ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោមការគាំទ្រពីយូនីសេហ្វ កាលពីពេលថ្មីៗនេះ ក្រសួងសុខាភិបាល បានចេញផ្សាយរបាយការណ៍ស្ដីពីសុខភាពកុមារ និងបរិស្ថាន ដែលជារបាយការណ៍ដំបូងពាក់ព័ន្ធនឹងបញ្ហាសុខភាពកុមារ និងបរិស្ថាននៅកម្ពុជា ។ របាយការណ៍នេះ មានការចូលរួមពីជាង ២៩ក្រសួង និងមន្ទីរនៅថ្នាក់ជាតិ និងថ្នាក់ក្រោមជាតិ រួមទាំង ក្រសួងសុខាភិបាល ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
របាយការណ៍ សុខភាពកុមារ និងបរិស្ថាន បានគូសបញ្ជាក់អំពីហានិភ័យសុខភាពបរិស្ថានចម្បងៗដែលកុមារប្រឈម រួមមាន ការប្រឈមមុខនឹងការបំពុលខ្យល់ ការបំពុលទឹក និងចំណីអាហារ ភាពតានតឹងដោយសារកម្ដៅ សារធាតុលោហៈពុល ថ្នាំសម្លាប់សត្វល្អិត និងសំណល់គ្រោះថ្នាក់ផ្សេងទៀត ហើយការប្រែប្រួលអាកាសធាតុបានធ្វើឱ្យបញ្ហាទាំងនេះមានលក្ខណៈកាន់តែមានធ្ងន់ធ្ងរបន្ថែមទៀត ។
លោកវេជ្ជបណ្ឌិត កុល ហេរ៉ូ ប្រធាននាយកដ្ឋានការពារសុខភាពនៃក្រសួងសុខាភិបាល បានឱ្យដឹងថា ការធានានូវវឌ្ឍនភាពជាបន្តបន្ទាប់ចំពោះសុខភាពមាតា និងកុមារ គឺជាអាទិភាពចម្បងរបស់រាជរដ្ឋាភិបាលកម្ពុជា។ លោកថា ការគំរាមកំហែងផ្នែកសុខភាពបរិស្ថាន បង្កហានិភ័យគួរឱ្យកត់សម្គាល់ចំពោះសមិទ្ធផល ដែលយើងបានធ្វើទៅលើការពង្រឹងសុខភាពមាតា និងកុមារ នៅក្នុងរយៈពេលប៉ុន្មានទសវត្សរ៍កន្លងទៅ។
“យើងមានការប្ដេជ្ញាចិត្តយ៉ាងជ្រាលជ្រៅចំពោះការអនុវត្តគោលនយោបាយ និងកម្មវិធីពហុវិស័យ ដែលការពារសមិទ្ធផលទាំងនេះ។ តាមរយៈការដោះស្រាយគ្រោះថ្នាក់បរិស្ថាន យើងកំពុងកសាងអនាគតមួយ ដែលកាន់តែមានសុខភាពល្អ និងសុវត្ថិភាពសម្រាប់កុមារ និងមនុស្សជំនាន់ក្រោយរបស់យើង។”
លោកបណ្ឌិត វីល ផាកស៍ នាយកយូនីសេហ្វប្រចាំកម្ពុជា មានប្រសាសន៍ថា បច្ចុប្បន្ន កុមារប្រឈមនឹងការគំរាមកំហែងផ្នែកបរិស្ថានជាច្រើនដែលមិនធ្លាប់មានពីមុនមក រួមមាន ការបំពុលខ្យល់ និងទឹក ភាពតានតឹងដោយសារកម្ដៅ ព្រមទាំងការប្រឈមនឹងសំណល់ពុល និងសារធាតុបំពុល ដែលបង្កគ្រោះថ្នាក់ចំពោះសុខភាព និងការអភិវឌ្ឍខួរក្បាលរបស់កុមារ។ លោកបណ្ឌិត វីល ផាកស៍ បន្តថា ភាពតក់ស្លុតនៅឆាកជីវិតដំបូងរបស់កុមារ ប៉ះពាល់ដល់សក្ដានុពលរបស់ពួកគេក្នុងការក្លាយជាអ្នកដឹកនាំ និងអ្នករួមចំណែកចំពោះសេដ្ឋកិច្ចរបស់ពួកគេនៅពេលអនាគត។
នាយកយូនីសេហ្វប្រចាំកម្ពុជា បញ្ជាក់បន្ថែមថា ការដោះស្រាយបញ្ហាស្មុគស្មាញទាំងនេះ ទាមទារឱ្យមានកិច្ចសហប្រតិបត្តិការពហុវិស័យ និងភាពជាដៃគូដ៏រឹងមាំ។ តាមរយៈការរួមសហការគ្នា យើងអាចបង្កើតបរិយាកាសកាន់តែមានសុខភាពល្អ ដើម្បីឱ្យកុមារគ្រប់រូបអាចធំលូតលាស់ និងសម្រេចបានសក្ដានុពលពេញលេញរបស់ពួកគេ។
មានការប៉ាន់ប្រមាណថា កុមារចំនួន ៣រយលាននាក់នៅទូទាំងសកលលោក រស់នៅក្នុងតំបន់ជាច្រើន ដែលខ្យល់ពុលមានកម្រិតខ្ពស់ជាងគោលការណ៍ណែនាំអន្តរជាតិចំនួន៦ដង។ ដោយផ្អែកលើការប៉ាន់ប្រមាណជាសកលនេះ កម្ពុជាស្ថិតនៅក្នុងចំណោមបណ្ដាប្រទេសនៅតំបន់អាស៊ីអាគ្នេយ៍ ដែលប្រឈមមុខខ្ពស់បំផុតនឹងហានិភ័យបរិស្ថានចំនួន៣ គឺ ការបំពុលនៅក្នុងបរិយាកាសជុំវិញ ការបំពុលក្នុងអគារ និងការប៉ះពាល់នឹងសំណ។ ក្នុងនោះ នៅកម្ពុជាមានការប៉ាន់ប្រមាណថា កុមារជិត១នាក់នៅក្នុងចំណោម៥នាក់ អាយុក្រោម៥ឆ្នាំ បានទទួលមរណភាពដោយសារការបំពុលខ្យល់ទាំងនៅក្នុងអគារ និងទាំងនៅក្រៅអគារ ហើយកុមារអាយុក្រោម១៨ឆ្នាំជាង ៥០% មានកម្រិតសារធាតុសំណក្នុងឈាមខ្ពស់ ដោយសារការប៉ះពាល់នឹងសំណ។
អនុសាសន៍សំខាន់ៗពីរបាយការណ៍ សុខភាពកុមារ និងបរិស្ថាន រួមមាន ការពង្រឹងគោលនយោបាយ និងលិខិតបទដ្ឋានគតិយុត្ត ព្រមទាំងការអនុវត្តគោលនយោបាយ និងលិខិតបទដ្ឋានទាំងនោះ ដើម្បីបង្ការ និងគ្រប់គ្រងការប៉ះពាល់នឹងសារធាតុពុល និងសារធាតុបង្ករោគ, ការពង្រឹងសមត្ថភាពរបស់បុគ្គលិកសុខាភិបាលក្នុងការដោះស្រាយបញ្ហាសុខភាពបរិស្ថាន, ការលើកកម្ពស់ការយល់ដឹង, ការចូលរួមរបស់សហគមន៍ និងយុវជនក្នុងបញ្ហាបម្រែបម្រួលអាកាសធាតុ និងបរិស្ថាន, ការអនុវត្តការស្រាវជ្រាវ និងការអង្កេតបន្ថែមទៀត ព្រមទាំងការពង្រឹងប្រព័ន្ធពិនិត្យតាមដាន និងឃ្លាំមើលសុខភាពបរិស្ថាន៕
