ការពិចារណាផ្នែកហិរញ្ញវត្ថុ មានឥទ្ធិពលខ្លាំងលើការសម្រេចចិត្តរបស់និស្សិត សម្រាប់ការបន្តការសិក្សានៅរដូវស្លឹកឈើជ្រុះឆ្នាំ២០២៥, នេះបើយោងតាម ApplyBoard។

នៅក្នុងខែសីហា-កញ្ញា ឆ្នាំ ២០២៥ ក្រុមហ៊ុនបច្ចេកវិទ្យាអប់រំកាណាដា បានស្ទង់មតិលើក្រុមហ៊ុនជ្រើសរើសបុគ្គលិកដែលជាដៃគូជិត ៤០០ ដើម្បីវាយតម្លៃពីរបៀប ដែលការផ្លាស់ប្ដូរគោលនយោបាយប្រទេសគោលដៅនិស្សិតអន្តរជាតិ កំពុងជះឥទ្ធិពលដល់ចំណាប់អារម្មណ៍ បរិមាណ ទឹកចិត្ត និងប្រទេស ដែលនិស្សិតពេញចិត្តទៅបន្តការសិក្សា។ ការស្ទង់មតិនេះ បានរកឃើញថា នៅក្នុងត្រីមាសទី៣ ក្នុងចំណោមកត្តាជំរុញចម្បងទាំង៥ មាន៤ទាក់ទងនឹងបញ្ហាហិរញ្ញវត្ថុ។

តម្លៃនៃការសិក្សា គឺជាកត្តាចម្បងបំផុត ក្នុងចំណោមនិស្សិត ដែលកំពុងពិចារណាសិក្សានៅបរទេស ហើយអ្នកឆ្លើយតបការស្ទង់មតិកាន់តែច្រើន បានលើកឡើងថា តម្លៃនៃការសិក្សា គឺជាកត្តាជំរុញដ៏សំខាន់ជាងពេលណាៗទាំងអស់, នេះបើយោងតាម​ Apply Board។

ដោយសារតែតម្លៃនៃការរស់នៅតាមបណ្ដាប្រទេសគោលដៅមួយចំនួន កំពុងបន្តកើនឡើង និស្សិតដែលគិតគូរពីបញ្ហាថវិកា អាចងាកទៅរកសហគមន៍ ដែលមានតម្លៃថោកជាងនៅក្នុងប្រទេសពេញនិយម ឬជ្រើសរើសកម្មវិធីខ្លីៗ ដើម្បីបន្តការសិក្សាជំនួសវិញ។

កត្តាជំរុញចម្បងបន្ទាប់គឺ ឱកាសការងារក្រោយបញ្ចប់ការសិក្សា, តម្លៃនៃការរស់នៅ, ឱកាសធ្វើការពេលកំពុងសិក្សា និងគោលដៅដែលស្វាគមន៍និស្សិតអន្តរជាតិ។

គួរបញ្ជាក់ថា ចំនួននិស្សិតដែលកំពុងសិក្សាថ្នាក់ឧត្តមសិក្សានៅបរទេសបានកើនឡើងជាង ៣ដងក្នុងរយៈពេល ២ទសវត្សរ៍ចុងក្រោយនេះ ដោយកើនឡើងពី ២,១លាននាក់ក្នុងឆ្នាំ២០០០ ដល់ជិត ៦,៩លាននាក់ក្នុងឆ្នាំ ២០២២, នេះបើយោងតាមវិទ្យាស្ថានស្ថិតិអង្គការយូណេស្កូ។ និស្សិតអន្តរជាតិមានចំនួន ២,១% នៃចំនួននិស្សិតចុះឈ្មោះចូលរៀនថ្នាក់ឧត្តមសិក្សាទូទាំងពិភពលោកក្នុងឆ្នាំ២០០០ ដែលកើនឡើងដល់ ២,៧% នៅត្រឹមឆ្នាំ២០២២។

អឺរ៉ុប និងអាមេរិកខាងជើង នៅតែជាគោលដៅឈានមុខគេ សម្រាប់និស្សិតអន្តរជាតិ ដែលមានបំណងបន្តការសិក្សានៅបរទេស ដោយទទួលនិស្សិតជាងពាក់កណ្ដាលនៃចំនួនសរុបទូទាំងពិភពលោក ប្រហែល ៤លាននាក់។ ការចុះឈ្មោះចូលរៀនថ្នាក់ឧត្តមសិក្សាទូទាំងពិភពលោក ក៏បានកើនឡើងផងដែរ ដោយកើនឡើងពី ២,៥ ដង ចាប់តាំងពីឆ្នាំ២០០០ ដល់និស្សិត ២៦៤លាននាក់នៅត្រឹមឆ្នាំ២០២៣៕