អាចផ្ដល់នូវអត្ថប្រយោជន៍ដល់សុខភាពផ្លូវចិត្ត បានបង្ហាញចេញតាមរយៈរូបភាពជាច្រើន។ ធម្មជាតិ អាចផ្ដល់នូវការរំញោចអារម្មណ៍ ដែលធ្វើឱ្យប្រសើរឡើងនូវការផ្ដោតអារម្មណ៍ កាត់បន្ថយភាពចុះខ្សោយនៃផ្លូវចិត្ត ពង្រឹងមុខងារយល់ដឹង ដូចជា ការចងចាំ និងការផ្ដោតអារម្មណ៍។ ម្យ៉ាងទៀត​ មនុស្សដែលរស់នៅក្នុង ឬនៅជិតកន្លែងដែលសម្បូរទៅដល់ធម្មជាតិ មានទំនោរចំណាយពេលច្រើនធ្វើលំហាត់ប្រាណ ឬធ្វើសកម្មភាពក្រៅផ្ទះ ដែលសកម្មភាពទាំងពីរនេះ ជួយជំរុញការបញ្ចេញអរម៉ូន អង់ដូហ្វីន និងអរម៉ូនដែលជំរុញឱ្យអារម្មណ៍ល្អផ្សេងទៀត។

បរិស្ថានធម្មជាតិចម្រុះក៏ដើរតួនាទីយ៉ាងសំខាន់ក្នុងការកាត់បន្ថយការបំពុល និងកាត់បន្ថយកម្ដៅ។ ក្រៅពីនេះថែមទាំងជួយការពារជំងឺរាងកាយរ៉ាំរ៉ៃ ដូចជា អាឡែស៊ី និងជំងឺហឺតទៀតផង។ លទ្ធផលនៃការស្រាវជ្រាវនេះ សបញ្ជាក់ថា ជីវចម្រុះមានសារៈសំខាន់ មិនត្រឹមតែសម្រាប់សុខភាពផែនដីប៉ុណ្ណោះទេ ប៉ុន្តែក៏សំខាន់សម្រាប់សុខភាពផ្លូវចិត្តមនុស្សផងដែរ៕