ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – សិស្សានុសិស្សដែលជិតបញ្ចប់ថ្នាក់វិទ្យាល័យតែងតែមានការបារម្ភពីការជ្រើសរើសជំនាញដែលត្រូវសិក្សាបន្ត ដើម្បីឱ្យត្រូវនឹងបរិបទសង្គមការងារបច្ចុប្បន្ន និងអនាគត។ អ្នកឧកញ៉ា គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច បានផ្តល់យោបល់ថា សិស្សានុសិស្សអាចពិចារណាក្នុងការរៀន TVET (ជំនាញបច្ចេកទេស និងវិជ្ជាជីវៈ) បាន ដោយសារការរៀន TVET លឿន ទទួលបានបទពិសោធន៍ផ្ទាល់ និងងាយស្រួលរកការងារធ្វើ។
អ្នកឧកញ៉ា គួច ម៉េងលី មានប្រសាសន៍ថា ប្រទេសយើងកំពុងអភិវឌ្ឍខ្លាំង ប្រទេសយើងមានយុវជនច្រើនជាងគេនៅក្នុងតំបន់ ដូច្នេះត្រូវការអ្នកចេះដឹងច្រើនដើម្បីបំពេញតម្រូវការសង្គមការងារដ៏ច្រើន ដែលវានឹងជួយឱ្យសេដ្ឋកិច្ចជាតិលូតលាស់។ អ្នកឧកញ៉ាបន្តថា យុវជនខ្លះកំពុងសម្រេចចិត្តថា តើគួរជ្រើសរើសរៀនសាលាណាក្រោយបញ្ចប់បាក់ឌុប? តាមអ្នកឧកញ៉ា យុវជនត្រូវជ្រើសរើសសាលាដែលរៀនចេះ ដោយកុំជ្រើសរើសសាលាដែលលក់សញ្ញាបត្រអី។
“អ្នកខ្លះកំពុងរៀនបាក់ឌុប កំពុងសម្រេចចិត្តជ្រើសរើសសាលាមួយណា សាលាខ្លះគេហៅថាសាលាលក់សញ្ញាបត្រ ត្រូវជ្រើសរើសសាលាដែលរៀនទៅចេះ …សាលារៀនចេះសម្បូរណាស់ ក្មួយៗអាចសួរគេសួរឯង… “
បច្ចុប្បន្ននៅកម្ពុជាមានគ្រឹះស្ថានអប់រំបណ្តុះបណ្តាលជំនាញបច្ចេកទេស និងវិជ្ជាជីវៈសរុបចំនួន៣២៥។ កាលពីឆ្នាំ២០២២ មានសិក្ខាកាម សិស្ស និស្សិតបានបញ្ចប់ការសិក្សាគ្រប់កម្រិតចំនួន៨៩,៨៧៨នាក់ ហើយសិក្ខាកាម សិស្ស និស្សិតដែលបានបញ្ចប់ការសិក្សា ទទួលបានការងារធ្វើស្ទើរទាំងអស់ ដោយទទួលបានប្រាក់ឈ្នួលសមរម្យច្រើនជាងកម្មករនិយោជិតដែលមិនមានជំនាញ។ ទន្ទឹមនោះ សិក្ខាកាមមួយចំនួនក៏មានលទ្ធភាពបង្កើតមុខរបរដោយខ្លួនឯងប្រកបដោយជោគជ័យ រួមចំណែកបង្កើតការងារបន្ថែម។
យ៉ាងណាក៏ដោយបើតាមប្រសាសន៍របស់អ្នកឧកញ៉ា គួច ម៉េងលី ដើម្បីអភិវឌ្ឍវិស័យ TVET ឱ្យកាន់តែរីកចម្រើនថែមទៀត លោកសំណូមពរទៅដល់វិស័យឯកជន គួរចូលរួមជាមួយរាជរដ្ឋាភិបាលធ្វើការបណ្តុះបណ្តាលជំនាញ TVET ហើយជាមួយគ្នានេះ លោកក៏អំពាវនាវដល់អង្គការនានាដែលធ្វើការងារលើវិស័យ TVET សូមជួយដល់វិស័យឯកជនដើម្បីអាចបើកបង្រៀន TVET បាន៕
