ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមហ៊ុន OpenAI បានប្រកាសកាលពីសប្ដាហ៍មុនថា ខ្លួននឹងបញ្ចូលមុខងារគ្រប់គ្រងដោយមាតាបិតាទៅលើ Chatbot ChatGPT របស់ខ្លួន។
ក្រុមហ៊ុន AI បានប្រកាសក្នុងសេចក្ដីប្រកាសរបស់ខ្លួនថា «ក្នុងរយៈពេលមួយខែក្រោយ ឪពុកម្ដាយនឹងអាចភ្ជាប់គណនីរបស់ពួកគេជាមួយគណនីរបស់ក្មេងជំទង់បាន និងអាចគ្រប់គ្រង របៀបដែល ChatGPT ឆ្លើយតបទៅកាន់កូនៗរបស់ពួកគេ ជាមួយនឹងច្បាប់អាកប្បកិរិយាគម្រូតាមអាយុ»។
OpenAI បន្ថែមថា ឪពុកម្ដាយក៏នឹងទទួលបានការជូនដំណឹងពី ChatGPT នៅពេលដែលប្រព័ន្ធរកឃើញថា កូនរបស់ពួកគេ ស្ថិតក្នុងគ្រា ដែលមានទុក្ខព្រួយធ្ងន់ធ្ងរ។
ការប្រកាសនេះ ធ្វើឡើងមួយសប្ដាហ៍បន្ទាប់ពីប្ដីប្រពន្ធជនជាតិអាមេរិកមួយគូ បាននិយាយថា ប្រព័ន្ធនេះ បានលើកទឹកចិត្តឱ្យកូនប្រុសជំទង់របស់ពួកគេសម្លាប់ខ្លួន ហើយបានដាក់ពាក្យប្តឹងប្រឆាំងនឹងក្រុមហ៊ុន OpenAI ទៅកាន់តុលាការរដ្ឋកាលីហ័រញ៉ា។
លោកស្រីមេធាវី Melodi Dicer ដែលជាអ្នកគ្រប់គ្រងគម្រោង The Tech Justice Law Project និងជាអ្នកជួយរៀបចំពាក្យបណ្ដឹងផ្លូវច្បាប់បាននិយាយថា «នៅពេលដែលមនុស្សម្នាក់កំពុងប្រើប្រាស់ ChatGPT វាពិតជាមានអារម្មណ៍ ពួកគេកំពុងជជែកជាមួយអ្វីមួយ។»
លោកស្រី Dincer បន្ថែមថា «ស្ថានភាពដូចគ្នានេះ អាចនាំឱ្យនរណាម្នាក់ ចាប់ផ្ដើមចែករំលែកទិន្នន័យផ្ទាល់ខ្លួនរបស់ពួកគេ ជាមួយបច្ចេកវិទ្យានេះ កាន់តែច្រើន និងចាប់ផ្ដើមសុំយោបល់ និងការប្រឹក្សាជាមួយបច្ចេកវិទ្យានេះ។»
បើតាមលោកស្រី Dincer លក្ខណៈពិសេស នៃការឌីហ្សាញបច្ចេកវិទ្យា ChatGPT នេះ គឺការកំណត់ទិដ្ឋភាពសម្រាប់អ្នកប្រើប្រាស់ ក្នុងការដាក់ Chatbot ចូលទៅក្នុងតួនាទី ដែលអាចទុកចិត្តបាន ដូចជា មិត្តភក្ដិ អ្នកប្រឹក្សាយោបល់ផ្លូវចិត្ត ឬវេជ្ជបណ្ឌិតជាដើម។ ខណៈលោកស្រីយល់ថា ការបង្ហោះសេចក្ដីប្រកាសរបស់ OpenAI ស្ដីពី ការគ្រប់គ្រងដោយមាតាបិតា និងវិធានការសុវត្ថិភាព ហាក់ដូចជា មានលក្ខណៈទូទៅ និងខ្វះព័ត៌មានលម្អិត។
កាលពីថ្ងៃអង្គារសប្ដាហ៍មុន ក្រុមហ៊ុន OpenAI បានប្រកាសថា «ក្រុមហ៊ុននឹងបន្តធ្វើឱ្យប្រសើរឡើងនូវរបៀបទទួល និងផ្ដល់ចម្លើយសមស្រប ទៅនឹងសញ្ញានៃទុក្ខព្រួយផ្លូវចិត្ត និងភាពតានតឹងផ្នែកអារម្មណ៍។»
ក្រុមហ៊ុនបានបញ្ជាក់បន្ថែមទៀតថា ខ្លួនមានផែនការ ក្នុងការធ្វើឱ្យប្រសើរឡើង ដើម្បីធានាសុវត្ថិភាពនៃ Chatbots របស់ខ្លួនក្នុងរយៈពេល ៣ខែខាងមុខនេះ រួមទាំងការកាត់បន្ថមខ្លឹមសារត្រង់ៗ ក្នុងកិច្ចសន្ទនារស៊ើបមួយចំនួន ទៅជាគម្រូហេតុផល ដើម្បីឱ្យកាន់តែស៊ីសង្វាក់គ្នា នឹងគោលការណ៍ណែនាំសុវត្ថិភាព៕
