អាហារូបត្ថម្ភដែលសមស្រប គឺជាមូលដ្ឋានគ្រឹះសម្រាប់ការរស់រាន សុខភាពល្អ និងការអភិវឌ្ឍរបស់កុមារ។ ស្របគ្នានេះ ឪពុកម្ដាយគួរងាកមកចំណាយលើអាហារូបត្ថម្ភរបស់កូនជាជាងចំណាយលុយច្រើនទៅលើការព្យាបាលនៅមន្ទីរពេទ្យ។

ការ​ញ៉ាំ​អាហារ​ឱ្យ​បានត្រឹមត្រូវ​អាច​ជា​ការ​ពិបាក ។ កាលវិភាគ​គ្រួសារ​មាន​ភាព​មមាញឹក ហើយ​អាហារ​ដែលមិនផ្ដល់គុណប្រយោជន៍ដល់សុខភាពអាច​រក​បាន​យ៉ាង​ងាយ​ស្រួល។ បើតាម NEMOURS KidsHealth មានគន្លឹះមួយចំនួនដែលជួយឱ្យឪពុកម្ដាយចិញ្ចឹមថែទាំកូនឱ្យចម្រើនវ័យបានល្អតាមរយៈការផ្តល់អាហារូបត្ថម្ភសមស្រប រួមមាន៖

១. អាហារលក្ខណៈគ្រួសារ ៖ ការរៀបចំអាហារ​ជា​លក្ខណៈ​គ្រួសារ ​គឺ​ជាវិធីដ៏ល្អទាំង​ឪពុក​ម្តាយ ​និង​កូនៗទទួលបានអាហារូបត្ថម្ភល្អ។ ទន្ទឹមគ្នានេះ កុមារចូលចិត្តការទាយប្រភេទអាហារគ្រួសារ ហើយឪពុកម្តាយមានឱកាសណែនាំកូនៗអំពីអាហារថ្មី និងធ្វើជាគំរូសម្រាប់អាហារដែលមានសុខភាពល្អ។ ក្នុងនោះ កុមារ​ដែល​ចូល​រួម​ក្នុង​អាហារ​ជា​លក្ខណៈ​គ្រួសារច្រើនតែងាយនឹងញ៉ាំបន្លែ ផ្លែឈើ និងគ្រាប់ធញ្ញជាតិ។

ម៉្យាងវិញទៀត ឪពុកម្ដាយអាចអនុញ្ញាតឱ្យកូនអញ្ជើញមិត្តណាម្នាក់ឱ្យមកញ៉ាំអាហារពេលល្ងាចជាមួយគ្នា។ ពេលនោះឪពុកម្តាយ គួរចូលរួមជាមួយកូនរបស់អ្នកក្នុងសកម្មភាពរៀបចំផែនការ និងការរៀបចំអាហារដែលមានជីវជាតិល្អ។ ហើយ​នៅពេលទទួលទាន គួររក្សាស្ថានភាពឱ្យស្ងប់ស្ងាត់ និងរួសរាយរាក់ទាក់ គ្មានការបង្រៀន ឬជជែកតវ៉ា។

២. ស្តុកទុកអាហារសុខភាពនៅផ្ទះ ៖ កុមារ ជាពិសេសក្មេងតូចៗនឹងញ៉ាំអាហារភាគច្រើនដែលមាននៅផ្ទះ។ ដូច្នេះឪពុកម្តាយគួរដាក់ផ្លែឈើ និងបន្លែចូលទៅក្នុងទម្លាប់អាហារប្រចាំថ្ងៃ យ៉ាងហោចណាស់ប្រាំដងក្នុងមួយថ្ងៃ។ អាហារសម្រន់ល្អផ្សេងទៀតរួមមាន ទឹកដោះគោយ៉ាអួមានជាតិខ្លាញ់ទាប ប៊ឺ សណ្ដែកដី គ្រាប់ធញ្ញជាតិ ។ល។ សាច់គ្មានខ្លាញ់ និងប្រភពប្រូតេអ៊ីនល្អផ្សេងទៀត ដូចជាត្រី ស៊ុត សណ្តែក ជាដើម។ ម៉្យាងវិញទៀត កំណត់ការទទួលទានជាតិខ្លាញ់ ដោយ​ជៀសវាងអាហារចៀន និងជ្រើសរើសវិធីចម្អិនដែលមានសុខភាពល្អ ដូចជា ការស្ងោរ ដុត អាំង និងចំហុយ។

៣. ធ្វើជាគំរូសម្រាប់កូន ៖ មធ្យោបាយដ៏ល្អបំផុតដើម្បីលើកទឹកចិត្តកូនៗឱ្យញ៉ាំអាហារដែលមានសុខភាពល្អ គឺការញ៉ាំឱ្យបានល្អដោយខ្លួនឯង។ កុមារនឹងធ្វើតាមការដឹកនាំរបស់ឪពុកម្ដាយដែលពួកគេឃើញជារៀងរាល់ថ្ងៃ។ តាមរយៈការញ៉ាំផ្លែឈើ និងបន្លែ ហើយមិនញ៉ាំអាហារដែលគ្មានជីវជាតិច្រើនពេក ជាគន្លឹះផ្ដល់គំរូញ៉ាំអាហារដ៏ត្រឹមត្រូវសម្រាប់កុមារ។

៤. កុំប្រើវិធីយកឈ្នះកូនឱ្យញ៉ាំអាហារត្រឹមត្រូវ ៖ ការផ្ដល់អាហារត្រឹមត្រូវសម្រាប់កូនៗក៏បណ្ដាលឱ្យកើតមានជម្លោះបានផងដែរ។ កុមារច្រើនសម្រេចចិត្តថា ពួកគេនឹងញ៉ាំអ្វីដែលធ្វើឱ្យពួកគេឆ្អែត។ ឪពុកម្តាយដែលមានចេតនាល្អអាចរកឃើញថាខ្លួនកំពុងចរចា ឬសូកប៉ាន់កូនៗ ដូច្នេះកូនបរិភោគអាហារដែលមានសុខភាពល្អតែនៅចំពោះមុខឪពុកម្ដាយប៉ុណ្ណោះ។ យុទ្ធសាស្ត្រល្អជាង គឺផ្តល់ឱ្យកុមារនូវការគ្រប់គ្រងមួយចំនួន ប៉ុន្តែក៏កំណត់ប្រភេទអាហារដែលមាននៅផ្ទះផងដែរ។ ដូច្នេះ កុំសូកប៉ាន់ ឬផ្តល់រង្វាន់ដល់កុមារជាអាហារមានជាតិផ្អែម។ នៅពេលដែលអ្នកចង់បង្ហាញក្តីស្រលាញ់ គ្រាន់តែផ្តល់ការឱបដល់កូនៗ ឬសរសើរ។

៥. ចូលរួមជាមួយកុមារ ៖ ក្មេងភាគច្រើននឹងរីករាយក្នុងការសម្រេចចិត្តថា តើត្រូវធ្វើអ្វីសម្រាប់អាហារពេលល្ងាច? និយាយជាមួយពួកគេអំពីការជ្រើសរើស និងរៀបចំផែនការអាហារដែលមានតុល្យភាព។ កុមារខ្លះប្រហែលជាចង់ជួយទិញគ្រឿងផ្សំ និងរៀបចំអាហារ។ ពេលនៅហាងលក់ទំនិញ ឪពុកម្ដាយអាចបង្រៀនក្មេងៗឱ្យពិនិត្យមើល ស្លាកសញ្ញាអាហារ ដើម្បីចាប់ផ្តើមយល់ពីអ្វីដែលត្រូវទិញ។ នៅក្នុងផ្ទះបាយជ្រើសរើសកិច្ចការដែលសមស្របតាមអាយុ ដូច្នេះកុមារអាចលេងជាផ្នែកមួយដោយមិនរងរបួស ឬមានអារម្មណ៍ធុញថប់។

ជាមួយគ្នានេះ អាហារថ្ងៃត្រង់នៅសាលា អាចជាមេរៀនអាហារសុខភាពមួយផ្សេងទៀតសម្រាប់កុមារ។ ប្រសិនបើអ្នកអាចឱ្យក្មេងៗគិតអំពីអ្វីដែលពួកគេញ៉ាំសម្រាប់អាហារថ្ងៃត្រង់ អ្នកប្រហែលជាអាចជួយពួកគេផ្លាស់ប្តូរការញ៉ាំអាហារត្រឹមត្រូវ។ បំផុសគំនិតអំពីអាហារប្រភេទណាដែលពួកគេចង់ញ៉ាំសម្រាប់អាហារថ្ងៃត្រង់ ឬទៅហាងលក់គ្រឿងទេស ដើម្បីទិញទំនិញដែលមានសុខភាពល្អ និងអាចវេចខ្ចប់បានជាមួយគ្នា នឹងនាំកុមារទៅរកជម្រើសដែលមានសុខភាពល្អពេញមួយជីវិត៕