បេក្ខជនប្រឡងបាក់ឌុបទាំងអស់ បានត្រៀមខ្លួនរួចជាស្រេចសម្រាប់ការប្រឡងរយៈពេលពីរថ្ងៃខាងមុខ បន្ទាប់ពីពួកគេបានទៅមើលដោយផ្ទាល់អំពី បញ្ជីឈ្មោះ លេខតុ លេខបន្ទប់ នៅតាមមណ្ឌលប្រឡងនាព្រឹកថ្ងៃទី០៧ ខែតុលា ឆ្នាំ២០២៤នេះ។ ទន្ទឹមគ្នានេះ បេក្ខជនប្រឡងបាក់ឌុប មានក្ដីសង្ឃឹមថានឹងប្រឡងជាប់ ព្រមទាំងខំឱ្យអស់ពីសមត្ថភាពដើម្បីទទួលបាននិទ្ទេសល្អ។

យុវតី ផាត់ ម៉ូនីកា ជាសិស្សថ្នាក់ទី១២ នៃសាលារៀនសុវណ្ណភូមិ និយាយថា រូបគេបានមកមើលឈ្មោះប្រឡងបាក់ឌុប លេខតុ លេខបន្ទប់ នៅវិទ្យាល័យព្រះស៊ីសុវត្ថិ។ ម៉ូនីកា បន្តថា រូបគេសង្ឃឹមសម្រាប់ការប្រឡងបាក់ឌុបខាងមុខនេះ នឹងធ្វើបានដោយរលូន ហើយរំពឹងថា នឹងយកលទ្ធផលល្អជូនគ្រួសារឱ្យបាន។

យុវតី ផាត់ ម៉ូនីកា បញ្ជាក់បន្ថែមថា សម្រាប់រូបគេប្រសិនបើមានពេលវេលាច្រើនជាងនេះ នឹងកាន់តែត្រៀមខ្លួនបានល្អ ប៉ុន្តែឥឡូវនេះបើតាមសមត្ថភាព និងចំណេះដឹង គឺអាចប្រឡងបានដោយទំនុកចិត្ត។ ម៉ូនីកា បន្តថា រូបគេបានខិតខំរៀនតាំងពីដើមឆ្នាំ ស្វ័យសិក្សាដោយខ្លួនឯង ដើម្បីត្រៀមខ្លួនសម្រាប់ការប្រឡងបាកឌុបនេះ។

សិស្សថ្នាក់ទី១២ នៃសាលារៀនសុវណ្ណភូមិ បន្ថែមថា អ្វីដែលសំខាន់សម្រាប់ការប្រឡងបាក់ឌុបខាងមុខនេះ គឺការប្រមូលអារម្មណ៍ឱ្យមូល ទើបសរសេរទៅមុខបានល្អ ព្រមទាំងកុំឱ្យភ័យដែលនាំឱ្យភ្លេចមេរៀន។

យុវសិស្ស ម៉ន ហុងលី ជាសិស្សថ្នាក់ទី១២​ នៃវិទ្យាល័យបាក់ទូក បានប្រាប់ឱ្យដឹងថា ការមកមើលឈ្មោះសម្រាប់ប្រឡងបាក់ឌុបថ្ងៃស្អែក រូបគេមានអារម្មណ៍ភ័យខ្លះៗដែរ ពីព្រោះការប្រឡងកាន់តែខិតជិតមកដល់ ប៉ុន្តែក៏បានត្រៀមខ្លួនរួចរាល់សម្រាប់ការប្រឡង។

សិស្សថ្នាក់ទី១២​ នៃវិទ្យាល័យបាក់ទូក រូបនេះ បន្ថែមថា សម្រាប់ការប្រឡងបាក់ឌុបរយៈពេលពីរថ្ងៃខាងមុខនេះ រូបគេសង្ឃឹមថានឹងធ្វើដោយរលូន និងមានភាគរយខ្ពស់អាចប្រឡងជាប់។ ហុងលី បន្តថា រូបគេបានត្រៀមខ្លួនសម្រាប់ការប្រឡងបាក់តាំងពីដើមឆ្នាំ ដូចជា ការសិក្សា សុខភាពរាងកាយ សម្ភារៈសម្រាប់ប្រឡងមាន ប៊ិក បន្ទាត់ គឺរៀបចំរួចជាស្រេច។ យុវសិស្ស ម៉ន ហុងលី ក៏បានជូនពរខ្លួនឯង និងបេក្ខជនប្រឡងដទៃទៀតឱ្យប្រឡងជាប់ទាំងអស់គ្នា ដើម្បីបន្តការសិក្សានៅសាកលវិទ្យាល័យជាមួយគ្នាទៀត។

យុវសិស្ស ប៉ុល ពិភពរង្សី ជាសិស្សថ្នាក់ទី១២ នៃវិទ្យាល័យបាក់ទូក លើកឡើងដែរថា រូបគេបានត្រៀមខ្លួនរួចជាស្រេចសម្រាប់ការប្រឡងបាក់ឌុបខាងមុខនេះ។ ពិភពរង្សី សង្ឃឹមថា រូបគេនឹងខិតខំឱ្យអស់ពីសមត្ថភាពក្នុងការប្រឡង ព្រមទាំងអាចយកនិទ្ទេស B ឬនិទ្ទេស C ឱ្យបាន។

យុវសិស្ស ប៉ុល ពិភពរង្សី បញ្ជាក់បន្ថែមថា អ្វីដែលសំខាន់បំផុតសម្រាប់ការប្រឡងបាក់ឌុប គឺការថែរក្សាសុខភាពឱ្យបានល្អ ព្រោះប្រសិនបើយើងមិនស្រួលខ្លួន (ឈឺ) នឹងធ្វើឱ្យការប្រឡងមិនដំណើរការដោយរលូននោះទេ។ ពិភពរង្សី ក៏បានលើកទឹកចិត្តដល់បបេក្ខជនប្រឡងទាំងអស់ ត្រូវគេងឱ្យបានគ្រប់គ្រាន់ ខំប្រឹងឱ្យអស់ពីសមត្ថភាពសម្រាប់ការប្រឡងថ្ងៃស្អែក បើទោះលទ្ធផលជាប់ ឬធ្លាក់ កុំបាក់ទឹកចិត្ត ព្រោះវាមិនមែនជាការកំណត់ជោគវាសនារបស់យើងឡើយ៕