ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម WE Forum បានឱ្យដឹងថា ពិភពលោកកំពុងជួបវិបត្តិតម្លៃនៃការរស់នៅ (Cost of living crisis) ដោយសារអតិផរណាបានកើនឡើង ហើយមនុស្សពិបាករកប្រាក់ចំណូលជាងមុន។ បញ្ហានេះ បានប៉ះពាល់យ៉ាងខ្លាំង លើមនុស្សពេញវ័យនៅទូទាំងពិភពលោក។
អ្នកប្រឹក្សា Deloitte បានធ្វើការសិក្សាលើមនុស្សជំនាន់ Z (Gen Z) និងមនុស្សវ័យកណ្ដាល (Millennial) មកពីប្រទេសចំនួន ៤៤ អំពីឥទ្ធិពលនៃការកើនឡើងយ៉ាងខ្ពស់នៃតម្លៃការរស់នៅរបស់ពួកគេ។ ជាលទ្ធផល គេបានរកឃើញថា កង្វល់ទី១ សម្រាប់មនុស្សទាំងពីរក្រុមនេះ គឺតម្លៃនៃការរស់នៅ ហើយកង្វល់បន្ទាប់មកទៀតមានដូចជា ការបាត់បង់ការងារ បម្រែបម្រួលអាកាសធាតុ និងសុខភាពផ្លូវចិត្ត។
ក្នុងការសិក្សាបានរកឃើញថា មនុស្សជាច្រើនកំពុងមានអារម្មណ៍ថា ពួកគេកំពុងមានការចាយវាយច្រើនជាងមុន ដែលជំរុញឱ្យពួកគេត្រូវសម្រេចចិត្តស្វែងរកការងារទី២ដើម្បីបង្កើនប្រាក់ចំណូល ។ ការងារទី២ ដែលពេញនិយមបំផុតគឺការលក់តាមអ៊ីនធឺណិត និងការដឹកជញ្ជូនអាហារ។ លើសពីនេះ ពួកគេចាប់ផ្ដើមមានការគិតអវិជ្ជមានចំពោះសមត្ថភាពខ្លួនឯង ខណៈមនុស្សជំនាន់មុននៅហាក់ងាយស្រួលទិញផ្ទះ និងមានគ្រួសារជាង។
ស្ត្រីវ័យក្មេងមួយរូបមកពីប្រទេសនូវែលហ្សេឡង់ បាននិយាយជំនួសមនុស្សជាច្រើនដែលរស់នៅក្នុងសម័យកាលរបស់នាងថា «ខ្ញុំមិនមានលទ្ធភាពបង្កើតគ្រួសារនោះទេ ហើយត្រូវទទួលការងារទីពីរ ដែលធ្វើឱ្យប៉ះពាល់ដល់សុខភាពខ្ញុំយ៉ាងខ្លាំង»។
របាយការណ៍អំពីអនាគតនៃទីផ្សារការងារឆ្នាំ២០២៣ របស់វេទិកាសេដ្ឋកិច្ចពិភពលោក បានលើកឡើងថា ការធា្លក់ចុះសេដ្ឋកិច្ចដោយសារជំងឺរាតត្បាត កូវីដ-១៩ បានប៉ះពាល់យ៉ាងខ្លាំងដល់បុគ្គលិកវ័យក្មេង។ បញ្ហានេះ តម្រូវឱ្យម្ចាស់អាជីវកម្ម និងមេដឹកនាំតាមបណ្ដាប្រទេស ត្រូវវិនិយោគលើការបង្កើតការងារ និងឱកាសឱ្យកាន់តែច្រើន សម្រាប់យុវជន។
ចាប់តាំងពីការរាតត្បាតនៃជំងឺកូវីដ និងការលុកលុយរបស់រុស្ស៊ីមកកាន់អ៊ុយក្រែន អតិផរណាបានកើនឡើងជាលំដាប់។ ជាពិសេសតម្លៃម្ហូបអាហារ ដែលឃើញតម្លៃកើនឡើងលើសទំនិញផ្សេងទៀត។ យោងតាមទិន្នន័យរបស់ធនាគារពិភពលោកបានឱ្យដឹងថា នៅក្នុងប្រទេសដែលរងផលប៉ះពាល់នៃវិបត្តិនេះខ្លាំងបំផុត តម្លៃម្ហូបអាហារបានកើនឡើងដល់ទៅ ៣ភាគរយ។
យោងតាមការស្រាវជ្រាវរបស់ Deloitte អំពីប្រភពនៃភាពតានតឹងរបស់យុវជន ពួកគេបានលើកឡើងថា បញ្ហាអនាគតនៃហិរញ្ញវត្ថុ ហិរញ្ញវត្ថុប្រចាំថ្ងៃ បញ្ហាសុខភាព និងសុខុមាលគ្រួសារ គឺជាក្ដីបារម្ភដ៏ធំបំផុតសម្រាប់ពួកគេ។
ស្ត្រីមួយរូបមកពីប្រទេសប្រេស៊ីលបានលើកឡើងថា «តម្លៃនៃការរស់នៅកាន់តែខ្ពស់ ខ្ញុំមានការព្រួយបារម្ភអំពីការមិនអាចបង់វិក្កយបត្រប្រចាំខែ និងមិនផ្តល់ការអប់រំ ព្រមទាំងជីវិតដែលល្អប្រសើរដល់កូនៗរបស់ខ្ញុំឱ្យសមនឹងអ្វីដែលពួកគេត្រូវទទួលបាន។»
ទន្ទឹមនឹងនេះ បុរសជំនាន់ Z (Gen Z) ម្នាក់បាននិយាយដូចនេះថា «កង្វល់ផ្នែកហិរញ្ញវត្ថុចម្បងរបស់ខ្ញុំ គឺធ្វើយ៉ាងណាត្រូវតែធានាថា ខ្ញុំអាចមានតុល្យភាពជីវិតការងារប្រកបដោយផាសុកភាព ព្រោះថាបច្ចុប្បន្នខ្ញុំកំពុងជួបការលំបាកក្នុងការរក្សាតុល្យភាពជីវិត ដោយសារការរកប្រាក់បន្ថែមម៉ោងច្រើន»។
មួយភាគបីនៃអ្នកដែលបានស្ទង់មតិបារម្ភថា ប្រសិនបើបរិយាកាសសេដ្ឋកិច្ចបច្ចុប្បន្ននៅតែបន្ត វានឹងកាន់តែពិបាកក្នុងការស្នើសុំភាពបត់បែននៅកន្លែងធ្វើការ ដើម្បីបង្កើនតុល្យភាពជីវិតការងាររបស់ពួកគេ ហើយ ១៥ភាគរយទៀត គិតថាវានឹងមិនអាចទៅរួចនោះទេ។
ដោយសារតែអតិផរណា យុវជនភាគច្រើនក៏កំពុងតែផ្លាស់ប្ដូរទម្លាប់នៃការរស់នៅផងដែរ។ បើយោងតាមក្រុមហ៊ុន Deloitte យុវជន លែងចាប់អារម្មណ៍ទៅនឹងសម្ភារនិយម និងងាកមកប្រើរបស់មួយទឹក មិនទិញឡាន ហើយចាប់ផ្ដើមញ៉ាំអាហារបួសជាដើម៕
