បច្ចុប្បន្ន ការលើកកម្ពស់សុខុមាលភាពរបស់បុគ្គលិកនៅកន្លែងការងារ ត្រូវបានក្រុមហ៊ុនជាច្រើនបង្កើនការយកចិត្តទុកដាក់។ បើតាមការស្រាវជ្រាវថ្មីៗនេះ បង្ហាញថា មួយភាគបួន នៃបុគ្គលិកជំនាន់ Generation Z (កើតនៅចន្លោះឆ្នាំ ១៩៩៧ ទៅ ២០១២) ចង់ធ្វើការនៅកន្លែងការងារ ដែលជួយឱ្យពួកគេអាចទប់ទល់នឹងភាពតានតឹងបានតាមរយៈការផ្ដល់កន្លែងគេង បន្ទប់សមាធិ និងកៅអីម៉ាស្សាជាដើម។

ការគេងបានស្កប់ស្កល់គឺជារឿងសំខាន់ណាស់ ព្រោះវាអាចជះឥទ្ធិពលដល់ផលិតភាពការងារ និងសេដ្ឋកិច្ច ។ តាមការវិភាគក្នុងឆ្នាំ២០១៨ ដោយអង្គការស្រាវជ្រាវ RAND Corporation បានបង្ហាញថា ផលិតផលក្នុងស្រុកសរុបរបស់ប្រទេសមួយអាចត្រូវបានបាត់បង់រហូតដល់ទៅ ៣ភាគរយឯណោះ ដោយសារតែអ្នកធ្វើការមានបញ្ហាដំណេក។ ក្រុមហ៊ុនមួយចំនួនដឹងពីអត្ថប្រយោជន៍នៃការគេងលក់ស្កប់ ហើយក៏កំពុងតែយកចិត្តទុកដាក់ទៅលើបញ្ហានេះដែរ។ ជាក់ស្ដែងទីស្នាក់ការកណ្តាលរបស់ក្រុមហ៊ុនផលិតសម្ភារកីឡា Nike នៅទីក្រុង Portland រដ្ឋ Oregon ត្រូវបានគេរាយការណ៍ថា មានបន្ទប់ដែលបុគ្គលិកអាចប្រើដើម្បីគេង។ ខណៈក្រុមហ៊ុនខ្លះទៀត បានដំឡើងប្រព័ន្ធភ្លើងដើម្បីគ្រប់គ្រងអរម៉ូនគេង មេឡាតូនីន ជួយឱ្យបុគ្គលិកគេងស្កប់ស្កល់។ យ៉ាងណាមិញ គំនិតដែលអនុញ្ញាតឱ្យគេងនៅកន្លែងធ្វើការ នៅតែជារឿងមួយ ដែលក្រុមហ៊ុនភាគច្រើនយល់ថា មិនគួរមាន ទោះបីជាវាជួយបង្កើនសុខុមាលភាពផ្លូវចិត្ត ឬជួយទាក់ទាញបុគ្គលិកពូកែៗក៏ដោយ។

ការពិសោធន៍បានបង្ហាញថា ការគេងមិនគ្រប់គ្រាន់អាចបណ្តាលឱ្យមានបញ្ហាមុខងារ នៃការយល់ដឹងរបស់ខួរក្បាល និងសុខភាពផ្លូវចិត្ត។ ការសិក្សាមួយដែលបានធ្វើឡើង ដោយជំនួយការសាស្ត្រាចារ្យនៃសាកលវិទ្យាល័យ University of Warwick គឺលោកស្រី Mattie Toma ដោយគាត់បានធ្វើការជាមួយអ្នកសិក្សាមកពីវិទ្យាស្ថាន Masschusetts Institute of Technology, Harvard និងសាកលវិទ្យាល័យ Pennsylvania តាមរយៈការប្រើ actigraphs (ឧបករណ៍វាស់ទម្រង់នៃការគេងលើអ្នកជំងឺដែលមានបញ្ហាដំណេក) ដើម្បីតាមដានការគេងរបស់មនុស្សពេញវ័យប្រហែល ៤៥០ នាក់នៅទីក្រុង Chennai ប្រទេសឥណ្ឌា ។ ជាលទ្ធផលរកឃើញថា ពួកគេគេងបានត្រឹមតែ ៥,៥ ម៉ោងប៉ុណ្ណោះក្នុងមួយយប់ បើទោះជាការគេងលើគ្រែបាន៨ម៉ោងក៏ដោយ។ បញ្ហានេះ ដោយសារតែមានអ្នកខ្លះមានបញ្ហាគេងមិនដកដង្ហើម (apnoea) និងអ្នកខ្លះទៀតគេងមិនលក់(Insomnia) ហើយការគេងមិនលក់ បានប៉ះពាល់ដល់ការយល់ដឹង ផលិតភាពការងារ សមត្ថភាពសម្រេចចិត្ត និងសុខុមាលភាពរបស់ពួកគេ។

ការពិសោធន៍មួយទៀត បានធ្វើលើមនុស្សមួយក្រុម ដោយឱ្យពួកគេគេង ៣០នាទីនៅពេលថ្ងៃ (ចន្លោះពីម៉ោង១ ដល់ម៉ោង៤) ក្នុងបរិយាកាសផាសុកភាព និងស្ងប់ស្ងាត់។ ជាលទ្ធផល បុគ្គលិកក្រុមនេះ មានភាពសុខុមាលភាពផ្លូវចិត្ត ការយល់ដឹងនៃខួរក្បាលប្រសើរឡើង ហើយផលិតភាពការងារ កើនឡើងជាមធ្យមប្រមាណ ២,៣ភាគរយ។ មូលហេតុដែលការគេងថ្ងៃជះឥទ្ធិពលវិជ្ជមាន អាចបណ្ដាលមកពីនៅអំឡុងពេលថ្ងៃ ជាពេលមួយដែលរាងកាយអស់កម្លាំង និងត្រូវការសម្រាក ដើម្បីបង្កើនថាមពលសម្រាប់ធ្វើការបន្ត។ ម្យ៉ាង ការគេងនៅកន្លែងធ្វើការគឺស្កប់ស្កល់ល្អ ព្រោះគ្មានសំឡេងរំខាន។

ក្រុមហ៊ុនក៏អាចធ្វើការពិសោធន៍ក្រៅផ្លូវការអំពីអត្ថប្រយោជន៍នៃការគេងថ្ងៃផងដែរ។ តាមរយៈការកំណត់បុគ្គលិកជាពីរក្រុម ដោយអនុញ្ញាតឱ្យមួយក្រុមគេង ហើយប្រៀបធៀបលទ្ធផលការងារ របស់បុគ្គលិកទាំងពីរក្រុម ថាតើមួយណាមានផលិតភាពការងារខ្ពស់ជាង។ ទន្ទឹមនឹងនេះ កន្លែងគេងរបស់បុគ្គលិក គួរតែជាកន្លែងដែលមានភាពស្ងប់ស្ងាត់ល្អ ព្រោះអាចជះឥទ្ធិពលជាវិជ្ជមានទៅលើផលិតភាព ឬសុខុមាលភាពរបស់និយោជិត៕