ក្រុមហ៊ុនបច្ចេកវិទ្យាយក្ស Amazon, Google និង Microsoft ជាក្រុមហ៊ុនដែលជ្រើសរើសនិស្សិតអន្តរជាតិកំពូលៗច្រើនបំផុតនៅអាម៉េរិក តាមរយៈកម្មវិធី U.S. Optional Practical Training (OPT) ជាពិសេស ផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។

យោងតាមរបាយការណ៍ចុងក្រោយបំផុតពី the Student and Exchange Visitor Information System (SEVIS) ដែលគ្រប់គ្រងដោយការស៊ើបអង្កេតរបស់ស្ថាប័ន Homeland Security Investigations ស្ថិតក្រោមការអនុវត្តច្បាប់អន្តោប្រវេសន៍ និងគយសហរដ្ឋអាមេរិក បានបង្ហាញថា ក្រុមហ៊ុន Amazon ជាក្រុមហ៊ុន ដែលមានបុគ្គលិកជំនាញ STEM ជានិស្សិតបរទេសចំនួន ៦,៦៧៩នាក់ នៅឆ្នាំ២០២៤, តាមពីក្រោយដោយ Google ដែលមានចំនួន ១,៧៧៨នាក់, Microsoft មានចំនួន ១,៤៩៦នាក់ និង Meta ចំនួន ១,៣០២នាក់។

OPT គឺជាកម្មវិធីដ៏ពេញនិយមអនុញ្ញាតឱ្យនិស្សិតអន្តរជាតិ ដែលមានទិដ្ឋាការ F-1 អាចធ្វើការនៅក្រុមហ៊ុនអាម៉េរិក ដើម្បីទទួលបានបទពិសោធន៍ផ្ទាល់ក្នុងវិស័យ ដែលពួកគេសិក្សា។ តាមរយៈកម្មវិធីនេះ​ អនុញ្ញាតឱ្យធ្វើការងាររហូតដល់ ១២ខែ ទាំងមុន និងក្រោយបញ្ចប់ការសិក្សា។

សម្រាប់និស្សិតក្នុងជំនាញ STEM ដែលបំពេញគ្រប់លក្ខខណ្ឌ OPT អាចទទួលបានសិទ្ធិធ្វើការបន្ថែម រយៈពេល ២៤ខែ ដែលគេស្គាល់ថា STEM OPT ។ អ្នកចូលរួមទាំងអស់ ត្រូវតែទទួលបានឯកសារអនុញ្ញាតការងារ (EAD) ពីសេវាសញ្ជាតិ និងអន្តោប្រវេសន៍អាម៉េរិក។

នៅឆ្នាំ២០២៤ និស្សិតអន្តរជាតិសរុបចំនួន ១៩៤,៥៥៤ នាក់ ត្រូវបានផ្ដល់ការអនុញ្ញាតឱ្យធ្វើការក្រោមការគ្រប់គ្រងរបស់ OPT ដោយមានការកើនឡើង ២១% ធៀបនឹងឆ្នាំ២០២៣។ ទន្ទឹមនឹងនេះ សិស្ស ៩៥,៣៨៤នាក់ បានទទួលការអនុញ្ញាតពី STEM OPT ដោយមានការកើនឡើង ក្នុងអត្រា ៥៤% ពីមួយឆ្នាំទៅមួយឆ្នាំ។

Amazon ក៏បានឈរលើកំពូលតារាង ក្នុងនាមជាក្រុមហ៊ុន ដែលទទួលបុគ្គលិក OPT មុន និងក្រោយបញ្ចប់ការសិក្សាផងដែរ មានសិស្សចំនួន ៥,៣៧៩នាក់ ដោយមិនរាប់បញ្ចូល STEM OPT ។ តាមពីក្រោយដោយសាកលវិទ្យាល័យ កាលីហ្វ័រញ៉ា ដែលមានសិស្សចំនួន ២,១១២នាក់, សាកលវិទ្យាល័យ អារីហ្សូណា មាន ១,៨៩៥នាក់ សាកលវិទ្យាល័យតិចសាស់ ១,៣០៥នាក់ និងក្រុមហ៊ុន តេស្លា ចំនួន ១,១៧០នាក់។

ចំពោះការបញ្ចេញមតិលើនិន្នាការនេះ លោក Dmitri Litvinov នាយកប្រតិបត្តិ និងជាស្ថាបនិកនៃក្រុមហ៊ុន Dreem បានប្រាប់កាសែតអាម៉េរិក Financial Express ថា ការកើនឡើងយ៉ាងខ្លាំងនៃការចូលរួម OPT និង STEM OPT ឆ្លុះបញ្ចាំងពីការផ្លាស់ប្តូរយុទ្ធសាស្រ្តរបស់ក្រុមហ៊ុនបច្ចេកវិទ្យាអាម៉េរិក។

លោកសង្កត់ធ្ងន់ថា «ចំពេលមានការរឹតបន្តឹងគោលនយោបាយអន្តោប្រវេសន៍របស់សហរដ្ឋអាម៉េរិក ដែលធ្វើឱ្យ វីសាប្រភេទ H-1B និងអ្នកកាន់កាតពណ៌បៃតង កាន់តែលំបាកធ្វើការនៅសហរដ្ឋអាម៉េរិក។ ដូច្នេះ ក្រុមហ៊ុននានា កំពុងងាកទៅរកមធ្យោបាយ OPT ជាមធ្យោបាយមួយ ដើម្បីទាក់ទាញ និងអភិវឌ្ឍធនធានមនុស្សឆ្នើមមកពីជុំវិញពិភពលោក។»

លោកបន្ថែមថា ក្រៅពី OPT គឺ STEM OPT អាចជួយឱ្យក្រុមហ៊ុននានា ក្នុងការកសាង ទ្រទ្រង់ និងអភិវឌ្ឍធនធានមនុស្សមានទេពកោសល្យក្នុងរយៈពេលវែង ដើម្បីបំពេញតម្រូវការដែលកំពុងកើនឡើងក្នុងវិស័យបច្ចេកវិទ្យាសហរដ្ឋអាម៉េរិក៕