ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម WE Forum បានបង្ហាញថា គ្រូបង្រៀនកំពុងប្រឈមបញ្ហាសុខភាពផ្លូវចិត្តដោយសារសម្ពាធក្នុងអាជីពរបស់ខ្លួន។ របាយការណ៍របស់រដ្ឋាភិបាលអង់គ្លេស ដែលបានចេញផ្សាយថ្មីៗនេះ ស្តីពីជីវិតការងាររបស់គ្រូបង្រៀន បានរកឃើញថា កម្រិតសុខុមាលភាពរបស់គ្រូបង្រៀនគឺទាបជាងប្រជាជនទូទៅ។ បើតាមការស្ទង់មតិជាងពាក់កណ្តាលនៃគ្រូបង្រៀន និងអ្នកដឹកនាំសាលាចំនួន ១១,១៧៧ នាក់បានលើកឡើងថា ការងារកំពុងជះឥទ្ធិពលអវិជ្ជមានដល់សុខភាពផ្លូវចិត្តរបស់ពួកគេ។
ផ្អែកលើទិន្នន័យដែលបានបង្ហាញបញ្ជាក់ថា សុខុមាលភាពគ្រូបង្រៀនគួរតែត្រូវបានយកចិត្តទុកដាក់បន្ថែម។ ប្រសិនបើរដ្ឋាភិបាលចង់ឱ្យគ្រូបង្រៀននៅបន្តអាជីពនេះ គួរតែមានការផ្លាស់ប្ដូរជុំវិញប្រាក់ឈ្នួល លក្ខខណ្ឌការងារ និងការគាំទ្រចំពោះសុខភាពផ្លូវកាយ និងផ្លូវចិត្តបន្ថែមទៀត។
យ៉ាងណាមិញ គ្រូបង្រៀនក៏អាចអនុវត្តនូវវិធីសាស្ត្រផ្សេងៗ ដើម្បីពង្រឹងសុខភាពផ្លូវចិត្តរបស់ខ្លួនផងដែរ។ បើតាមការស្រាវជ្រាវរបស់សាស្ត្រាចារ្យរងផ្នែកអប់រំ សាកលវិទ្យាល័យព្រីស្ដូលលោកស្រី Lucy Kelly បានបង្ហាញថា ការសរសេរកំណត់ហេតុប្រចាំថ្ងៃ គឺផ្ដល់នូវអត្ថប្រយោជន៍សម្រាប់សុខភាពផ្លូវចិត្ត។ ការអនុវត្តទម្លាប់នេះជាប្រចាំ ធ្វើឱ្យគ្រូបង្រៀនយល់កាន់តែច្បាស់អំពីតម្លៃនៃសុខុមាលភាពរបស់ខ្លួន។
ការស្រាវជ្រាវអំពីអត្ថប្រយោជន៍ នៃការធ្វើកំណត់ហេតុ បានចាប់ផ្ដើមក្នុងឆ្នាំ២០១៨ ដោយលោកស្រី Lucy Kelly និងបានធ្វើការជាមួយគ្រូបង្រៀនចំនួន ៤៥០នាក់។ លទ្ធផលនៃការស្រាវជ្រាវបានរកឃើញថា ការធ្វើកំណត់ហេតុជាប្រចាំ បានពង្រឹងសុខុមាលភាពអ្នកចូលរួមក្នុងគម្រោងនេះចំនួន ៧៤ភាគរយ។ បើទោះជាការធ្វើកំណត់ហេតុនេះ បានកា្លយជាការងារមួយទៀតក្នុងការងារប្រចាំថ្ងៃរបស់ខ្លួនក៏ដោយ។
ក្នុងចំណោមគ្រូទាំងអស់ដែលបានចូលរួមក្នុងគម្រោងនេះ គ្រូម្នាក់បានលើកឡើងថា ការសរសេរកំណត់ហេតុប្រចាំថ្ងៃ គឺជារឿងល្អ ព្រោះវាជួយពង្រឹងការគិត ស្គាល់ខ្លួនឯង និងមើលឃើញទស្សនៈខ្លួនឯងក្នុងរូបភាពមួយផ្សេងទៀត។ ជាពិសេសកំណត់ហេតុជួយឱ្យយល់ពីអ្វីដែលមានសារៈសំខាន់សម្រាប់ជីវិត ព្រមទាំងអនុញ្ញាតឱ្យយើងអាចបង្កើតដំណោះស្រាយសម្រាប់បញ្ហាដែលកើតមានជាប្រចាំក្នុងជីវិតប្រចាំថ្ងៃ។
លើសពីនេះ ជាច្រើនឆ្នាំមកនេះ អ្នកចូលរួមក្នុងគម្រោងចែករំលែកដូចៗគ្នាថា កំណត់ហេតុប្រចាំថ្ងៃធ្វើឱ្យពួកគេមានកន្លែងមួយដែលអាចបញ្ចេញអារម្មណ៍ និងភាពស្មុគស្មាញ ព្រមទាំងមានឱកាសស្គាល់ខ្លួនឯងកាន់តែស៊ីជម្រៅ។ សកម្មភាពនេះ ធ្វើឱ្យពួកគេទទួលស្គាល់នូវសារៈសំខាន់នៃការកំណត់អាទិភាពដល់សុខុមាលភាពរបស់ពួកគេ។
ការស្រាវជ្រាវរបស់អ្នកជំនាញខាងលើក៏បង្ហាញផងដែរថា កំណត់ហេតុប្រចាំថ្ងៃមិនគ្រាន់តែជាការសរសេរនោះទេ ប៉ុន្តែវាជាផ្នែកមួយនៃការបង្កើនគំនិតច្នៃប្រឌិត ការលើកកម្ពស់សុខភាពផ្លូវចិត្ត និងអនុញ្ញាតឱ្យយើងមានសេរីក្នុងការបង្ហាញចេញនូវអ្វីដែលយើងចង់បង្ហាញ ដោយមិនមានអារម្មណ៍ថា ត្រូវបានវិនិច្ឆ័យពីនរណាម្នាក់៕
