ត្រឹមអាយុ១២ឆ្នាំ កុមារ៉ា ង្វៀន ណាំឡុង ជាសិស្សថ្នាក់ទី៧ មកពីអនុវិទ្យាល័យ Tran Dai Nghia ក្នុងទីក្រុងហូជីមីង ទទួលបានពិន្ទុ IELS ក្នុងការប្រឡងលើកដំបូងរបស់គេ រហូតដល់ 8.0 ខណៈវិញ្ញាសាស្ដាប់ និងនិយាយ គេទទួលបានពិន្ទុល្អឥតខ្ចោះ 9.0 តែម្ដង, នេះបើយោងតាមកាសែតវៀតណាម VN Express ។

អ្វីដែលគួរឱ្យចាប់អារម្មណ៍នោះគឺ កុមារ៉ា ណាំឡុង មិនបានចូលរួមក្នុងវគ្គសិក្សាបំប៉ន ឬសិក្សាបន្ថែមនៅមជ្ឈមណ្ឌលសិក្សាភាសាបរទេសនោះទេ។ មុនចូលរួមក្នុងការប្រឡង IELS កុមារ៉ារូបនេះ បានចូលរួមធ្វើតេស្តជំនាញភាសាអង់គ្លេស ក្នុងកម្មវិធី TOEIS កាលពីខែកុម្ភៈឆ្នាំ២០២៤ និងទទួលបានពិន្ទុ ៩២០ លើពិន្ទុពេញ ៩៩០ លើជំនាញទាំងបួន រួមមាន អាន ស្ដាប់ និយាយ និងសរសេរ។

កុមារអាយុ១២ឆ្នាំរូបនេះបាននិយាយថា រូបគេមិនដែលរៀនមេរៀនបន្ថែម ឬអនុវត្តសំណួរសាកល្បងច្រើននោះទេ ផ្ទុយទៅវិញ គេរៀនតាមរយៈការអនុវត្តក្នុងការរស់នៅប្រចាំថ្ងៃ។ លើសពីនេះ ជនជាតិដើម គឺមានតែម្នាក់គត់ ដែលគេតែងតែជជែកជាមួយគឺគ្រូភាសាអង់គ្លេសរបស់គេ។

ក្រៅពីការសិក្សាភាសាអង់គ្លេស ឡុង ចូលចិត្តសរសេរកម្មវិធីកុំព្យូទ័រ ខណៈជំនាញនេះ គាត់ចាប់អារម្មណ៍តាំងពីថ្នាក់ទី១មកម្ល៉េះ។ អ្វីដែលរឹតតែគួរឱ្យចាប់អារម្មណ៍នោះគឺ គេបានបង្រៀនមុខវិជ្ជានេះ ទៅមិត្តភក្តិរបស់គេ នៅកាណាដា និងអូស្ត្រាលីទៀតផង ក្រៅពីនេះ គេបានចូលរួម និងឈ្នះការប្រកួតតេស្តគណិតវិទ្យា និងវិទ្យាសាស្ត្រជាច្រើន។

ថ្មីៗនេះ ឡុង បានឈានដល់វគ្គផ្ដាច់ព្រ័ត្រ ៨ក្រុមចុងក្រោយ នៃកម្មវិធីប្រកួតភាពយន្តខ្លីពិភពលោក Filmantic រដូវកាលទី៩ ហើយបានជាប់ចំណាត់ថ្នាក់កំពូល ៣៥ភាគរយនៅលើ Coverfly ដែលជាវេទិកាសម្រាប់អ្នកសរសេររឿងអាជីព។ អត្ថបទរឿងខ្លី ចំនួន ១៣ទំព័ររបស់គេ បានរៀបរាប់អំពីក្មេងប្រុសម្នាក់ ដែលបានរកឃើញថាមពលផ្លូវចិត្តពិសេសរបស់ខ្លួន។

បើទោះបីជាគេទទួលបានសមិទ្ធផលច្រើនបែបនេះក៏ដោយ កុមារ៉ា ណាំឡុង និយាយថា គេមិនមានសម្ពាធ ចង់ពូកែលើជំនាញគ្រប់មុខនោះទេ។ នៅក្នុងវីដេអូតិកតុករបស់គេ ដែលមានអ្នកតាមដានប្រមាណជាង ១៣,០០០នាក់ គេបានបង្ហាញពីការពេញចិត្តជាមួយនឹងការជាប់ចំណាត់ថ្នាក់លេខ ២០ ក្នុងចំណោមសិស្ស ៣៣នាក់ក្នុងថ្នាក់របស់គេ។ ខណៈជាធម្មតា កុមារ៉ារូបនេះ ចំណាយពេលប្រហែល ៥ម៉ោងក្នុងមួយសប្ដាហ៍លើកិច្ចការសាលា និងប្រើពេលនៅសល់ ធ្វើអ្វីដែលគេចូលចិត្ត៕