ប្រមុខដឹកនាំប្រទេស និងតំណាងប្រទេសចំនួន២៥ ដែលមានវត្តមាននៅក្នុងកិច្ចប្រជុំកំពូលស្តីពីសុវត្ថិភាពបញ្ញាសិប្បនិម្មិត (Artificial Intelligence) រួមមាន សហរដ្ឋអាម៉េរិក ប្រទេសចិន និងប្រទេសនៅសហភាពអឺរ៉ុប ដែលមានចក្រភពអង់គ្លេសផងដែរនោះ បានចុះហត្ថលេខាលើសេចក្តីប្រកាស Bletchley ឬ Bletchley Declaration រួមគ្នាបង្កើតវិធីសាស្ត្រគ្រប់គ្រងសុវត្ថិភាព AI ។ ការចុះហត្ថលេខាព្រមព្រៀងគ្នានេះ បានធ្វើឡើងបន្ទាប់ពីថ្នាក់ដឹកនាំនយោបាយ និងតំណាងប្រទេសឧស្សាហកម្មជឿនលឿនបាននាំគ្នាជជែកពិភាក្សាអំពីផលប៉ះពាល់ និងវិធីសាស្ត្រគ្រប់គ្រងលើបច្ចេកវិទ្យាបញ្ញាសិប្បនិម្មិត (AI) សម្រាប់អនាគត ។

ភាគីដែលបានចូលរួមទាំងអស់សុទ្ធសឹងតែទទួលស្គាល់ពីទំហំនៃផលប៉ះពាល់ដែលនឹងអាចកើតចេញពីបច្ចេកវិទ្យាបញ្ញាសិប្បនិម្មិត (AI) នៅថ្ងៃអនាគត ។ ប៉ុន្តែវាមិនមែនជារឿងដែលព្រួយបារម្ភចំពោះមុខខ្លាំងពេកនោះទេ ព្រោះគ្រប់យ៉ាងអាចគ្រប់គ្រងបានប្រសិនបើប្រទេសដែលមានវត្តមានចូលរួមកិច្ចប្រជុំកំពូលលើកទី១ ស្តីពីសុវត្ថិភាពបញ្ញាសិប្បនិម្មិត និងក្រុមហ៊ុនអភិវឌ្ឍន៍បច្ចេកវិទ្យាធំៗរបស់ពិភពលោក ចាប់ផ្តើមគិតគូរពីសុវត្ថិភាពអនាគតបញ្ញាសិប្បនិម្មិត ។

នៅក្នុងកិច្ចប្រជុំបើកកិច្ចប្រជុំកំពូលស្តីពីសុវត្ថិភាពបញ្ញាសិប្បនិម្មិត (AI) លោក Wu Zhaohui អនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យារបស់ចិន បានលើកឡើងថា ទីក្រុងប៉េកាំងបានត្រៀមខ្លួនរួចជាស្រេចក្នុងការបង្កើនកិច្ចសហប្រតិបត្តិការលើសុវត្ថិភាព AI ដើម្បីជួយកសាងក្របខ័ណ្ឌអភិបាលកិច្ចអន្តរជាតិ ។ ប្រទេសទាំងអស់មិនថាតូចឬធំនោះទេ សុទ្ធសឹងតែមានសិទ្ធិស្មើគ្នាក្នុងការអភិវឌ្ឍន៍ និងប្រើប្រាស់បច្ចេកវិទ្យាបញ្ញាសិប្បនិម្មិត ហើយការគិតគូពីសុវត្ថិភាពបញ្ញាសិប្បនិម្មិតជារឿងសំខាន់បំផុតដែលត្រូវធ្វើរួមគ្នា ។

ចំណែកលោកស្រី Michelle Donelan រដ្ឋមន្ត្រីក្រសួងវិទ្យាសាស្ត្រ នវានុវត្តន៍ និងបច្ចេកវិទ្យាអង់គ្លេស បាននិយាយថា ការចុះហត្ថលេខារួមគ្នាលើសេចក្តីប្រកាស Bletchley វាជាសមិទ្ធិផលមួយដែលបង្ហាញពីការព្រមព្រៀងគ្នាគិតគូសន្តិសុខព័ត៌មាន និងបច្ចេកវិទ្យាដែលបញ្ញាសិប្បនិម្មិតជាតួអង្គសំខាន់ ។ ទន្ទឹមគ្នានេះ កិច្ចប្រជុំកំពូលស្តីពីសុវត្ថិភាពបញ្ញាសិប្បនិម្មិតចំនួនពីរបន្ថែមទៀតនឹងមានរៀបចំឡើងនៅប្រទេសកូរ៉េខាងត្បូង និងប្រទេសបារាំង ។

ជាមួយគ្នានេះដែរលោកស្រី Kamala Harris អនុប្រធានាធិបតីសហរដ្ឋអាម៉េរិក ក៏បានថ្លែងសុន្ទរកថានៅទីក្រុងឡុងដ៍កាលពីថ្ងៃពុធដែរថា សហរដ្ឋអាម៉េរិកក៏មានការព្រួយបារម្ភពីការរីកចម្រើនយ៉ាងឆាប់រហ័សនៃបច្ចេកវិទ្យាបញ្ញាសិប្បនិម្មិតនេះដែរ ។ បញ្ញាសិប្បនិម្មិតក៏អាចការគំរាមកំហែងលើដំណើរការកសាងលទ្ធិប្រជាធិបតេយ្យ ព្រមទាំងភាពឯកជនរបស់មនុស្ស ហើយសហរដ្ឋអាម៉េរិកនឹងយកចិត្តទុកដាក់លើបញ្ហានេះ ។ ការងារសុវត្ថិភាពបញ្ញាសិប្បនិម្មិតត្រូវធ្វើយ៉ាងឆាប់រហ័ស ព្រោះបច្ចេកវិទ្យានេះរីកចម្រើនយ៉ាងឆាប់រហ័សដូចគ្នា ។

សូមជម្រាបថា បច្ចុប្បន្នការប្រើប្រាស់បច្ចេកវិទ្យាបញ្ញាសិប្បនិម្មិត (AI) កំពុងជួយដល់ការរីកចម្រើនសេដ្ឋកិច្ច និងសង្គម ។ វត្តមានកម្មវិធីបច្ចេកវិទ្យាបញ្ញាសិប្បនិម្មិតបានសម្រួលការងាររបស់មនុស្សជាច្រើន ដូចជា កម្មវិធី OpenAI និងកម្មវិធី ChatGPT ជាដើម ។ យ៉ាងណាក៏ដោយរឿងដែលអ្នកប្រើប្រាស់បច្ចេកវិទ្យាបញ្ញាសិប្បនិម្មិតបារម្ភខ្លាំងបំផុត គឺខ្លាចបញ្ញាសិប្បនិម្មិតអាចមានភាពឆ្លាតវៃរហូតដល់មនុស្សមិនងាចគ្រប់គ្រងបានដោយប្រការណាមួយ ដែលនាំទៅរកផលវិបាកគ្មានដែនកំណត់ និងអចេតនា៕