ក្មេងប្រុសវ័យជំទង់ឈ្មោះ Heman Bekele មានអាយុ ១៤ឆ្នាំ ជាសិស្សថ្នាក់ទី៩ នៅវិទ្យាល័យ W.T. Woodson ក្នុងទីក្រុង Annandale រដ្ឋ Virginia សហរដ្ឋអាម៉េរិក បានក្លាយជាអ្នកទទួលពានរង្វាន់កំពូលអ្នកវិទ្យាសាស្ត្រវ័យក្មេងរបស់អាម៉េរិក (America’s Top Young Scientist) តាមរយៈការសិក្សាពីដំណើរការផលិតសាប៊ូព្យាបាលជំងឺមហារីកស្បែក ។ កុមារ Heman Bekele ជាបេក្ខជនអ្នកវិទ្យាសាស្ត្រវ័យក្មេងម្នាក់ដែលប្រកួតគំនិតច្នៃប្រតិដ្ឋជាមួយមិត្តភក្តិអាយុស្របាគ្នា ១០នាក់ផ្សេងទៀតនៅវគ្គដប់នាក់ចុងក្រោយ ។ ទីបំផុតកិច្ចការស្រាវជ្រាវរបស់ Heman ទទួលបានការវាយតម្លៃខ្ពស់ពីគណៈកម្មការអ្នកវិទ្យាសាស្ត្រវ័យក្មេង ព្រមទាំងទទួលបានទឹកប្រាក់លើកទឹកចិត្តចំនួន ២ម៉ឺនប្រាំពាន់ដុល្លារអាម៉េរិក ។

កិច្ចការស្រាវជ្រាវរបស់ Heman Bekele បានផ្តោតសំខាន់លើដំណើរការផលិតសាប៊ូប្រើប្រាស់ដើម្បីព្យាបាលស្បែកមានជំងឺមហារីកឱ្យជាសះស្បើយ ។ លទ្ធផលនៃការសិក្សារបស់ក្មេងប្រុសនេះ បានបង្ហាញឱ្យគណៈកម្មការ និងពិភពលោកដឹងថា រូបគេមានសមត្ថភាពផលិតសាប៊ូដុសខ្លួនដែលអាចព្យាបាលជំងឺមហារីកស្បែកបានយ៉ាងពិតប្រាកដ ហើយសាប៊ូនេះនឹងក្លាយជាផ្នែកមួយនៃដំណោះស្រាយបញ្ហាសង្គម ព្រមទាំងជួយដល់គ្រួសារដែលមានជីវភាពក្រីក្រ ។ ទន្ទឹមនឹងនវានុវត្តបែបវិទ្យាសាស្ត្រអំពីលទ្ធផលសិក្សាដ៏វិជ្ជមាននេះ គេមិនទាន់អនុញ្ញាតឱ្យកុមារ Heman Bekele ប្រើប្រាស់រូបមន្តផលិតសាប៊ូ ដើម្បីដាក់លក់នៅលើទីផ្សារឡើយ ។ កុមារ Heman Bekele ត្រូវរង់ចាំលទ្ធផលផ្តល់សិទ្ធិអនុញ្ញាតិទីភ្នាក់ងារម្ហូបអាហារ និងឱសថរបស់អាម៉េរិក ។

នៅក្នុងបទសម្ភាសន៍មួយជាមួយសារព័ត៌មាន USA Today កុមារ Heman Bekele បាននិយាយថា ៖ “ខ្ញុំតែងតែចាប់អារម្មណ៍លើមុខវិជ្ជាជីវវិទ្យា និងការប្រើប្រាស់បច្ចេកវិទ្យា ហើយខ្ញុំបង្ហាញពីភាពល្អឥតខ្ចោះ នៃការសិក្សារបស់ខ្ញុំ ដើម្បីបង្ហាញពីគំនិតផ្ទាល់ខ្លួនជួយដល់មនុស្សទន់ខ្សោយ ។ ខ្ញុំជឿថា គំនិតដែលខ្ញុំរកឃើញពេលនេះនឹងជួយដល់មនុស្សជាច្រើន មានន័យថា យើងជាអ្នកជួយសម្រាលដល់ការលំបាករបស់ពួកគេ” ។

អ្នកស្រី Muluemebet Getachew ម្តាយរបស់កុមារា Heman Bekele បាននិយាយថា Heman ជាក្មេងដែលមានចំណង់ចំណូលចិត្តខ្ពស់លើគំនិតវិទ្យាសាស្ត្រ ហើយមានទម្លាប់លេង និងប្រើប្រាស់ឧបករណ៍ផ្សេងៗដែលកែច្នៃដោយខ្លួនឯង ។ ស្របនឹងគំនិតស្រឡាញ់ការសិក្សាមុខវិជ្ជាវិទ្យាសាស្ត្រ (STEM) Heman ជាក្មេងដែលចូលចិត្តឆ្ងល់ច្រើន ហើយពូកែកសាងទំនាក់ទំនងជាមួយមនុស្សជុំវិញខ្លួន ។

គួររំលឹកដែរថា កម្មវិធីកំពូលអ្នកវិទ្យាសាស្ត្រវ័យក្មេងរបស់អាម៉េរិក (America’s Top Young Scientist) បានបើកឱកាសឱ្យកុមារទូទៅសិក្សាចាប់ពីថ្នាក់ទី៥ ដល់ថ្នាក់ទី៩ ជុំវិញពិភពលោកចូលរួមប្រកួតគំនិតវិទ្យាសាស្ត្ររបស់ខ្លួន ។ ចំពោះប្រាក់រង្វាន់ចំនួន ២ម៉ឺនប្រាំពាន់ដុល្លារ កុមារា Heman បានបញ្ជាក់ថា រូបគេនឹងយកប្រាក់ទាំងនេះទៅគាំទ្រការសិក្សាស្រាវជ្រាវបន្តទៀត ពិសេសពង្រឹងសមត្ថភាពផ្ទាល់ខ្លួនបន្ថែមលើមុខវិជ្ជាវិទ្យាសាស្ត្រ STEM ហើយមួយផ្នែកនឹងសន្សំទុកសម្រាប់ការសិក្សានៅមហាវិទ្យាល័យ៕