ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសរុស្ស៊ីបានដាក់ដំណើរការជាផ្លូវការនូវសៀវភៅបង្រៀនអំពី ប្រតិបត្តិការយន្តហោះគ្មានមនុស្សបើកទៅក្នុងកម្មវិធីសិក្សាថ្នាក់ជាតិ ដែលនេះជាផ្នែកមួយ នៃគំនិតផ្ដួចផ្ដើម ដើម្បីបណ្ដុះបណ្ដាលអ្នកជំនាញផ្នែកប្រព័ន្ធប្រតិបត្តិការយន្តហោះគ្មានមនុស្សបើកជំនាន់ថ្មីរបស់រុស្ស៊ី, នេះបើយោងតាមសារព័ត៌មានរុស្ស៊ី The Moscow Times ។
កាលពីដើមសប្ដាហ៍កន្លងទៅ ក្រុមហ៊ុនផលិតយន្តហោះ គ្មានមនុស្សបើក Geoscan របស់រុស្ស៊ីបានប្រកាសពីការចេញផ្សាយសៀវភៅសិក្សាដំបូងបង្អស់សម្រាប់បង្រៀនក្នុងសាលា ដែលអនុម័តដោយរដ្ឋរុស្ស៊ី ក្នុងការបណ្ដុះបណ្ដាលសិស្សថ្នាក់ទី៨ និងទី៩ អំពីប្រតិបត្តិការយានយន្តគ្មានមនុស្សបើក (unmanned aerial vehicles – UAVs)។
សៀវភៅនេះ មានចំណងជើងថា «យានយន្តគ្មានមនុស្សបើក ៖ ថ្នាក់ទី ៨ និងទី ៩» ដោយការបោះពុម្ពផ្សាយនេះ បានបញ្ចូលទៅក្នុងបញ្ជីសហព័ន្ធនៃសម្ភារៈបង្រៀន ដែលត្រូវបានអនុម័ត បន្ទាប់ពីការបញ្ជាក់ជាផ្លូវការដោយក្រសួងអប់រំរុស្ស៊ី។
វគ្គសិក្សានេះ ត្រូវបានផ្ដល់ជូន គម្រោង «Robotics» នៃប្រធានបទការងារបច្ចេកវិទ្យា ដែលស្មើនឹងការអប់រំបច្ចេកទេសរបស់រុស្ស៊ី។
លោក Mikhail Lutsky ប្រធានគម្រោងអប់រំនៅ Geoscan និយាយថា ក្រុមហ៊ុនបានបង្កើតសៀវភៅសិក្សានេះ ដោយផ្អែកលើបទពិសោធន៍ ១៤ឆ្នាំ ក្នុងការអភិវឌ្ឍយន្តហោះគ្មានមនុស្សបើក និង ៨ឆ្នាំក្នុងវិស័យអប់រំ ស្ដីអំពីមនុស្សយន្ត។ លោកបន្ដថា នេះមិនមែនជាទ្រឹស្តីសុទ្ធសាធទេ ប៉ុន្តែមានភ្ជាប់មកជាមួយនូវសម្ភារៈ និងការអនុវត្តជាក់ស្ដែង ដែលធ្វើឱ្យការសិក្សានេះ ងាយយល់ និងអាចប្រើយន្តហោះគ្មានមនុស្សបើកបាន។
Geoscan បានបោះពុម្ពសៀវភៅសិក្សានៅឆ្នាំ២០២៤ ក្នុងភាពជាដៃគូជាមួយ Prosveshcheniye ដែលជាស្ថាប័នបោះពុម្ពសៀវភៅសិក្សាដ៏ធំបំផុតរបស់រុស្ស៊ី។ ខណៈក្រសួងអប់រំរុស្ស៊ី បានអនុម័តសៀវភៅនេះ សម្រាប់ការសិក្សាកាលពីខែមុន។
នៅក្នុងខែវិច្ឆិកា ឆ្នាំ២០២៣ មូលនិធិសម្រាប់ការអភិវឌ្ឍន៍បញ្ញា (foundation for intellectual development) ដែលដឹកនាំដោយ កូនស្រីពៅ របស់លោក ពូទីន លោកស្រី Katerina Tikhonova បានទទួលភាគហ៊ុន ១០% នៅក្នុង Geoscan នេះបើយោងតាមរបាយការណ៍ប្រព័ន្ធផ្សព្វផ្សាយឯករាជ្យមួយរបស់រុស្ស៊ី។ ខណៈក្រុមហ៊ុននេះស្ថិតនៅក្រោមការដាក់ទណ្ឌកម្មពីសំណាក់សហរដ្ឋអាម៉េរិក។
ការដាក់ឱ្យរៀនសៀវភៅនេះ គឺជាផ្នែកមួយ នៃផែនការរបស់រុស្ស៊ី ក្នុងការបណ្ដុះបណ្ដាលប្រតិបត្តិករយន្តហោះគ្មានមនុស្សបើកចំនួន ១លាននាក់ នៅសាលាជាង ៥០០ និងសាកលវិទ្យាល័យចំនួន ៣០ នៅឆ្នាំ ២០៣០។
នៅឆ្នាំ២០២៣ និស្សិតសាកលវិទ្យាល័យប្រហែល ៣ម៉ឺននាក់នៅទីក្រុងមូស្គូ និងសាន់ភីតធឺប័គ បានចាប់ផ្តើមចូលរៀនវគ្គប្រតិបត្តិការយន្តហោះគ្មានមនុស្សបើក ខណៈដែលសិស្សសាលាត្រូវបានគេណែនាំឱ្យស្គាល់ជំនាញប្រយុទ្ធជាមូលដ្ឋាន នៃយន្តហោះគ្មានមនុស្សបើកដែលជាផ្នែកមួយ នៃការបណ្តុះបណ្តាលយោធា។
គួរបញ្ជាក់ថា ទាំងរុស្ស៊ី និងអ៊ុយក្រែន បានប្រើប្រាស់យន្តហោះគ្មានមនុស្សបើកប្រយុទ្ធយ៉ាងទូលំទូលាយ ចាប់តាំងពីលោក ពូទីន បានបញ្ជាឱ្យមានការលុកលុយពេញប្រទេសអ៊ុយក្រែនក្នុងខែកុម្ភៈ ឆ្នាំ២០២២៕
