ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានក្ដីស្រមៃចង់ឃើញប្រទេសកម្ពុជាមានរថយន្ត និងគ្រឿងចក្រប្រើប្រាស់សម្រាប់ជួយកាត់បន្ថយកម្លាំងពលកម្មក្នុងវិស័យកសិកម្ម ជំរុញឱ្យកុមារា អ៊ុំ ដានុត កែច្នៃទុយោទឹកមកធ្វើជារយន្តតូចធំ ហើយថែមទាំងបានដាក់បង្ហាញស្នាដៃច្នៃប្រឌិតរបស់ខ្លួន ក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤។
កុមារា អ៊ុំ ដានុត ជាសិស្សថ្នាក់ទី១០ នៃវិទ្យាល័យហ៊ុនសែន វត្តស្វាយ ខេត្តសៀមរាប បានប្រាប់ឱ្យដឹងថា រូបគេចេះកែច្នៃទុយយោទឹកមកធ្វើជារថយន្តតូចធំ ក៏ដូចជារ៉ូប៉ូតនេះ គឺកើតឡើងតាមរយៈការស្រមើស្រមៃ មើលឃើញរូបភាពរថយន្តជាក់ស្ដែង និងនៅតាមបណ្ដាញយូធូប។ ដានុត បន្តថា រូបគេក៏ប្រមូលគំនិតច្នៃប្រឌិតដែលខ្លួនមានកែច្នៃទុយយោទឹកមកធ្វើជារយន្តតូចធំតែម្ដង។
សិស្សថ្នាក់ទី១០ នៃវិទ្យាល័យហ៊ុនសែន វត្តស្វាយ ខេត្តសៀមរាប រូបនេះ បញ្ជាក់បន្ថែមថា ការកែច្នៃទុយយោទឹកមកធ្វើជារយន្តតូចធំនេះ គឺមានការជំរុញលើកទឹកចិត្តពីឪពុកផ្ទាល់ក្នុងការគាំទ្រថវិកាសម្រាប់ផលិត ។ ដានុត បន្តថា សម្រាប់ការផលិតរថយន្តខ្នាតតូចអាចចំណាយថវិកាអស់ ២ ទៅ៣ម៉ឺនរៀល, រថយន្តខ្នាតធំ ចំណាយអស់ថវិកាប្រមាណចន្លោះពី ១២ម៉ឺនទៅ១៦ម៉ឺនរៀល និងរ៉ូបូតចំណាយថវិកាប្រមាណ ៤០ម៉ឺនរៀល។
កុមារា អ៊ុំ ដានុត បន្ថែមថា នេះជាលើកទីមួយដែលរូបគេបានចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ ។ ដានុត យល់ឃើញថា កម្មវិធីនេះពិតជាល្អ មានមនុស្សច្រើន សម្បូរសិស្សនិស្សិតមកចូលរួមស្វែងយល់ពីជំនាញថ្មីៗ និងការស្វែងរកការងារ។
សិស្សវ័យ១៥ឆ្នាំរូបនេះ បញ្ជាក់ថា រូបគេមានក្ដីស្រមៃបង្កើតគម្រោងរ៉ូបូតការពារផ្ទះ និងការពារចម្ការ គេថា រ៉ូបូតនេះ អាចជួយផ្នែកកសិកម្មបានច្រើន ព្រោះបើក្រឡេកទៅលើវិស័យសិកម្មនៅប្រទេសអភិវឌ្ឍភាគច្រើនគេមានគ្រឿងចក្រទំនើបៗ ដូច្នេះកុមារារូបនេះ ចង់បង្កើតឱ្យមានគ្រឿងចក្រសម្រាប់ជួយវិស័យកសិកម្មនៅកម្ពុជា។
ក្នុងឱកាសទស្សនាស្តង់ពិព័រណ៍ស្នាដៃរបស់សិស្ស និស្សិត ក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤នេះ ឯកឧត្តម ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានទស្សនាការបង្ហាញស្នាដៃរបស់កុមារា អ៊ុំ ដានុត ព្រមទាំងបង្ហាញការចាប់រម្មណ៍លើស្នាដៃច្នៃប្រឌិតរបស់សិស្សវ័យក្មេងរូបនេះទៀតផង។ រដ្ឋមន្រ្តីក្រសួងការងារ ក៏បានលើកទឹកចិត្តដល់ កុមារា អ៊ុំ ដានុត ឱ្យបន្តខិតខំប្រឹងប្រែងរៀនសូត្រ និងសម្រេចក្ដីស្រមៃចង់ក្លាយជាអ្នកបង្កើតរ៉ូបូត និងរបស់របរប្រើប្រាស់ថ្មីៗសម្រាប់កម្ពុជា។
កុមារា អ៊ុំ ដានុត ក៏បានថ្លែងអំណរគុណដល់ក្រសួងការងារ ដែលបានរៀបចំកម្មវិធីនេះ ដែលបានផ្ដល់ឱកាសឱ្យរូបគេបានចូលរួមក្នុងការតាំងបង្ហាញស្នាដៃ និងមើលឃើញអំពីភាពរីកចម្រើននៃបច្ចេកវិទ្យា និងគំនិតច្នៃប្រឌិតក្នុងការបង្កើតសម្ភារៈប្រើប្រាស់៕
