លទ្ធផល​មិន​ល្អ​នៅ​ក្នុង​ការ​សិក្សា បាន​ក្លាយ​ជា​ប្រធាន​បទ​សម្រាប់​ឪពុកម្តាយ​មួយ​ចំនួន​​​យក​មកធ្វើ​ការ​ស្តី​បន្ទោស​កូនៗ រហូត​ប្រៀបធៀប​លទ្ធផលសិក្សា​របស់​កូន​ខ្លួន​ឯង ជាមួយ​នឹង​កូនអ្នកដទៃ ដូចជា​មិត្តភក្តិ ឬបងប្អូន​ជាដើម។ ទង្វើនេះ បានធ្វើ​ឱ្យ​កុមារ ឬ​យុវជន​មួយ​ចំនួន​មាន​បញ្ហា​ផ្លូវចិត្ត ហើយខ្លះ​រហូត​មានអារម្មណ៍​បាត់បង់​ខ្លួនឯង។

កញ្ញា បុប្ផា (ឈ្មោះដាក់ឱ្យ) បច្ចុប្បន្ន​ជា​និស្សិត​សាកលវិទ្យាល័យមួយ​នៅ​រាជធានីភ្នំពេញបាននិយាយថា រូបនាងធ្លាប់ទទួលអារម្មណ៍ថាមានសម្ពាធ បាត់ក្ដីសង្ឃឹម គិតអ្វីមិនចេញ នៅពេលម្ដាយប្រៀបធៀបលទ្ធផលសិក្សារបស់ខ្លួនរៀនមិនពូកែដូចមិត្តភក្ដិ។ បុប្ផា បន្តថា នៅពេលនោះរូបនាងខិតខំសិក្សាយ៉ាងខ្លាំងដើម្បីទទួលបាននិទ្ទេស A ឬនិទ្ទេស B ក្នុងការប្រឡងបាក់ឌុបឆ្នាំ២០២៣ ប៉ុន្តែលទ្ធផលដែលនាងទទួលបានគឺនិទ្ទេស C ដែល​មិន​មែនជា​ក្តីរំពឹង​របស់ម្តាយ​នាងឡើយ។ បុប្ផា បន្ត​ថា នាងដឹងថាម្ដាយនិយាយចង់ឱ្យកូនល្អ ប៉ុន្តែនាងបានខិតខំអស់ពីសមត្ថភាពទៅហើយ តែ​ម្ដាយរបស់នាង​បែរជាប្រៀបធៀបរូបនាង​ជាមួយកូនអ្នកដទៃ​ដែលទទួលបានលទ្ធផលល្អជាងនាង។

ចំពោះបញ្ហានេះ លោកបណ្ឌិត យង់ ពៅ អ្នកវិភាគ​បញ្ហា​សង្គម និង​ជាអគ្គលេខាធិការ នៃរាជបណ្ឌិត្យសភាកម្ពុជា បានស្នើដល់​ឪពុកម្ដាយទាំងអស់គួរបញ្ឈប់ការប្រៀបធៀបលទ្ធផលសិក្សារបស់កូនខ្លួនជាមួយអ្នកដទៃ ហើយ​ត្រូវគិតអំពីការផ្ដល់ឱកាសឱ្យកូនរបស់ខ្លួនបានសិក្សារៀនសូត្រឱ្យបានពេញលេញទាំងនៅក្នុងកម្រិតបឋមសិក្សា កម្រិតមធ្យមសិក្សា ក៏​ដូចជា​ឧត្តមសិក្សា​។

អគ្គលេខាធិការ នៃរាជបណ្ឌិត្យសភាកម្ពុជា បញ្ជាក់បន្ថែមថា ការប្រឡងបាក់ឌុប គឺជាការបញ្ជាក់ថា បានប្រឡងបញ្ចប់ភូមិសិក្សានៃមធ្យមសិក្សា ដោយ​មិនបានបញ្ជាក់ថា ជាការបញ្ចប់ការរៀនសូត្រទាំងស្រុងនោះទេ ដូច្នេះឱកាសរីកចម្រើននៃចំណេះនៅមានបន្តទៀត។ លោកបណ្ឌិត យង់ ពៅ បន្តថា និទ្ទេសប្រឡងបាក់ឌុប មិនបានកំណត់ជោគវាសនារបស់មនុស្សទេ ព្រោះមនុស្សត្រូវរៀនពេញមួយជីវិត ដើម្បីអភិវឌ្ឍខ្លួន រីកចម្រើន និងរស់រាន (រស់ រៀន រីកចម្រើន)។

លោកបណ្ឌិត យង់ ពៅ បន្តថា បើទោះជាសិស្សនិទ្ទេស E ឬសិស្សនិទ្ទេស F ពួកគេក៏អាចមានសមត្ថភាពខ្លាំង នៅពេលបំពេញការងារអាជីពរបស់ខ្លួន។ បច្ចុប្បន្ននេះ រាជរដ្ឋាភិបាល ក៏បានផ្ដល់ឱកាសដល់យុវជនទាំងអស់មានឱកាសចូលរៀនជំនាញបណ្ដុះបណ្ដាលបច្ចេកទេស​ និងវិជ្ជាជីវៈ ដើម្បីមានអាជីពមួយច្បាស់លាស់បង្កើតជាមុខរបរសម្រាប់ចិញ្ចឹមជិវិត។

«សូមបង្កបរិយាកាសដែលជាបរិស្ថានអប់រំ ប្រកបដោយភាពកក់ក្ដៅទៅដល់យុវជនទើបល្អ ជៀសជាងការស្ដីបន្ទោស»

លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា ការប្រៀបធៀបលទ្ធផលសិក្សាកូនរបស់ខ្លួនជាមួយកូនអ្នកដទៃ គឺដោយសារឪពុកម្ដាយមិនយល់ពីភាពខុសគ្នារបស់កូនម្នាក់ៗ។  លោក គីម ដារ៉ា បន្តថា ដើម្បីដោះស្រាយបញ្ហានេះ ទាល់តែឪពុកម្ដាយព្រមទទួលស្គាល់ភាពខុសៗគ្នារបស់មនុស្សម្នាក់ៗ ជាពិសេសកូនរបស់ខ្លួន ពីព្រោះមនុស្សម្នាក់ៗកើតមកនៅលើផែនដីសុទ្ធតែមានទេពកោសល្យខ្លាំងពូកែខុសៗគ្នា។

ស្ថាបនិកសាលាបង្វឹក Startup Community បញ្ជាក់បន្ថែមថា ការសិក្សាអប់រំតែមួយមុខ ក៏មិនអាចបញ្ជាក់បានថា កូនមួយណាពូកែជាងកូនមួយណាបានដែរ ព្រោះនៅពេលប្រកបអាជីពប្រចាំថ្ងៃ មិនមែនប្រើតែការសិក្សាអប់រំនោះទេ។ លោក គីម ដារ៉ា បន្តថា មានរឿងល្អជាច្រើនទៀតដែលឪពុកម្ដាយគួរផ្ដល់តម្លៃឱ្យកូន ដូចជា ភាពឧស្សាហ៍ព្យាយាម ភាពតស៊ូ ភាពដឹងគុណ និងភាពជាពលរដ្ឋល្អ។ កាលណាខ្វះចំណុចទាំងនេះ បើទោះបីជាមានកូនរៀនពូកែយ៉ាងក៏ដោយ ក៏មិនអាចក្លាយជាមនុស្សជោគជ័យទៅថ្ងៃអនាគតដែរ។

លោក គីម ដារ៉ា ស្នើដល់ឪពុកម្ដាយត្រូវទទួលស្គាល់ភាពខុសៗគ្នារបស់កូនម្នាក់ៗ បន្តជំរុញទឹកចិត្តកូនឱ្យខិតខំប្រឹងបន្ថែម យល់ពីចិត្តកូន ជំរុញកូនឱ្យមានភាពក្លាហាន ទទួលស្គាល់ភាពជាខ្លួនឯង និងធ្វើតាមអ្វីដែលជាទេពកោសល្យរបស់ពួកគេ។ «នៅពេលកូនខិតខំប្រឹងប្រែង អនាគតពួកគេនឹងក្លាយជាមនុស្សជោគជ័យ ហើយឪពុកម្ដាយក៏មានមោទនភាពដោយសារមានកូនជាមនុស្សជោគជ័យ ជាមនុស្សពូកែ និងមានប្រយោជន៍សម្រាប់សង្គមជាតិ»។

យោង​តាម​ការស្រាវជ្រាវគេ​​បាន​រកឃើញថា ការប្រៀបធៀបរបស់ឪពុកម្ដាយ អាចនាំឱ្យសិស្សមានភាពតានតឹងក្នុងការសិក្សាកម្រិតខ្ពស់ ការថប់បារម្ភ និងការគោរពខ្លួនឯងទាប ជាពិសេស ពួកគេមានអារម្មណ៍ថា មិនអាចរស់នៅតាមការរំពឹងទុករបស់ឪពុកម្តាយ។ ការសិក្សាខ្លះ បង្ហាញថា សិស្សដែលប្រឈមមុខនឹងការប្រៀបធៀបញឹកញាប់អាចបង្កើតផ្នត់គំនិតទាបអំពីសមត្ថភាពរបស់ពួកគេ ដោយផ្តោតលើការធ្វើយ៉ាងណាឱ្យបានល្អជាងអ្នកដទៃ ជៀសជាងការអភិវឌ្ឍសមត្ថភាព និងការរៀនសូត្រផ្ទាល់ខ្លួន។

ជាមួយគ្នានេះ បើតាម​ក្រសួងកិច្ចការនារី ការអប់រំកូនដោយប្រៀបធៀបជាមួយអ្នកដទៃ មិនមែនជាឥរិយាបថអប់រំកូនតាមបែបវិជ្ជមាននោះទេ។ នៅក្នុងសតវត្សទី២១ ម្តាយឪពុកមានតួនាទីជាអ្នកផ្តល់ប្រឹក្សាផ្លូវចិត្ត ផ្តល់វិធីសាស្ត្រអប់រំឥរិយាបថគំរូ និងបង្កើតភាពកក់ក្តៅដល់កូន៕