ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រហូតមកទល់បច្ចុប្បន្ននេះមិនទាន់មានតួលេខជាក់លាក់ ដែលអាចបញ្ជាក់បានថា សិស្សានុសិស្សនៅប្រទេសសិង្ហបុរីមានចំនួនប៉ុន្មាននាក់នោះទេចូលចិត្តអានសៀវភៅ ប៉ុន្តែបើប្រៀបធៀបចំនួនសិស្សអានសៀវភៅនឹងបណ្តាសិស្សានុសិស្សកម្រិតថ្នាក់វិទ្យាល័យដូចគ្នានៅប្រទេសសមាជិកអាស៊ាន គឺសិស្សសិង្ហបុរីមានទម្លាប់អានសៀវភៅខ្ពស់ជាងដាច់ ។ ទន្ទឹមគ្នានេះ ផ្អែកតាមសារព័ត៌មាន CNA បង្ហាញអំពីការសិក្សាអក្ខរកម្មអំណានជាអន្តរជាតិមួយ បានឱ្យដឹងថា សិស្សនិស្សិតសិង្ហបុរីមានទម្លាប់អានសៀវភៅខ្លាំងជាងប្រទេសអភិវឌ្ឍន៍នានាជុំវិញពិភពលោក ឬអាចនិយាយបានថា សិស្សានុសិស្សសិង្ហបុរីមានទម្លាប់អានសៀវភៅច្រើនជាងគេបង្អស់ក្នុងពិភពលោក ។
សិស្សានុសិស្សនៅប្រទេសសិង្ហបុរីបានចាត់ទុកអំណានជាមូលដ្ឋានសំខាន់ដល់ការសម្រេចចិត្ត និងគាំទ្រដល់ការសិក្សា ។ អំណានបានជំរុញឱ្យគុណភាពនៃការអប់រំក្នុងប្រទេសសិង្ហបុរីរីកចម្រើនជាលំដាប់ពីមួយថ្ងៃទៅមួយថ្ងៃ។ ក្រសួងអប់រំសិង្ហបុរី (MOE) បានបញ្ជាក់ថា កម្មវិធីសិក្សាអំពីអក្ខរកម្មអំណានអន្តរជាតិ (PIRLS) បានរកឃើញថា បច្ចុប្បន្នអត្រាអ្នកមិនចូលចិត្តសៀវភៅនៅប្រទេសអាស៊ីមួយនេះ ស្ទើមិនមានទាល់តែសោះ ហើយបំណិនជីវិតផ្នែកអំណានកំពុងក្លាយជាទម្លាប់របស់សិស្សានុសិស្ស ទម្លាប់របស់អ្នកសិក្សា អ្នកធ្វើការ និងក្លាយជាទម្លាប់ជីវិតប្រចាំប្រជាពលរដ្ឋសិង្ហបុរីទូទៅ ។
ផ្អែកតាមការសិក្សារបស់កម្មវិធីសិក្សាអំពីអក្ខរកម្មអំណានអន្តរជាតិដដែល បានរកឃើញថា និស្សិតសិង្ហបុរីឈរនៅលំដាប់កំពូល ដែលមានទម្លាប់អានសៀវភៅបានទូលំទូលាយ ។ រីឯប្រទេសអៀកឡង់បានជាប់ចំណាត់ថ្នាក់លេខរៀងទី២ ហុងកុងជាប់ចំណាត់ថ្នាក់លេខ៣ និងរុស្ស៊ីជាប់ចំណាត់លេខ៤ ។ តាមរយៈអំណានបានធ្វើឱ្យការប្រកួតប្រជែងចំណេះដឹងរបស់សិស្សនៅសិង្ហបុរីនៅឆ្នាំ២០២១ ទទួលបានចំណាត់ថ្នាក់ពិន្ទុស្តង់ដារអន្តរជាតិ “កម្រិតខ្ពស់បំផុត” ធៀបនឹងសិស្សមកពីបណ្តាប្រទេសផ្សេងៗជុំវិញពិភពលោក ។
ជាមួយគ្នានេះ ការសិក្សាខាងលើក៏បានរកឃើញដែរថា សិស្សសិង្ហបុរីមានទំនុកចិត្តលើខ្លួនឯង ព្រមទាំងជឿជាក់លើសមត្ថភាពអានរបស់ពួកគេរហូតដល់ ៨៤ ភាគរយនៅក្នុងដំណើរការសិក្សា ។ ចំនួននេះបើប្រៀបធៀននឹងសិស្សនិស្សិតអន្តរជាតិមានទំនុកចិត្តលើខ្លួនឯង និងជឿជាក់លើសមត្ថភាពអានរបស់ខ្លួនត្រឹមតែ ៧៨ភាគរយប៉ុណ្ណោះ ។ ចំណុចនេះ មានន័យថា សិស្សនិស្សិតសិង្ហបុរីមានចំណេះដឹងអានច្រើនជាងគេក្នុងចំណោមសិស្សមកពីគ្រប់មជ្ឈដ្ឋានជុំវិញពិភពលោក។
គួរបញ្ជាក់ថា បច្ចុប្បន្នអំណានបានក្លាយភារកិច្ចសាមញ្ញ ដែលប្រជាជនសិង្ហបុរីអនុវត្តជាទម្លាប់រស់នៅប្រចាំថ្ងៃ ។ ក្រៅពីទម្លាប់ប្រើ់ប្រាស់បណ្ណាល័យឱ្យសកម្ម និន្នាការអានទំនើបក៏កាន់តែពេញនិយមខ្លាំងដែរនៅប្រទេសសិង្ហបុរី មានដូចជា ការអានតាមទម្រង់ឌីជីថល (អេឡិចត្រូនិក) អានដោយការស្តាប់សំឡេង និងអានតាមរយៈកម្មវិធីបច្ចេកវិទ្យាផ្សេងៗ ។ ប្រជាជនសិង្ហបុរីមានទម្លាប់អាន និងចាត់ទុកសកម្មភាពអំណាន ឬការណែនាំសៀវភៅល្អៗឱ្យអ្នកជិតស្និទ្ធអានដោយរីករាយ និងមានអត្ថន័យសម្រាប់ជីវិត ៕
