ទោះមានប្រវត្តិសិក្សាល្អ និស្សិតឆ្នើមពីរនាក់ នៅតែមិនអាចចូលរៀននៅសាកលវិទ្យាល័យជាតិសេអ៊ូល (SNU) ដោយសារធ្លាប់មានប្រវត្តិប៊ូលីអ្នកដទៃក្នុងសាលា។

ពួកគេស្ថិតក្នុងចំណោមបេក្ខជន ៤៥នាក់ ដែលដាក់ពាក្យចូលរៀននៅសាកលវិទ្យាល័យកំពូលៗចំនួន ៦ ក្នុងប្រទេសកូរ៉េខាងត្បូង ដែលខកខានក្នុងការសម្រេចក្ដីសុបិនបន្តការសិក្សានៅមហាវិទ្យាល័យដែលពួកគេចង់រៀន ព្រោះតែធ្លាប់មានប្រវត្តិប្រើអំពើហិង្សា និងប៊ូលីអ្នកដទៃក្នុងសាលា។

និស្សិត ២នាក់ ដែលត្រូវបានបដិសេធនៅ​ SNU បានដាក់ពាក្យ តាមរយៈពិន្ទុតេស្តសមត្ថភាពសិក្សារបស់ពួកគេ។ ទោះបីជាពួកគេមានសមត្ថភាពពូកែក្នុងការសិក្សាក៏ដោយ ប៉ុន្តែសាលានៅតែមិនអនុញ្ញាតឱ្យពួកគេចូលរៀន បន្ទាប់ពីដឹងពីប្រវត្តិនៃការប្រើអំពើហិង្សា កាលពួកគេសិក្សានៅថ្នាក់បឋម និងមធ្យមសិក្សា។ ចាប់តាំងពីឆ្នាំសិក្សា២០១៤ មក SNU បានកាត់ពិន្ទុរហូតដល់ ២ពិន្ទុ ចេញពីពិន្ទុ CSAT របស់បេក្ខជន ដែលបានទទួលវិធាន នៃការវិន័យនៃការផ្ទេរសាលា ឬការបណ្ដេញចេញ។

នៅប្រទេសកូរ៉េខាងត្បូង និស្សិតដាក់ពាក្យទៅបន្តការសិក្សានៅសាកលវិទ្យាល័យ មានជម្រើសចំនួន២ គឺ ការចូលរៀនមុនកាលកំណត់ (Early admissions) ដែលពិចារណាលើកំណត់ត្រាសាលា និងការសម្ភាសន៍ និងដំណាក់កាលមួយទៀត ការចូលរៀនទូទៅ ដែលពឹងផ្អែកជាចម្បងលើពិន្ទុពី CAST ។

នៅសាកលវិទ្យាល័យជាតិ Pusan បានបដិសេធសំណើរចូលរៀនរបស់និស្សិត ៨នាក់ ដោយក្នុងនោះ ៦នាក់មកពី ក្រុមចូលរៀនមុនកាលកំណត់ និង ២នាក់មកពី ក្រុមចូលរៀនទូទៅ ដោយសារ ពួកគេ ធ្លាប់មានប្រវត្តិ ប្រើអំពើហិង្សានៅសាលា។ ដោយឡែក សាកលវិទ្យាល័យជាតិ Kangwon បានបដិសេធ មិនទទួលសិស្សចំនួន ៥នាក់ ខណៈសាកលវិទ្យាល័យជាតិ Jeonbuk មានចំនួន ៥ករណីដែរ។

សាកលវិទ្យាល័យ Gyeongsang បានបដិសេធ និស្សិតដាក់ពាក្យចូលរៀនមុនកាលកំណត់ ចំនួន ៣ ករណី។ សាកលវិទ្យាល័យជាតិ Kyungpook បានបដិសេធ និស្សិតចំនួន ២២ ករណី ដែលនេះជាចំនួនខ្ពស់បំផុត ក្នុងចំណោមសាកលវិទ្យាល័យជាតិ។

ផ្ទុយទៅវិញ សាកលវិទ្យាល័យជាតិចំនួន ៤ផ្សេងទៀត រួមមាន សាកលវិទ្យាល័យ Chonnam, Jeju, Chungnam និង Chungbuk មិនបានបដិសេធនិស្សិតម្នាក់ ដោយផ្អែកលើមូលដ្ឋាននេះ នោះទេ។ នេះគឺដោយសារតែសាកលវិទ្យាល័យទាំងនេះ ពិចារណាតែលើកំណត់ត្រា នៃអំពើហិង្សានៅសាលា ទៅតាមប្រភេទជំនាញ ដូចជា សម្រាប់និស្សិតអត្តពលិកជាដើម។

ចាប់ពីឆ្នាំក្រោយ សាកលវិទ្យាល័យទាំងអស់ ក្នុងប្រទេសកូរ៉េខាងត្បូង នឹងអនុវត្ត ការកាត់បន្ថយជាកាតព្វកិច្ចសម្រាប់បេក្ខជន ដែលមានកំណត់ត្រាអំពើហិង្សានៅសាលា ដោយមិនគិតពីប្រភេទ និងមុខវិជ្ជា ដែលពួកគេត្រូវបន្តការសិក្សានោះទេ។

ការផ្លាស់ប្ដូរគោលនយោបាយនេះ ត្រូវបានជំរុញ ដោយប្រិតកម្មពីសាធារណជន បន្ទាប់ពី មានការលេចធ្លាយព័ត៌មានថា កូនប្រុសរបស់អតីតព្រះរាជអាជ្ញា Chung Sun-sin ដែលត្រូវបានតែងតាំង ជាប្រធានការិយាល័យស៊ើបអង្កេតជាតិមួយរយៈពេលខ្លីក្នុងឆ្នាំ២០២៣ ត្រូវបានផ្ទេរ ទៅវិទ្យាល័យមួយផ្សេងទៀត ដោយសារតែធា្លប់ប៊ូលីអ្នកដទៃ ប៉ុន្តែនៅតែទទួលបានសិទ្ធិចូលរៀននៅ SNU ដោយកាត់ចេញត្រឹមតែ ២ពិន្ទុលើ CSAT ប៉ុណ្ណោះ។

ទោះជាយ៉ាងណាក៏ដោយ នៅពេលដែលគោលនយោបាយនេះពង្រីក ការព្រួយបារម្ភក៏កំពុងកើនឡើងដូចគ្នាដែរ ជុំវិញការកើនឡើងនៃជម្លោះ និងពាក្យបណ្ដឹងនៅក្នុងសាលារៀន។ និស្សិតដែលត្រូវបានចោទប្រកាន់ពីបទប៊ូលីអ្នកដទៃ កំពុងជួលមេធាវី និងដាក់ពាក្យបណ្ដឹងរដ្ឋបាល ដើម្បីបដិសេធការសម្រេចចិត្តផ្នែកវិន័យ។

អ្នករិះគន់ព្រមានថា ការតស៊ូផ្នែកច្បាប់ នឹងត្រូវបានជំរុញ និងគាំទ្រដោយក្រុមហ៊ុនផ្ដល់សេវាកម្មផ្នែកច្បាប់ ព្រោះការអនុវត្តគោលនយោបាយនេះ កំពុងប្រែក្លាយករណីអំពើហិង្សានៅសាលា ទៅជាបណ្ដឹង ដែលជាឱកាសសម្រាប់ការរកប្រាក់ចំណេញរបស់អ្នកជំនាញផ្នែកច្បាប់ និងជំរុញឱ្យមានវដ្តមួយ ដែលបំផ្លាញបរិយាកាសក្នុងថ្នាក់រៀន៕